Read Ebaibuli 1961 Yoel 2 Bible Online

Yoel 2 - Ebaibuli 1961 bible

Yoel 2

¹ Kokuta yesi arupepe koSion, Kilalaata komoruka lokalaunan; Komaranata kere luiboiete kakwap: Naarai ebunit apaaran naka EJAKAIT, naarai aapu:

² Apaaran naka amuton ka anyikilil, Apaaran naka idouon ka amuton naejesi cucucuc, Kwape ecilar kide koroŋan; Etuŋat loepol loegogoŋ, Ageun apeŋo amamei loaputos kaŋol, Mam rwaru bobo ejaun lueputos kakes, Kiton ikar luka aturio nuipu.

³ Idopori akim koiŋarenekec; Kokaukec da enokete aipelonoreta, Esubit akwap bala emanikor loka Eden koiŋarenekec, Kokaukec da amodiŋ nailaroŋoŋ; Eebo, emamei da loabu koku kamakec.

⁴ Atakanukec eputos bala atakan naka ibalasin; Ekerete kwape ikebwanenok.

⁵Esomanaros kwape ecelet loka agalin, Kaidiasia nuka iroŋan, Kwape ecelet loka aipelonoreta nuka akim Naidopori ariaŋ, Kwape ituŋa lukagogoŋ luiderakinos ejie.

⁶ Eriebas atekerin noi kakonyenekec: Ijulakinos akonyenekec kere.

⁷Ekerete kwape ituŋa lukirigin; Edokete arwatat kwape ikajiok; Eraci ŋinituŋanan korotoke, Komam ijeranakinos.

⁸Mam ediopet eremori loce; Eraci ŋinidiopet korotoke: Etiakete kesi lujiis komam itikokinio.

⁹Esomanaros ore; Ekerete karwatat; Edokanarete otogoi; Elomanarete kadirisan kwape ekokolan.

¹⁰ Ijaŋakin akwap koiŋarenikec; Emarani akuj. Amutonor akoloŋ ka elap, Enyakasi aacer aicakec.

¹¹ Elimuni EJAKAIT ekeporoto koiŋaren kajoreke; Naarai ipu iidukurunuke; Naarai egogoŋ ŋesi loitodoli akekirot: Naarai epol apaaran naka EJAKAIT, nakaŋosibib naepol; Iŋai bo epedori abwoikin?

¹² Konye ebala EJAKAIT ebe, “Kibelokinos yesi mama ajai Kitauonokus kere, Kailuŋ, ka aimony akiyo, ka aibworo:

¹³ Kocila itauonokus, kwabo mere inapenekus.” Kibelokinos mama ejai EJAKAIT Ekusideke: Naarai esiana ŋesi, ileleba aitim, Iyapi anyunyurikin, ebarara aitim, Iituni kinyek aronis.

¹⁴ Iŋai bo ejeni arai motoko ibelokin, Iituni, inyeini arereŋ kokauke, Ainakinet naka akiria ka ainakinet namatat da Mama ejai EJAKAIT Ekusideke?

¹⁵Kokuta arupepe koSion, Kitalaut ailuŋ, Konyarautu atukonokin nakalaunan;

¹⁶ Korukonokis ituŋa, Kitalaut ekodet, Kinotut imakio, Kotukonokis idwe, Ka luenakete ikisin: Kolom eteran kagolake, Ka ateran da kotoma igolake.

¹⁷ Komonyata isasedotin akiyo, Ikejaanakinak luka EJAKAIT, Kokidiŋ kaneelomarere ka etem, Kotemasi atiar, “Kideu ikonituŋa, wu EJAKAIT, Sirikiinak airumetekon araun amorosit, Ka agaracio kotoma atekerin: Kanukinyo etemariata kesi katekerin ebe, ‘Ai bo ejai Ekecedeke?’ ”

¹⁸ Kosodi EJAKAIT aikokotikin kanuka akwapuke, Kitim iketuŋa.

¹⁹ Koboŋok EJAKAIT iketuŋa ebe, “Koany, kejukakini yes Akima ka ebino, ka akinyet, Kisimonete yes: Mam bobo ketarauni yes amorosit katekerin.

²⁰ “Konye esukunyari mama elwana Ajore naka agolitomei, Ereŋeari ŋes akwap nailaroŋoŋ, naesil, Ikeŋarenokoke kotoma aŋolol nakokide, Ka ikagolokoke kotoma aŋolol nakoto; Elomuni auresike, Elomuni da abosusuke naeur tulutul, Naarai eswama nuepolok.

²¹ “Sirikikurianar, ijo akwap, Kiyalamikin, kolakar; Naarai eswama EJAKAIT nuepolok.

²² Sirikikuriakaros, yes itiaŋ luka ais; Naarai ebwaŋunete ironyia luka amodiŋ, Naarai erai ekitoi araitoke, Ejaikini etini ka emusabibu agogoŋukec.

²³ “Aso do kiyalamikinos, yes idwe luka Sion, Kolakaros kotoma EJAKAIT Ekusideke: Naarai kiinakini ŋesi akiru naka aiporo naedolit, Isitepakini yes akiru, Akiru naka aiporo, ka akiru naka akamu, Kwape lem sek.

²⁴“Ilelebunos ipejala akima, Ilapanaros ebino ka akinyet kotoma akaalakanya.

²⁵Enyakakini eoŋ yes ikar luanyam emaase, Ka enyede, ka ekutelek, ka ogagul, Akajore naepol naejukunit mamakus.

²⁶ “Inyamete yesi amio, imonikinos, Iturete ekiror loka EJAKAIT Ekusideke, Lokiswamak yes nukaumokin: Mam bobo ikatuŋa ileicikinete.

²⁷ Ijenunete ebe ajai eoŋ kotoma Isirael, Eoŋ arai EJAKAIT Ekusideke, emamei ece kere: Mam bobo ikatuŋa ileicikinete.

²⁸ “Kosodi kanen akaulo kaŋun, Abukokini ekamoyo kere luejaas awat, Edwarete idwekus lusap ka lupesur, Irujaete ikusimakio airujasia, Eanyunete ikusikatumunak aitapoeta.

²⁹ Bobo da kapaarasia kaŋun Abukokini ekamoyo obulesin ka abulesin.

³⁰ “Etodikini nukaumokin toma akuj, kotoma akwap da, aokot, ka akim, ka ipirin luka apuru.

³¹ Eluor akoloŋ amuton, ka elap da araun aokot, koriŋa edoluno apaaran nakos ka nakaŋosibib naka EJAKAIT.

³² Kosodi kanen, itajaruunos kere luiwoneete ekiror loka EJAKAIT; naarai komoru Sion ka Yerusalem ejaunete luekuete, kwape enerar EJAKAIT, kotoma aatoŋot da ŋul luenyarauni EJAKAIT.