Read Ebaibuli 1961 Yoel 3 Bible Online

Yoel 3 - Ebaibuli 1961 bible

Yoel 3

¹“Naarai, koany, kapaarasia kakwa, kapak kaya da, naenyakunia luejoreoritai luka Yuda ka Yerusalem,

² atukonokini atekerin kere, ayauni kes aditot naka Yekosapat; apurokini kakes kanuka ikatuŋa ka akairumet Isirael, luapotu kesi kisiarakis katekerin, ka akorokor da akakwap.

³ Apotu kilamilamata eroet kanuka ikatuŋa: ainakis esapat itia naadote, agwelasi apese itia ajon, tetere kes emasete.

⁴ “Eebo, inyoika kereka yesi kaneajai eoŋ? Ijo Turo, ka Sidon, ka akwapin kere nuka Pilisitia? Kitacakinete kereka eoŋ eropit? Ido arai kitacakinete eoŋ, kesunyak eoŋ ainyakakin atipet akwesikus nuipotu kiswamata.

⁵Naarai ipotu koyaŋaasi epuesaka, ka esabuka, kodakasi iboroka luejok luisiyalamikinito abilaikus.

⁶Ipotu kogwelasi da idwe luka Yuda ka idwe luka Yerusalem mama ejaas Iyonanin, tetere eyaŋaarete kes kama elwana koikorunokec.

⁷Koany, esidiki kes aitonyoun kaibois naipotu kogwelas kes, enyakakini nuipotu kiswamata akwesikus.

⁸ Agwelari ikusidwe lusap ka lupesur akanin nuka idwe luka Yuda, kes da egwelarete kes mama ejaas ituŋa luka Seba, ateker naelwana: naarai ener EJAKAIT.”

⁹Kolimonokis ŋun katekerin; Kokapakinos ejie; Kisidikis ituŋa lukirigin; Kikunyutu ikajiok kere, kopotu.

¹⁰ Kotatata imelekesikus aituluor ikileŋa, Ka ieilikikinikus lukidimet aituluor akwaras: Kolimok loenonok ebe, “Agogoŋ eoŋ.”

¹¹Kisunyito yesi, kopotu, Yes atekerin kere nuirimorito, Kotukonokinos: Kitodok ikagogoŋokokon, wu EJAKAIT.

¹² Konyout atekerin, Kopotu aditot naka Yekosapat; Naarai eboikin kanen Atubokin atekerin kere nuirimorito.

¹³ Kodumutu ecilikiki, naarai akono aidweny: Kopotu kipudapudata, naarai ileleba aicues. Ilapanaros akaalakanya, Naarai epol aronisikec.

¹⁴Ikodeta, ikodeta, kotoma aditot naka etube! Naarai eapiei apaaran naka EJAKAIT, Kaditot naka etube.

¹⁵Amutonor akoloŋ ka elap, Enyakasi da aacer aicakec.

¹⁶ Egatuni EJAKAIT koSion, Elimuni ekeporoto koYerusalem; Ijaŋijaŋun akuj ka akwap, Konye eraun EJAKAIT aŋopis naka ituŋake, Ka abwas da mama ejaas idwe luka Isirael.

¹⁷ “Kwaŋin ijenunete yesi ebe arai eoŋ EJAKAIT Ekusideke, Loeboie koSion emoruka lokalaunan. Kosodi Yerusalem araun lokalaunan, Mam bobo imo itorete tomake.

¹⁸ “Kosodi kanen kapaaran kaya, Idonete iroŋan ebino loewiny, Eleleete iukon akile, Eleleete da aguuruto kere nuka Yuda akipi; Elomuni atan kotogo loka EJAKAIT, Naisinauni aditot naka Sitim.

¹⁹“Esilior Misiri, Eraun Edom da amodiŋ naesil, Kanuka nukadedeŋ nueswamakinitai idwe luka Yuda, Naarai abukosi aokot numam aronis kakwapukec.

²⁰Konye iboienenei Yuda ikar kere, Ka Yerusalem da kiton aturio kere.

²¹Etesegi eoŋ aokotokec numam etesegaarit, Naarai iboie EJAKAIT ko Sion.”