Read Ebaibuli 1961 Amos 2 Bible Online

Amos 2 - Ebaibuli 1961 bible

Amos 2

¹ Ebala EJAKAIT kwanata ebe: “Kanuka aibucareta auni nuka Moab, Eebo, kanuka aoŋon, mam ejulakini aiticanioke; Naarai abu kicwe akojo nuka ekabaka loka Edom koraut ekurwon.

² Konye ejukakini Moab akim, Idopori itogoi lukapolou luka Keriot; Etwani Moab kelulu ka ecelet, Ka eporoto da loka arupepe.”

³ Ebala EJAKAIT ebe, “Agelari ekatubon kokidiŋike, Aari ikapolokoke kere nepepe kaŋes.”

⁴ Ebala EJAKAIT kwanata ebe: “Kanuka aibucareta auni nuka Yuda, Eebo, kanuka aoŋon, mam ejulakini aiticanioke; Naarai aŋeroto ekisil loka EJAKAIT, Mam apotu koricito akeicorakineta, Kitapaa kes aiŋalakec, Naatupenenete lukapapaakec.

⁵ Konye ejukakini Yuda akim, Idopori itogoi lukapolou luka Yerusalem.”

⁶ Ebala EJAKAIT kwanata ebe: “Kanuka aibucareta auni nuka Isirael, Eebo, kanuka aoŋon, mam ejulakini aiticanioke; Naarai egwelanarete ikadoliton kanuka epuesa, Ka yenikican da kanuka amuk.

⁷ Luipudapudaete akwes nuka lukican kotoma apua nuka alup, Lueremorete awai erot loka luitasonos: Elomanarete etuŋanan ka papake mama ejai apese, Aitisil ekakiror lokalaunan.

⁸ Erioros eiduny kaŋolitem konapen luademasi araut aititineta, Ido toma togo loka Edekekec emasete ebino Loka ŋul luaponi kitegelai.

⁹ “Konye abu eoŋ kamudia Emorait kakonyenekec, Kosubite akeojau bala aojau naka iresia, Kogogoŋ bala iluan; Konye abu kamudia araitoke kokuju, Ka aliasike da kokwap.

¹⁰Ido abu eoŋ ketolom yes kakwap nako Misiri, Keŋarenik yes ikar akaisaoŋon kamodiŋ, Aisurum akwap naka Emorait.

¹¹ Abu eoŋ kadakak odwekus araun inabin, Ikusikatumunak da araun Inasirin.” Ebala EJAKAIT ebe, “Wu yes idwe luka Isirael, Mam kereka ekote nen?

¹² “Konye ipotu koinakis Inasirin ebino aimat; Ipotu kicorakis inabin ebe, ‘Sirikidwarata.’

¹³“Koany, aridakini yes kaiboisikus, Kwape eridakinor agali naileleba iisutan.

¹⁴Etwaniari loetirono aŋopis, Mam lokagogoŋon itogogoŋi akegogoŋ, Karaida lokirigi aitajar akeijar.

¹⁵Loikesi akabwa mam ebwoi; Loetirono kakeje da mam eyuuni bon: Loibwaneni ebalasit da mam itajari akeijar.”

¹⁶Ebala EJAKAIT ebe, “Ŋol da loetitiŋ kotoma lukirigin Ekeri emujalal kapaaran kaŋin.”