Read Ebaibuli 1961 Amos 7 Bible Online

Amos 7 - Ebaibuli 1961 bible

Amos 7

¹Abu Ejakait EDEKE ketodik kwanata: ido koany, kosub ŋesi emaase kageunet naka alomun naka alibun nakokau; ido koany arai alibun nakokau kedau ekabaka aiŋer anyake.

²Kosodi kanen kedau emaase ainyam anya nuka akwap, kasodi eoŋ atemar atiar, “Wu Ejakait EDEKE, keŋaiŋait, kisioni! Ikwaikini do ai Yakob ebwoi? Naarai edit ŋesi!”

³ Kiitu EJAKAIT kaŋun; Kobala EJAKAIT ebe, “Mam ejauni.”

⁴Abu Ejakait EDEKE ketodik kwanata: ido koany, kiworo Ejakait EDEKE etube loka akim; kidopoo ataro naepol, kouta aiŋiny akwap.

⁵Kasodi eoŋ atemar atiar, “Wu Ejakait EDEKE, keŋaiŋait, kinyek! Ikwaikini do ai Yakob ebwoi? Naarai edit ŋesi!”

⁶ Kiitu EJAKAIT kaŋun; Kobala Ejakait EDEKE ebe, “Mam ŋin da ejauni.”

⁷Abu ŋesi ketodik kwanata: ido koany, ebwoi EJAKAIT eiduny karwatat naadukio kebiriji, itiŋit ebiriji kakanike.

⁸ Katema EJAKAIT eoŋ atiar, “Amos, iany inyo?” Kabala ebe, “Ebiriji.” Kosodi EJAKAIT atemar atiar, “Koany, ebwaikini ebiriji kidiŋ kikatuŋa Isirael; Mam bobo enaeenenei kes.

⁹ Itisilio aiboisio nuiceleleete nuka Isaak, Iswapete aiboisio nukalaunak nuka Isirael; Anyoikini da ekek loka Yeroboam kekileŋ.”

¹⁰ Kosodi Amasia esasedoti loka Bet-el aiyakiar mama ejai Yeroboam ekabaka loka Isirael ebe, “Inerunit Amos asurokin jo kokidiŋ kekek loka Isirael: mam akwap epedori atitiŋikin akekiro kere.

¹¹Naarai ebala Amos kwanata ebe, ‘Etwani Yeroboam kekileŋ, Abeit da ijoreorio Isirael Anyoun kakwapuke.’ ”

¹²Bobo da kotema Amasia Amos atiar, “Ijo ekadwaran, kolot, kokerea akwap naka Yuda, konyam atap kaŋina, kodwara da kaŋina.

¹³ Konye sirikidwara bobo koBet-el; naarai ŋes aibois nakalaunan naka ekabaka, erai da etogo loka ekabakane.”

¹⁴ Kosodi Amos aboŋokin Amasia ebe, “Mam arai enabi, karaida okoku loka enabi; konye arai ekecokon, ido eketemonokinon ikito luka esukumor.

¹⁵Abu EJAKAIT kalem kameet esipan, katema EJAKAIT atiar, ‘Kolot, kodwarak ikatuŋa Isirael.’

¹⁶ “Aso do, kiira akirot naka EJAKAIT. Ibala ijo ebe, ‘Sirikidwar aluikin Isirael, Sirikilimonok aluikin ekek loka Isaak.’

¹⁷ Kanuka ŋun ebala EJAKAIT kwanata ebe: Eraun akoniberu naadote kotoma ore, Ibiroros idwekon lusap ka lupesur kekileŋ, Ekorio alupokon kaitemis; Ijo da itwanikini akwap namam elai, Abeit da ijoreorio Isirael anyoun kakwapuke.”