Read Ebaibuli 1961 Aimario 18 Bible Online

Aimario 18 - Ebaibuli 1961 bible

Aimario 18

¹ Kotema EJAKAIT Aaron atiar, “Ibwoki ijo ka odwekon, ka ekal loka lukapapaakon nepepe kajo numam adolit nuka aibois nakalaunan: ido ijo ka odwekon ibwokete numam adolit nuka esasedotenekus.

² Ikoniinacan da, ateker naka Lebi, ateker naka papakon, kisukuny nepepe kajo, tetere imorikikinio mamakon, kijaanakis jo: konye ijo ka odwekon nepepe kajo ijaunos akonyen nuka ewema loka aitejenunet.

³ Idarete kesi akirokon, idarete da Ewema kere: konye mam ikunyakinete die kiboro luka aibois nakalaunan karaida otem, kinyeis atwakare, kes, karaida yes.

⁴Imorikikinio kes mamakon, idarete ewema loka airiamunun, kanuka aijaanakin kere naka Ewema:, mam eloŋwait ikunyuni diekus.

⁵ Idarete yesi aibois nakalaunan, ka etem da: tetere mam bobo akanyunyura ebunokini idwe luka Isirael.

⁶ Eoŋ da, koany, alema iinacanakon Ilebin kodwe luka Isirael: eraas ainakinet mamakon, lueinakinitai EJAKAIT, aijaanakin ewema loka airiamunun.

⁷ Idarete ijo ka odwekon esasedotenekus koboro kere luka etem, ka luejaas toma aigalisit; ijaanakinete da: kainakinit yes aijaanakin naka esasedotene bala ainakinet: ido eloŋwait loikunyuni die eario.”

⁸ Kotema EJAKAIT Aaron atiar, “Eoŋ da, koany, kainak jo nuinadakinio nuka ainakineta nukainanakinio eoŋ, kes iboro lukalaunak luka idwe luka Isirael, kainak jo araun ewaikon, ka odwekon da, airumetekus nakitebeikinitai ikar kere.

⁹ Ŋin eraun nakon koboro lukalaunak noi, numam icweikinitai: ŋiniinakinetekec, ŋes ŋiniinakinetekec naka akiria, ka ŋiniinakinetekec naka adiakaret, ka ŋiniinakinetekec naka aronis, nakainakinete eoŋ, eraun nakalaunan noi kanukon ido kanuka odwekon da.

¹⁰Inyamanakini aibois nakalaunan noi: enyami ŋolikiliokit; eraunos lukalaunak kamakono

¹¹ Lukon lu: luedakakinitai luka ainakinetakec, ainakineta da nuijaŋio nuka idwe luka Isirael: kainak jo, ka ikonidwe lusap ka lupesur nepepe kajo, airumetekus nakitebeikinitai ikar kere: ŋin yenelai kokalekon enyami kes.

¹² Akinyet kere naitelekarit ajokis, ka ebino loitelekarit ajokis, akima da, nuegeete kakesi kokaru nueinakinete EJAKAIT, kainak jo.

¹³Araito nuegeete atiokore nuka kere luejaas toma akwap, nueyaununete mama ejai EJAKAIT, eraunos nukon; ŋin yenelai kokalekon enyami kes.

¹⁴ Ŋinibore yenegitunitai kotoma Isirael eraun yenikon.

¹⁵ Ŋinibore yenepukori aliliget, yenika akuan kere yeneinakinete EJAKAIT, yenika etuŋanan ka etiaŋ da, eraun yenikon: konye sirikinyek alakun ekiyai loka etuŋanan, sirikinyek da alakun ekiyai loka itiaŋ lumam elaete.

¹⁶ Ka ŋul da luibusakinit alakun kakesi, ilakuni ageun kaluka elap ediopet, kwape ejaunor aimarakon, isekelin ikany, kwape ajaar esekel [16] loka aibois nakalaunan (esekel ŋes igeran akaisaarei).

¹⁷ Konye mam ilakuni ekiyai loka emoŋ, arai ekiyai loka amerekek, arai ekiyai loka akinei; eraas lukalaunak: ibwatakini akeceokot otem, icweikini da asiepaikec kanuka ainakinet naeinakinere kakim, asakat naeuru saa mama ejai EJAKAIT.

¹⁸ Akiriŋikec eraun nakon, kwape ka atorob naiianio ka amurwo nakoteten, eraun nakon.

¹⁹Ainakineta nuedakakinitai kere nuka iboro lukalaunak, nueinakinete idwe luka Isirael EJAKAIT, kainak jo ka ikonidwe lusap ka lupesur, nepepe kajo, airumet nakitebeikinitai ikar kere: erai aitutuket naka abalaŋ naka ikar kere kakonyen nuka EJAKAIT mama ijai ijo ka akoniwur nepepe kajo.”

²⁰ Kotema EJAKAIT Aaron atiar, “Emamuun jo airumet kotoma akwapukec, karaida adumun akorakinet kamakec: Eoŋ ŋes akorakinetekon ka airumetekon da kodwe luka Isirael.

²¹ “Ido koany, ainak idwe luka Lebi idiopet kotomon koIsirael araun airumet, atacia aijaanakinikec naijaanakinete, ŋes aijaanakin naka ewema loka airiamunun.

²² Ido ameari kwana mam idwe luka Isirael ikunyunete die kewema loka airiamunun, kinyeis aibwok adiakaret, kosodete atwakare.

²³Konye ijaanakinete Ilebin ewema loka airiamunun, ibwokete numam adolitekec: eraun ekisil katuriokus kere ikar kere, ido emamuun kes airumet kodwe luka Isirael.

²⁴ Naarai ainak Ilebin idiopet kotomon yenika lueinanakinete idwe luka Isirael kanuka ainakinet naedakakinitai mama ejai EJAKAIT araun airumet: kanuka ŋun alimok kes ebe, Emamuun kes airumet kodwe luka Isirael.”

²⁵Kotema EJAKAIT Musa atiar,

²⁶ “Bobo da ilimokini Ilebin ebe, ‘Naijauniata idwe luka Isirael idiopet kotomon yenikainak yes kamakec araun airumetekus, iinakiniata yesi da ainakinet naedakakinitai mama ejai EJAKAIT, idiopet kotomon yenika idiopet kotomon.

²⁷Imarakinio mamakus ainakinetekus naedakakinitai kosubite bala kerai alos nakopejal, arai nuegeete nuka acuet naka ebino.

²⁸Iinakinete yesi da kwaŋin ainakinet naedakakinitai mama ejai EJAKAIT, idiopet kotomon yenika luijaunete kodwe luka Isirael; iiaikiniata da Aaron esasedoti ainakinet naedakakinitai naka EJAKAIT.

²⁹Kainakinetakus kere iinanakinete ŋiniinakinet naedakakinitai naka EJAKAIT, kaluitelekarit ajokis kotomakec ŋes atutubet naitalaunitai kotomakec.’

³⁰Ŋes itemaria kes atiar, ‘Naidakuniata naitelekarit ajokis, ŋes imarakinere oLebin kosubite bala nuiyatakina nuka epejal, ka nuiyatakina nuka acuet naka ebino.

³¹ Inyamenenete ŋes kaŋiniibois, yes ka ikusikalia da; naarai erai eropitikus atacia aijaanakinikus kowema loka amamunun.

³² Ido mam ibwokete aronis kanuke, kidaut adakakin naitelekarit ajokis kotomake: sirikitisiloto iboro lukalaunak luka idwe luka Isirael, kinyeis atwakare.’ ”