Read Ebaibuli 1961 Aimario 2 Bible Online

Aimario 2 - Ebaibuli 1961 bible

Aimario 2

¹Kotema EJAKAIT Musa ka Aaron atiar,

² “Idukurete idwe luka Isirael ŋinituŋanan kwape ejaar emederake, ka aanyuneta nuka ikalia luka lukapapaakec: idukurete kolukunito kobwatara kowema loka airiamunun.

³ Ŋul luka emedera loka iidukurun luka Yuda, kes idukurete ari nakokide kama eŋiunia akoloŋ, kwape ejaatar irioŋetakec: ido ekapolon loka idwe luka Yuda ŋes Nason okoku loka Aminadab.

⁴Ido erioŋeteke, ka ŋul luaponi kimarai kakesi, emwaasi ilukumin akaisakanykaarei ka luoŋon ka akwat akanykape.

⁵ Ido ŋul luidukurete eiduny kaŋes kes luka ateker naka Isakar: ekapolon da loka idwe luka Isakar ŋes Netanel okoku loka Suar:

⁶ Erioŋeteke, ka ŋul luaponi kimarai kakesi, emwaasi ilukumin akaisakany ka luoŋon ka akwat aoŋon:

⁷ Ateker naka Sebulun: ekapolon loka idwe luka Sebulun ŋes Eliab okoku loka Kelon:

⁸Erioŋeteke, ka ŋul luaponi kimarai kakesi, emwaasi ilukumin akaisakany ka lukanykaarei ka akwat aoŋon.

⁹ Kere luaponi kimarai luka iidukurun luka Yuda emwaasi ilukumin akwatat ka akaisakanykauni ka lukanykape ka akwat aoŋon, kwape ejaatar irioŋetakec. Kes egeete alosit.

¹⁰ “Ejaun emedera loka iidukurun luka Reuben ari naka eŋalakimak kwape ejaatar irioŋetakec: ekapolon loka idwe luka Reuben ŋes Elisur okoku loka Sedeur.

¹¹Erioŋeteke, ka ŋul luaponi kimarai kakesi, emwaasi ilukumin akaisaoŋon ka lukanykape ka akwat akany.

¹²Ŋul luidukurete eiduny kaŋes kes luka ateker naka Simeon: ekapolon loka idwe luka Simeon ŋes Selumiel okoku loka Surisadai:

¹³Erioŋeteke, ka ŋul luaponi kimarai kakesi, emwaasi ilukumin akaisakany ka lukanykaoŋon ka akwat auni:

¹⁴Ka ateker naka Gad: ekapolon loka idwe luka Gad ŋes Eliasap okoku loka Reuel:

¹⁵Erioŋeteke, ka ŋul luaponi kimarai kakesi, emwaasi ilukumin akaisaoŋon ka lukany ka akwat akanykape ka akaisakany.

¹⁶ Kere luaponi kimarai luka iidukurun luka Reuben emwaasi ilukumin akwatat ka akaisakany ka lodiopet, ka akwat aoŋon ka akaisakany, kwape ejaatar irioŋetakec, Kes iareikinete kalosit.

¹⁷ “Kosodi itobwosio ewema loka airiamunun, kojaas da iidukurun luka Ilebin kidiŋ kiidukurun ice: kwape idukurioto, kwape kwaŋin da ebwosiata, ŋinituŋanan kaiboisike, kwape ejaatar imederanakec.

¹⁸ “Ejaun emedera loka iidukurun luka Epuraim ari nakoto kwape ejaatar irioŋetakec; ekapolon loka idwe luka Epuraim ŋes Elisama okoku loka Amikud.

¹⁹Erioŋeteke, ka ŋul luaponi kimarai kakesi, emwaasi ilukumin akaisaoŋon ka akwat akany.

²⁰Idunyakin ateker naka Manase neejai ŋesi: ekapolon loka idwe luka Manase ŋes Gamaliel okoku loka Pedasur:

²¹Erioŋeteke, ka ŋul luaponi kimarai kakesi, emwaasi ilukumin akaisauni ka luarei ka akwat aarei:

²² Ka ateker naka Benyamin: ekapolon loka idwe luka Benyamin ŋes Abidan okoku loka Gideoni:

²³Erioŋeteke, ka ŋul luaponi kimarai kakesi, emwaasi ilukumin akaisauni ka lukany ka akwat aoŋon.

²⁴ Kere luaponi kimarai luka iidukurun luka Epuraim emwaasi ilukumin akwatat ka lukanykauni ka akwatat, kwape ejaatar irioŋetakec. Kes iunikinete kalosit.

²⁵ “Ejaun emedera loka iidukurun luka Dan ari naka agolitomei kwape ejaatar irioŋetakec: ekapolon loka idwe luka Dan ŋes Akieser okoku loka Amisadai.

²⁶Erioŋeteke, ka ŋul luaponi kimarai kakesi, emwaasi ilukumin akaisakanykape ka luarei ka akwat akanykaarei.

²⁷Ido ŋul luidukurete eiduny kaŋes kes luka ateker naka Aser: ekapolon loka idwe luka Aser ŋes Pagiel okoku loka Ocuran.

²⁸Erioŋeteke, ka ŋul luaponi kimarai kakesi, emwaasi ilukumin akaisaoŋon ka lodiopet ka akwat akany:

²⁹ Ka ateker naka Naputali: ekapolon loka idwe luka Naputali ŋes Akira okoku loka Enan:

³⁰Erioŋeteke, ka ŋul luaponi kimarai kakesi, emwaasi ilukumin akaisakany ka luuni ka akwat aoŋon.

³¹ Kere luaponi kimarai luka iidukurun luka Dan emwaasi ilukumin akwatat ka akaisakany ka lukanykaarei ka akwat akanykape. Kes iwasiete kalosir kwape ejaatar imederanakec.”

³² Ŋul kes luaponi kimarai kodwe luka Isirael kwape ejaatar ikalia luka lukapapaakec: kere luaponi kimarai luka iidukurun kwape ejaatar irioŋetakec, emwaasi ilukumin akwat akanykape ka luuni ka akwat akany ka akaisakany.

³³ Konye mam Ilebin aponi kimarakinai toma odwe luka Isirael: kwape kicorakinia EJAKAIT Musa.

³⁴ Kiswamata idwe luka Isirael kwaŋin; kere kwape kicorakinia EJAKAIT Musa, kidukuroto kwaŋin kwape ajaatar imederanakec, kwape kwaŋin da kebwosiata, ŋinituŋanan kwape ajaar ekekike, kwape ajaatar ikalia luka lukapapaakec.