Read Ebaibuli 1961 Aimario 22 Bible Online

Aimario 22 - Ebaibuli 1961 bible

Aimario 22

¹ Koloto idwe luka Isirael, kidukuroto apuutona nuka Moab okekwa loka Yorodan ko Yeriko.

² Koany Balak okoku loka Sipor kere nukiswamakin Isirael Imorain.

³ Kokurianar Moab noi ituŋa, naarai epu: koiurunun Moab kanuka idwe luka Isirael.

⁴ Kobala Moab imakio luka Midian ebe, “Natikwana elosi etuŋat lo ameor cut kere lukirimoritos, kwape ikoeoria emoŋ eduan lokorony.” Balak da okoku loka Sipor ŋes arai ekabaka loka Moab kapaarasia kaŋun.

⁵ Kijuka ikiyakia mama ejai Balaam okoku loka Beor, Pesor, loiririkina Ecor, kakwap naka idwe luka iketuŋa, anyaraun ŋes ebe, “Koany, ejaas ituŋa lueponito koMisiri: koany, egarito akwap, kes da katereikina eoŋ:

⁶ Aso, keŋaiŋait, kobia, kikenokinai ituŋa lu; naarai egogoŋ kesi adepar eoŋ, elemuni kepiko: kasodete aidany, kereŋea kakwap: naarai ajeni ebe yenilipakini ijo arereŋ isirereŋio, ido yenikeni ijo ikenio.”

⁷ Kolototo imakio luka Moab ka imakio luka Midian ekapitos ainakineta nuka aidwar; kopotu mama ejai Balaam, kolimokis ŋes akiro nuka Balak.

⁸Kotema kes atiar, “Koperoto ne akuare na, kenyakakini eoŋ da yes kwape kalimokinia EJAKAIT.” Kiboikinos lukapolok luka Moab ore loka Balaam.

⁹ Kobu Edeke neejai Balaam, kotema atiar, “Lukaŋai ituŋa lu luijaas kajo?”

¹⁰Kotema Balaam Edeke atiar, “Balak, okoku loka Sipor, ekabaka loka Moab, ŋes keyakikinit, ebe,

¹¹‘Koany, ituŋa luapote koMisiri egarito akwap: kobia cabo kikenokinai; elemuni apedori ejie kakes, kereŋea.’ ”

¹² Kotema Edeke Balaam atiar, “Sirikiloto kakes; sirikiken ituŋa: naarai isirerenitai.”

¹³Konyou Balaam tupuruc, kolimok lukapolok luka Balak ebe, “Koloto ma yesi bukus: naarai aŋer EJAKAIT acamakin eoŋ alosit kayes.”

¹⁴Konyout lukapolok luka Moab, koloto mama ejai Balak, kotemasi atiar, “Aŋer Balaam aupun kasio.”

¹⁵Kiyatak Balak bobo aijukar lukapolok, luitelekarito kwi aipues, ka luitelekarito da kapolou.

¹⁶Kopotu mama ejai Balaam, kotemasi ŋes atiar, “Inera kwanata Balak okoku loka Sipor, ebe, ‘Kinye adiokirot aitikokin jo abunore neajai eoŋ, keŋaiŋait.

¹⁷ Naarai ketopoloori eoŋ jo koraun lokaibuses noi, kere da nukilimokini eoŋ eswamai: aso bia, keŋaiŋait, kikenokinai ituŋa lu.’ ”

¹⁸ Koboŋok Balaam kotema ikejaanakinak luka Balak atiar, “Karaida kainaki Balak eketogo ileleba epuesa ka esabu, mam apedori adepar akirot naka EJAKAIT Ekadeke, aiŋoŋar arai aiyatakin.

¹⁹Aso ber, keŋaiŋaitos, koperoto yes da ne akuare na, tetere ajenuni nuiyatakini EJAKAIT alimokin eoŋ.”

²⁰ Kobu Edeke neejai Balaam kuare, kotema ŋes atiar, “Arai eponitos ituŋa ŋul anyarit jo, konyou, koloto kakes, konye akirot ban nakalimokini jo, ŋipeŋin iswamai.”

²¹ Konyou Balaam tupuruc, kopesik aibwanenis asigiriake, koloto nepepe kalukapolok luka Moab.

²² Kinep anyunyura naka Edeke kanu alosio: kobwo emalaika loka EJAKAIT korot asurokin ŋes. Ido kibwanenite asigiriake, koupasi kikekejaanakinak iarei.

²³ Koany asigiria emalaika loka EJAKAIT ebwoi korot, ka ekekileŋ da eutuno kakanike; kinac asigiria kopaa ais: kocar Balaam asigiria ainyakun orot.

²⁴Kosodi kobwo emalaika loka EJAKAIT korot loedidiŋ loejai kidiŋ kimanikoria luka emusabibu, kojai abwas epuai ka epuai.

²⁵ Koany asigiria emalaika loka EJAKAIT, koridakin arwatat, kogirisor akeju naka Balaam karwatat: kocar ŋes bobo.

²⁶ Kikunya emalaika loka EJAKAIT nediokasilon, kobwo korot loedidiŋ, neamamei apak naibelokinor teten karaida kediany.

²⁷ Koany asigiria emalaika loka EJAKAIT, koper kwap ka Balaam; kinep anyunyura naka Balaam, kocar asigiria kekebela.

²⁸ Kitoona EJAKAIT aituk naka asigiria, kotema Balaam atiar, “Kekonak bo eoŋ jo ai, tape kicaracarai eoŋ aatenak ŋun auni?”

²⁹ Kobala Balaam asigiria ebe, “Naarai kitakadik: arai kiŋa eoŋ kekileŋ akanika, ti kwana kaar jo.”

³⁰ Kotema asigiria Balaam atiar, “Mere eoŋ akonisigiria, naibwanen ijo kaiiarakon kere aitodol lolo? Etapit tope eoŋ aikonanakin jo kwaŋin?” Kobala ebe, “Mam.”

³¹ Kosodi kitwekeny EJAKAIT akonye nuka Balaam, koany emalaika loka EJAKAIT ebwoi korot, ka ekekileŋ eutuno kakanike: kitulur akekou, kibiror ebuburia.

³² Kobala emalaika loka EJAKAIT ebe, “Kanukinyo icaracaraa akonisigiria aatenak ŋun auni? Koany, alom asurokin jo, naarai epagal akonilosit kakonyeneka:

³³Kaanyu asigiria eoŋ, abu kibelokin kakonyeneka aatenak ŋun auni: arai kemam ibelokino kamaka, abeit kwana tikaar jo, tiketajar ŋes.”

³⁴ Kobala Balaam emalaika loka EJAKAIT ebe, “Adiaka eoŋ: naarai mam ajeni ebe ibwoi ijo korot asurokin eoŋ: aso kwana, arai kitakadikinit jo, aboŋori do,”

³⁵Kotema emalaika loka EJAKAIT Balaam atiar, “Kolot kituŋa: konye akirot bon nakalimokini jo, ŋipeŋin inera.” Kosodi koloto Balaam kalukapolok luka Balak.

³⁶ Kepupu Balak ebe abu Balaam, koloma airiamun kaŋes ore loka Moab, loejai oikor loka Arunon, loejai osaŋe loka eikor.

³⁷Kobala Balak Balaam ebe, “Mam abu keyakikinite kaimaimait anyaraun jo? Kanukinyo mam ibu kobunio mamaka? Mam kereka apedori eoŋ aitopoloor jo koraun lokaibuses?”

³⁸ Kobala Balaam Balak ebe, “Koany, abu neijai: ejai kwana eoŋ apedor kere einer adiokirot? Akirot naibwaikini Edeke aitukuka, ŋipeŋin alimuni.”

³⁹Kolototo Balaam ka Balak, kodolo Kiriatkusot.

⁴⁰Koinak Balak asuban nuka imoŋin ka imerekekin, kijukak da Balaam, ka ikapolok luajaas kaŋes.

⁴¹ Kosodi kanen kiwala akwap, koyaŋa Balak Balaam, kitodoka ŋes aiboisio nuiceleleete nuka Baal, kosesen kanen neasaŋitos ituŋa kere.