Read Ebaibuli 1961 Aimario 29 Bible Online

Aimario 29 - Ebaibuli 1961 bible

Aimario 29

¹ “Kolap lokikanyetekaarei, kapaaran nasodit naka elap, ejaun yes atukokinet nakalaunan; siriswamaete aswam naelaŋir; erai apaaran naka aikut arupepen kamakus.

²Iinakinete ainakinet naicweio araun asakat naeuru saa mama ejai EJAKAIT; emoŋ lotobait ediopet, ka emerekek ediopet, ka imerekekin ikanykaarei lukiliok luka ekaru ediopet lumam eŋwalito:

³Ka ainakinetekec naka akiria, akiria nuidicic nuinyalakinitai akinyet, iuni kotomon kanuka emoŋ lotobait, ka iarei kotomon kanuka emerekek.

⁴Ka idiopet kotomon kanuka ŋinimerekek kotoma omerekekin ikanykaarei:

⁵Ka ekoroi ediopet araun ainakinet naka adiakaret, alucio yes:

⁶ Kogelara ainakinet naicweio naka elap loilamuni, ka ainakineteke naka akiria, ka ainakinet naicweio naduc ka ainakineteke naka akiria, ka ainakinetakec numatan, kwape ejaar ekecekisil, araut asakat naeuru saa, ainakinet naeinakinere kakim mama ejai EJAKAIT.

⁷ “Kapaaran nakitomonet naka elap kaŋol lokikanyetekaarei ejaun yes atukokinet nakalaunan; iticanete akusiijar; mam iswamaete adioswam kere:

⁸ Konye iinakinete ainakinet naicweio mama ejai EJAKAIT araun asakat naeuru saa; emoŋ lotobait ediopet, ka emerekek ediopet; ka imerekekin ikanykaarei lukiliok luka ekaru ediopet; eraunos mama ijaas lumam eŋwalito:

⁹Ka ainakinetekec naka akiria, akiria nuidicic nuinyalakinitai akinyet, iuni kotomon kanuka emoŋ lotobait, ka iarei kotomon kanuka emerekek ediopet.

¹⁰Ka idiopet kotomon kanuka ŋinimerekek kotoma omerekekin ikanykaarei:

¹¹ Ka ekoroi ediopet araun ainakinet naka adiakaret; kogelara ainakinet naka adiakaret naka alucio, ka ainakinet naicweio naduc, ka ainakineteke naka akiria, ka ainakinetakec numatan.

¹² “Kapaaran nakitomonet kakany naka elap lokikanyetekaarei ejaun yes atukokinet nakalaunan; siriswamaete aswam naelaŋir, iricete epucit mama ejai EJAKAIT apaarasia akanykaarei:

¹³ Iinakinete ainakinet naicweio, ainakinet naeinakinere kakim, naka asakat naeuru saa mama ejai EJAKAIT; imoŋin lutoba itomon ka luuni, ka imerekekin iarei, ka imerekekin itomon ka luoŋon lukiliok luka ekaru ediopet; eraunos lumam eŋwalito:

¹⁴ka ainakinetekec naka akiria, akiria nuidicic nuinyalakinitai akinyet, iuni kotomon kanuka ŋolimoŋ lotobait, kotoma omoŋin lutoba lutomon ka luuni, ka iarei kotomon kanuka nolimerekek kotoma omerekekin iarei.

¹⁵Ka idiopet kotomon kanuka ŋinimerekek kotoma omerekekin lutomon ka luoŋon:

¹⁶Ka ekoroi ediopet araun ainakinet naka adiakaret; kogelara ainakinet naicweio naduc, ka ainakineteke naka akiria, ka ainakineteke namatat.

¹⁷“Kapaaran nakiareit da iinakinete imoŋin lutoba itomon ka luarei, ka imerekekin iarei, ka imerekekin itomon ka luoŋon lukiliok luka ekaru ediopet lumam eŋwalito:

¹⁸ Ka ainakinetekec naka akiria ka ainakinetakec numatan kanuka imoŋin lutoba, kanuka imerekekin, kanuka imerekekin ludidik da, kwape ejaar etiaikec, kwape ejaar aicorakinet:

¹⁹Ka ekoroi ediopet araun ainakinet naka adiakaret; kogelara ainakinet naicweio naduc, ka ainakineteke naka akiria, ka ainakinetakec numatan.

²⁰“Kapaaran nakiwuniet da, imoŋin lutoba itomon ka lodiopet, ka imerekekin iarei, ka imerekekin itomon ka luoŋon lukiliok luka ekaru ediopet lumam eŋwalito;

²¹Ka ainakinetekec naka akiria ka ainakinetakec numatan kanuka imoŋin lutoba, kanuka imerekekin, kanuka imerekekin ludidik da, kwape ejaar etiaikec, kwape ejaar aicorakinet:

²²Ka ekoroi ediopet araun ainakinet naka adiakaret; kogelara ainakinet naicweio naduc, ka ainakineteke naka akiria, ka ainakineteke namatat.

²³“Kapaaran nakiwoŋonet da, imoŋin lutoba itomon, ka imerekekin iarei, ka imerekekin itomon ka luoŋon lukiliok luka ekaru ediopet lumam eŋwalito:

²⁴Ainakinetekec naka akiria ka ainakinetakec numatan kanuka imoŋin lutoba, kanuka imerekekin, kanuka imerekekin ludidik da, kwape ejaar etiaikec, kwape ejaar aicorakinet:

²⁵Ka ekoroi ediopet araun ainakinet naka adiakaret; kogelara ainakinet naicweio naduc, ainakineteke naka akiria, ka ainakineteke namatat.

²⁶ “Kapaaran nakikanyet da, imoŋin lutoba ikanykaoŋon, ka imerekekin iarei, ka imerekekin itomon ka luoyon lukiliok luka ekaru ediopet lumam eŋwalito:

²⁷Ka ainakinetekec naka akiria ka ainakinetakec numatan kanuka imoŋin lutoba, kanuka imerekekin, kanuka imerekekin ludidik da, kwape ejaar etiaikec, kwape ejaar aicorakinet;

²⁸Ka ekoroi ediopet araun ainakinet naka adiakaret; kogelara ainakinet naicweio naduc, ka ainakineteke naka akiria, ka ainakineteke namatat.

²⁹“Kapaaran nakikanyetekape, imoŋin lutoba ikanykauni, ka imerekekin iarei, ka imerekekin itomon ka luoŋon lukiliok luka ekaru ediopet lumam eŋwalito:

³⁰Ka ainakinetekec naka akiria ka ainakinetakec numatan kanuka imoŋin lutoba, kanuka imerekekin, kanuka imerekekin ludidik da, kwape ejaar etiaikec, kwape ejaar aicorakinet;

³¹Ka ekoroi ediopet araun ainakinet naka adiakaret; kogelara ainakinet naicweio naduc, ainakineteke naka akiria, ka ainakineteke namatat.

³²“Kapaaran nakikanyetekaarei, imoŋin lutoba ikanykaarei, imerekekin iarei, ka imerekekin itomon ka luoŋon lukiliok luka ekaru ediopet lumam eŋwalito;

³³Ka ainakinetekec naka akiria ka ainakinetakec numatan kanuka imoŋin lutoba, kanuka imerekekin, kanuka imerekekin ludidik da, kwape ejaar etiaikec, kwape ejaar aicorakinet:

³⁴Ka ekoroi ediopet araun ainakinet naka adiakaret, kogelara ainakinet naicweio naduc, ainakineteke naka akiria, ka ainakineteke namatat.

³⁵ “Kapaaran nakikanyetekauni ejaun yes atukokinet nakayamakina: siriswamaete aswam naelaŋir.

³⁶Konye iinakinete ainakinet naicweio, ainakinet naeinakinere kakim naka asakat naeuru saa mama ejai EJAKAIT: emoŋ lotobait ediopet, ka emerekek ediopet, ka imerekekin ikanykaarei lukiliok luka ekaru ediopet lumam eŋwalito:

³⁷Ainakinetekec naka akiria ka ainakinetakec numatan kanuka emoŋ lotobait, kanuka emerekek, kanuka imerekekin ludidik da, ejaunos kwape ejaar etiaikec, kwape ejaar aicorakinet:

³⁸Ka ekoroi ediopet araun ainakinet naka adiakaret; kogelara ainakinet naicweio naduc, ka ainakineteke naka akiria ka ainakineteke namatat.

³⁹ “Iinakinete ŋun mama ejai EJAKAIT kopucinokus lueseunitai, kogelara aiyaposiokus, ka ainakinetakus nuka akote, araun ainakinetakus nuicweio, ka ainakinetakus nuka akiria, ka ainakinetakus numatan, ka ainakinetakus nuka ainapakin.”

⁴⁰ Kolimok Musa idwe luka Isirael kwape ajaatar kere nuabu EJAKAIT kicorak Musa.