Read Ebaibuli 1961 Aimario 31 Bible Online

Aimario 31 - Ebaibuli 1961 bible

Aimario 31

² “Kinyaŋ idwe luka Isirael kama ejaas Imidianin: akaulo kaŋun ŋes kiyanaarere jo mama ejaas ikonituŋa.”

³ Kolimok Musa ituŋa ebe, “Kokapanakisi icetuŋa kotomakus kanuka ejie, tetere elosete asurokin Midian, aitodol einyaŋane loka EJAKAIT mama ejai Midian.

⁴Ijukarete yesi ojie luka ŋiniteker elukumit, katekerin kere nuka Isirael.”

⁵Kwaŋin kolemunai kolukumin luka Isirael, luka ŋiniteker elukumit, kes ilukumin itomon ka luarei luakapakina kanuka ejie.

⁶ Kijuka Musa kes, luka ŋiniteker elukumit, ojie, kes ka Pinekas okoku loka Eleasar esasedoti, ojie, ajaas iboro luka aibois nakalaunan ka arupepen nuka elala akanike.

⁷ Kitijioto Midian, kwape kicorakinia EJAKAIT Musa; koarata da ŋolikiliokit.

⁸ Koarata ikabakan luka Midian nepepe kalueekec: Ebi, ka Rekem, ka Sur, ka Kur, ka Reba, ikabakan ikany luka Midian: koarata da Balaam okoku loka Beor kekileŋ.

⁹Kijoreosi idwe luka Isirael aŋor nuka Midian ka ikecedwe ludidik; koŋatasi da ibarenekec kere, ka isipaninikec kere, ka iborokec kere.

¹⁰Kicweata kakim ireriakec kere kotoma aiboisio nueboiononoto, ka iidukurunukec kere.

¹¹ Koyaŋaasi iŋatan kere, ka ideman kere, ituŋa ka itiaŋ da.

¹²Koyaut luejoreunitai, ka ideman, ka iŋatan, mama ejai Musa, ka Eleasar esasedoti, ka ekodet loka idwe luka Isirael, mama ejaas iidukurun apuutona nuka Moab nuejaas ariri naka Yorodan ko Yeriko.

¹³Koloto Musa ka Eleasar ka ikapolok kere luka ekodet, airiamun kakes kiŋa kiidukurun.

¹⁴Konyunyurik Musa ikeŋarenok luka ajore, ikapolok luka ilukumin ka ikapolok luka akwat, luapote kojie.

¹⁵ Kotema Musa kes atiar, “Ttaiarata kereka yesi aŋor kere?

¹⁶ Koany, apotu ŋun koinakis idwe luka Isirael adiakar kama ka EJAKAIT, kanuka ainerun naka Balaam, kakiro nuka Peor, kanuka ŋun da kojaun atular okodet loka EJAKAIT.

¹⁷ Aso do koara niniklliokit kodwe ludidik, koara da ŋiniberu naejeni ekiliokit kanuka apero kaŋes.

¹⁸Konye idwe lupesur, lumam ejenete ekiliokit kanuka apero kaŋes, kitajarata kanukus.

¹⁹ Kidukuroto yesi kiŋa kiidukurun apaarasia akanykaarei: ŋin yenaarit ituŋanan, ŋin da yenetirorit yenearitai, kitalaunos kapaaran nakiwuniet kapaaran da nakikanyetekaarei, yes ka ijoreunokus.

²⁰Italaunete da nininapiro, ka ŋin kere yeniswamatai kemukule, ka yeniswamatai kajulo nuka akinei, ka iboro kere luiswamatai kakiro.”

²¹Kolimok Eleasar esasedoti ikajiok lualosito ojie ebe, “Ŋol ŋes ekisil loka aicorakinet naecoraki EJAKAIT Musa:

²²Konye esabu, ka epuesa, ka aikomo, ka asua, ka adebe, ka asasin.

²³ Ŋinibore yenimam akim enyami, itotorioto akim, eraun yenelai; konye italaunio kakip nuitesegaarete: kere da yenepedori akim ainyam idomakinete akipi.

²⁴ Ilosete akusinapen kapaaran nakikanyetekaarei, iraunos da luilaete, akaulo kaŋun ilomarete oidukurun.”

²⁵Kotema EJAKAIT Musa atiar,

²⁶“Kimar iŋatan luanatunio, ituŋa ka itiaŋ da, ijo ka Eleasar esasedoti, ka ikapolok luka ikalia luka lukapapa luka ekodet:

²⁷ Kokorak da iŋatan toma atutubeta aareij mama ejaas ikajiok luepiiriaka kojie lualosito ojie, ka ekodet kere:

²⁸ Kitelem ikajiok lualosito ojie esolo kanuka EJAKAIT: idiopet kakwat akany, yenika ituŋa, ka aituk, ka asigiria, ka isipanin:

²⁹Kolem ŋes kotoma atutubetakec, koinak Eleasar esasedoti, araun ainakinet naedakakinitai naka EJAKAIT.

³⁰ Kotoma atutubet da naka idwe luka Isirael ilemuni ijo idiopet kotoma ninikaisakany, naka ituŋa, ka aituk, ka asigiria, ka isipanin, kes luka ibaren kere, koinak Ilebin, luidarete ewema lokalaunan loka EJAKAIT.”

³¹Kiswamata Musa ka Eleasar esasedoti kwape kicorakinia EJAKAIT Musa.

³²Iŋatan da, luedeunos koŋatan luayaŋaarete ikajiok, emwaasi amerekekin alukumin akwat akanykape ka alukumin akaisakanykaarei ka alukumin akany.

³³Aituk alukumin akaisakanykaarei ka alukumin aarei.

³⁴Asigiria alukumin akaisakanykape ka alukumit adiopet.

³⁵Ka ituŋa kere ilukumin akaisauni ka ilukumin iarei, luka apesur numam ajenete ekiliokit kanuka apero kaŋes.

³⁶Atutubet nakerai akorakiner naka ŋul kalualosito ojie, arai etiaike amerekekin alukumin akwat auni ka akaisauni ka nukanykaarei ka akwat akany:

³⁷ Esolo du loka EJAKAIT loka amerekekin kerai akwat akanykape ka akaisakanykaarei ka nukany.

³⁸Aituk da emwaasi alukumin akaisauni ka alukumin akanykape; kotoma kaŋun korai esolo loka EJAKAIT akaisakanykaarei ka nuarei.

³⁹Emwaasi asigiria alukumin akaisauni ka akwat akany; kotoma kaŋun korai esolo loka EJAKAIT akaisakanykape ka nadiopet.

⁴⁰Emwaasi ituŋa da ilukumin itomon ka lukanykape; kotoma kaŋul da korai esolo loka EJAKAIT ituŋa akaisauni ka luarei.

⁴¹ Koinak Musa Eleasar esasedoti esolo loarai ainakinet naedakakinitai naka EJAKAIT, kwape kicorakinia EJAKAIT Musa.

⁴²Atutubet naka idwe luka Isirael naatiakuni Musa kotuŋa luajiito,

⁴³(Atutubet da naka ekodet emwaasi amerekekin alukumin akwat auni ka akaisauni ka nukanykaarei ka akwat akany.

⁴⁴Ka aituk alukumin akaisauni ka alukumin akanykape.

⁴⁵Asigiria alukumin akaisauni ka akwat akany.

⁴⁶Ituŋa ilukumin itomon ka lukanykape);

⁴⁷Kotoma atutubet naka idwe luka Isirael, kolem Musa idiopet kotoma ninikaisakany, ituŋa ka itiaŋ da, koinak kes Ilebin luedarete ewema lokalaunan loka EJAKAIT: kwape kicorakinia EJAKAIT Musa.

⁴⁸Kikunyut ikeŋarenok luapolokinito ilukumin luka ajore, ikapolok luka ilukumin ka ikapolok luka akwat neejai Musa:

⁴⁹ Kolimokis Musa ebe, “Einara ikonikejaanakinak ikajiok lukidari isio, ido emamei yeneoliorit kasio.

⁵⁰ Kiyau da ainakinet naka EJAKAIT, luadumu ŋinituŋanan, iboro luka esabu, ka asua, ka aikomon, ka igilun, ka itetio, ka abwakai, alucio ikositauon kakonyen nuka EJAKAIT.”

⁵¹Kijaut Musa ka Eleasar esasedoti esabukec, ka lukisiro kere.

⁵²Esabu kere loka ainakinet naedakakinitai naainakinete EJAKAIT ikapolok luka ilukumin ka ikapolok luka akwat arai isekelin [22] itomon ka lukanykape ka akwat akanykaarei ka akaisakany,

⁵³ (Naarai ayanaarito ikajiok ideman, ŋinituŋanan ocoeke.)

⁵⁴ Kijaut Musa ka Eleasar esasedoti esabu loka ikapolok luka ilukumin ka luka akwat, koyaŋaut toma owema loka airiamunun, araun aisiitunet mama ejaas idwe luka Isirael kakonyen nuka EJAKAIT.