Read Ebaibuli 1961 Aimario 5 Bible Online

Aimario 5 - Ebaibuli 1961 bible

Aimario 5

¹Kotema EJAKAIT Musa atiar,

² “Kicorak idwe luka Isirael, ebe Kireŋeasi kiŋa kiidukurun ŋin yenikatapon, ka ŋin yeneleleete abulon arai aokot, ka ŋin da yenimam elai kanuka aidunyakin kayenikatwan:

³ Ireŋearete yenikiliokit ka yeniberu da kiŋa kiidukurun; kinyeis amunaun iidukurunukec, lueboienenei eoŋ kotoma.”

⁴Kiswamata idwe luka Isirael kwaŋin, kireŋeasi kes kiŋa kiidukurun: kiswamata idwe luka Isirael kwaŋin kwape atemaria EJAKAIT Musa.

⁵ Kotema EJAKAIT Musa atiar,

⁶ “Kolimok idwe luka Isirael ebe, Naediakaria etuŋanan arai aberu adiakaret kere naediakarete ituŋa, aibucar kaneejai EJAKAIT, kitelekarite ituŋanan ŋin akirot;

⁷ ŋes konyet elimoriata akecediakaret naadiakasi: ido egeli akediakaret kere, ka aiyatakin da ogelitike idiopet kokany, kosodi ainakin ŋol loediakarit ŋesi kamakeŋ.

⁸ Konye arai emamei lokatekerike loegelio kanuka adiakaret, egelit loegelio kanuka adiakaret itebeo EJAKAIT, ido eraun loka esasedoti; dimarai emerekek loka alucio, loelueere aronisike.

⁹ Ido ŋiniinakinet naikeunitai naka iboro kere lukalaunak luka idwe luka Isirael; nueinanakinete esasedoti, eraunos nukeŋ.

¹⁰ Iboro lukalaunak luka ŋinituŋanan eraunos lukeŋ: ŋinibore yerieinakini ŋinituŋanan esasedoti, eraun yenikeŋ.”

¹¹Kotema EJAKAIT Musa atiar,

¹² “Kolimok idwe luke Isirael ebe, Arai kepaa aberu naka etuŋanan, kosodi adiakar kamakeŋ.

¹³ Apero ketuŋanan, komam okilenike ejeni, komam ŋes da enicunitai, komunaun ŋesi, komam yeneanyunit ŋes adiakari, karaida aikamakin adiakareteke;

¹⁴ Kosodi emoyo loka ekokote abunokin okilenike, aitokokol ŋes, komunaun aberu: arai diat kobunok ŋes emoyo loka ekokote, aitokokol ŋes, komam aberu emunauna:

¹⁵ Ŋes konyet eyaŋaaria etuŋanan akeberu neejai esasedoti, eyaŋaaria da ainakinet kanuka aberuke, idiopet kotomon yenika epa [3] loka akiria nuka esairi; mam ebukokini akinyet, karaida ainyalakin lukesai toma; naarai erai ainakinet naka akiria naka ekokote, ainakinet naka akiria naka aisiitunet, aisiitunio numam adolit.

¹⁶ “Isukunyuni esasedoti aberu, ido itobwoi kakonyen nuka EJAKAIT.

¹⁷Kosodi esasedoti aitiŋ akipi nukalaunak kotoma atany; ibwaikini da toma akipi ŋun apua adis nuelemuni esasedoti kokwap kewema lokalaunan:

¹⁸Itobwoi da esasedoti aberu kakonyen nuka EJAKAIT, elacari da itim luka akou naka aberu, ido ibwaikini ainakinet naka akiria naka aisiitunet toma akanin nuka aberu, naerai ainakinet naka akiria naka ekokote: ejaunos toma akanin nuka esasedoti akipi nuka adwaris nueyaunete ekenit.

¹⁹Isiyapoi esasedoti ŋes, etemari da aberu atiar, ‘Arai mam ediotuŋanan kiteperit jo, ido arai mam jo ipaarit toma amamus aila, korai aberu naka ekiliokit, mam nukibeikinete jo kanuka akipi nu nuka adwaris nueyaunete ekenit.

²⁰Konye arai ipaarit, korai aberu naka ekiliokit, arai imunauna da, apero kecetunanan lomam erai okilenikon’:

²¹ Ŋes konyet isiyapoo esasedoti aberu aiyaposit naka ekenit, etemari esasedoti aberu atiar, ‘Kitarau jo EJAKAIT ekenit ka aiyapoet kotuŋakon, naitoonio EJAKAIT akonimurwo ka aitubuun akonikoik;

²² Ido akipi nu nueyaunete ekenit elomarete toma akoikikon itubuunete, iroonete da akonimurwo’: eboŋokini aberu da ebe, ‘Kikote nepenen, kikote nepenen.’

²³“Iwadikai esasedoti ikenito lu oitabo, ido emwatakini kes toma akipi nuka adwaris:

²⁴Itamasi aberu akipi nuka adwaris nueyaunete ekenit: ido elomarete akip nueyaunete ekenit tomake kosodete adwaruun.

²⁵ Ijauni esasedoti ainakinet naka akiria naka ekokote kakan naka aberu, iianari ainakinet naka akiria akonyen nuka EJAKAIT, kosodi ayaun otem:

²⁶ Emukuni esasedoti akan ileleba naka ainakinet naka akiria, araun aiituneteke, icweikini da kotem; ido akauloke itamasi aberu akipi.

²⁷ Kedau aitamat ŋes akipi, kosodi ejaun kwana, arai emunauna, kodiakarite kama kokilenike, elomarete akip nueyaunete ekenit tomake kosodete adwaruun, ebuuni akoikike, eoni da akemurwo: ido eraun aberu ekenit kotuŋake.

²⁸ Konye arai esegara aberu, komam emunauna; ŋes kito emameunotor nuebeikinete, ido epedori apotuun.

²⁹“Ŋol ŋes ekisil loka ekokote, arai kepaa aberu, kosodi amunaun, korai aberu naka ekiliokit;

³⁰Arai da kebunoki etuŋanan emoyo loka ekokote, aitokokol akeberu; ŋes konyet itobwoia aberu kakonyen nuka EJAKAIT, ido iswamakini esasedoti aberu kwape ejaar ekisil ŋol kere.

³¹ Mam etuŋanan itebeikino numam adolit, ibwoki aberu ŋin numam adoliteke.”