Read Ebaibuli 1961 Aimario 6 Bible Online

Aimario 6 - Ebaibuli 1961 bible

Aimario 6

¹ Kotema EJAKAIT Musa atiar,

² “Kolimok idwe luka Isirael ebe, Arai kiyapo ekiliokit arai aberu aiyaposit naitegelikina, aiyaposit naka Enasirit,[4] eipolia mama ejai EJAKAIT:

³ Ipoliauni da kotoma ebino ka nuitemerete; sirikemat ebino loedwar, karaida nuitemerete nueta ria, ido sirikemat akipi kere nuka emusabibu, karaida ainyam araito nuka emusabibu nuekokito arai nuitoonitai.

⁴Apaarasia kere nuka eipoliake sirikenyam ibore kere yenelomuni kotoma omusabibu, anyoun koeokat aitodol akabubuk.

⁵ “Apaarasia kere nuka aiyapositike naka eipolia, mam ebarenit icaki akouke: kiton naitodolio apaarasia nuka eipoliake mama ejai EJAKAIT, eraun lokalaunan, ipisi ŋesi itim luka akouke.

⁶ “Apaarasia kere nuipoliaunor mama ejai EJAKAIT mam ikunyakini neejai yenikatwan.

⁷ Sirikeraun lomam elai kanuka papake, karaida kanuka totoke, arai kanuka onaceke, arai kanuka inacike, naetwakiata: naarai eipoliake mama ejai Edeke ejai akouke.

⁸Apaarasia kere nuka eipoliake erai lokalaunan mama ejai EJAKAIT.

⁹ “Ido arai ketular ituŋanan kodieke, kosodi amunaun akou naka eipoliake; ŋes do ebarenoria akekou kapaaran naka aitalaunike, ebarenori kapaaran nakikanyetekaarei.

¹⁰ Ido kapaaran nakikanyetekauni eyauni ajeleik aarei, arai ilukei iarei ludidik, neejai esasedoti, okek loka ewema loka airiamunun:

¹¹Einakini esasedoti adiopet kanuka ainakinet naka adiakaret, ka nace da kanuka ainakinet naicweio, alucio ŋes, naarai adiaka kanuka yenikatwan, ido italauni akekou kapaaran kaŋin.

¹²Ipolia mama ejai EJAKAIT apaarasia nuka eipoliake, ido eyauni imerekek yenikiliokit yenika ekaru ediopet kanuka ainakinet naka adiakaret; konye epalunio apaarasiake nuageit, naarai abu eipoliake komunaun.

¹³ “Lo ŋes ekisil loka Enasirit, kedaunos apaarasia nuka eipoliake: eyaunio ŋes okek loka ewema loka airiamunun:

¹⁴ Ido einakini EJAKAIT ainakinet imerekek yenikiliokit yenika ekaru ediopet yenimam eŋwalit kanuka ainakinet naicweio, ka imerekek yeniberu yenika ekaru ediopet yenimam eŋwalit kanuka ainakinet naka adiakaret, ka emerekek lomam eŋwalit kanuka ainakineta nuka ainapakin.

¹⁵ Ka edita loka emugati lomam etubuunitoi, ka aluŋuren nuka akiria nuidicic nuinyalakinitai akinyet, ka imugatin luibenibena lumam itubuunitoi luinyonyoikinitai akinyet, ka ainakinetekec naka akiria, ka ainakinetakec numatan.

¹⁶Kosodi esasedoti aijaikin kes kakonyen nuka EJAKAIT, ido einakini ainakineteke naka adiakaret ka ainakineteke naicweio:

¹⁷Einakini da emerekek kanuka asubanit naka ainakineta nuka ainapakin mama ejai EJAKAIT, nepepe kedita loka emugati lomam etubuunitoi: einakini esasedoti ainakinet naka ituŋanan kaŋin naka akiria, ka ainakineteke namatat.

¹⁸ Ebarenori Enasirit akou naka eipoliake kokek loka ewema loka airiamunun, eyaŋaari da itim luka akou naka eipoliake, kosodi aibwaikin akim naka asubanit naka ainakineta nuka ainapakin.

¹⁹ Elemuni esasedoti akuat naka emerekek naipoo, ka aluŋuret namam etubuunitoi kotoma odita, ka emugati ediopet loibenibena, ijaikini akanin nuka Enasirit, kedau abaren akou naka eipoliake:

²⁰ Iianari esasedoti kes araun ainakinet naiianio kakonyen nuka EJAKAIT: eraas lu lukalaunak kama ejai esasedoti, nepepe katorob naijaŋio ka amurwo naedakakinitai: akaulo kaŋun epedori Enasirit aimat ebino.

²¹“Ŋol ŋes ekisil loka Enasirit loiyapoi, ka ainakineteke neejai EJAKAIT kanuka eipoliake, ka ice da luepedori ŋesi ainakin: kwape ejaar aiyapositike naiyapoi, kwape kwaŋin ibusakinitor ŋes aswam kwape ajaar ekisil loka eipoliake.”

²²Kotema EJAKAIT Musa atiar,

²³ “Kolimok Aaron ka odweke ebe, Ilipakinete idwe luka Isirael arereŋ kwanata; ilimokinete kes ebe.

²⁴ Kisirereŋ jo EJAKAIT, kidar jo:

²⁵ “Kitacaik jo EJAKAIT akekonyen, kiswamak asianut:

²⁶ “Kitonyoik jo EJAKAIT aica naka akonyeneke, kisinapik.

²⁷ “Ibwaikinete kwaŋin ekakiror odwe luka Isirael; EOŊ da esirereŋi kes.”