Read Ebaibuli 1961 Aimario 9 Bible Online

Aimario 9 - Ebaibuli 1961 bible

Aimario 9

¹ Kotema EJAKAIT Musa kamodiŋ naka Sinai, kolap losodit kokaru lokiareit akaulo kanyounikec kakwap nako Misiri atiar,

² “Bobo da ibus idwe luka Isirael aidar aleleŋio kapakike naeseunitai.

³Kapaaran nakitomonet kaoŋon naka elap kalo, idarete ŋes atiboŋ naka apakike naeseunitai: kwape ejaatar ikekisila kere, ido kwape ejaatar aicorakinetake kere, idarete ŋes.”

⁴Kolimok Musa idwe luka Isirael aidar alclenio.

⁵ Kidarete aleleŋio kotoma olap losodit, kapaaran nakitomonet kaoŋon naka elap, eboŋ, kamodiŋ naka Sinai: kwape ajaatar kere nuecorakinit EJAKAIT Musa, kiswamata idwe luka Isirael kwaŋin.

⁶ Ajaas ituŋa ice lumam alaete kanuka akuan naka etuŋanan lokatwan, kanuka ŋun mam apedorito aidar aleleŋio kapaaran kaŋin: kopotu mama ejai Musa ka Aaron kapaaran kaŋin.

⁷ Kotemasi ituŋa ŋul ŋes atiar, “Mam sio kilai kanuka akuan naka etuŋanan lokatwan: kanukinyo kirebokinitere sio, komam kicamakinitai ainakin ainakinet naka EJAKAIT kotoma apakike naeseunitai nepepe kidwe luka Isirael?”

⁸ Kotema kes Musa atiar, “Kidareutu; kapup ber nukecorakini EJAKAIT kanukus.”

⁹Kotema EJAKAIT Musa atiar,

¹⁰“Kolimok idwe luka Isirael ebe, Arai mam ituŋanan kayesi arai yenika aturiokus elai kanuka akuan nakatwan, ido arai ejai ituŋanan toma alosit naelwana, ibus ŋes aidar aleleŋio kama ka EJAKAIT;

¹¹ Idarete ŋes eboŋ kapaaran nakitomonet kaoŋon kotoma olap lokiareit; enyamete kimugatin lumam itubuunitoi ka edia loedwar.

¹² Sirikideut idiobore aitodol tupuruc, karaida aibil adiokoit: idarete kesi aleleŋio kwape ejaar ekisil kere.

¹³ Konye ituŋanan yenelai, komam ejai toma alosit, kosodi aiŋer aidar aleleŋio, egelario ituŋanan ŋin kotuŋake; naarai mam abu koinak ainakinet naka EJAKAIT kotoma apakike naeseunitai, ibwoki ituŋanan ŋin adiakareteke.

¹⁴ Ido arai kebu emoit aiboienen nepepe kayes, kosodi aidar aleleŋio kama ka EJAKAIT; kwape ejaar ekisil loka aleleŋio, ido kwape ejaar aicorakineteke, iswamai kwaŋin: ijaunos kekisil ediopet, yes kere, imoit ka iuriat.”

¹⁵ Kapaaran naebubukinere ewema lokalaunan korapia edou ewema lokalaunan, ŋes ewema loka aitejenunet: ido eboŋ kotakan kokuju kewema bala akim, aitodol tupuruc.

¹⁶ Kojaenena kwaŋin duc: korapianari ŋes edou paaran, kotakanunenei akim kuare.

¹⁷ Naelemanarere edou kokuju owema, akauloke konyounete idwe luka Isirael alosit: ido toma aibois naasiponokin edou, ŋina ŋes edukurenenete idwe luka Isirael.

¹⁸ Alosenenete idwe luka Isirael kaicorakinet naka EJAKAIT, ido edukurenenete da kaicorakinet naka EJAKAIT: eboienenete koidukurunukec adaun apak kere naajaar edou kuju owema lokalaunan.

¹⁹Ido naasalanakinia edou kuju owema lokalaunan apaarasia nuipu, edarenenete idwe luka Isirael akirot naka EJAKAIT, komam elosete.

²⁰ Acepakio ajaenena edou kuju owema lokalaunan apaarasia adis; kosodi kwape ajaar aicorakinet naka EJAKAIT eboienenete koidukurunukec, ido alosenenete kwape ajaar aicorakinet naka EJAKAIT.

²¹ Acepakio ajaenena edou kuju owema eboŋ aitodol tupuruc; naalemanarere edou tupuruc, alosenenete kesi: arai kerai paaran arai kuare, naalemanarere edou, alosenenete kesi.

²² Arai apaarasia aarei arai elap, arai ekaru, esalakinia edou kuju owema, iboie kanen, eboienenete idwe luka Isirael koidukurunukec komam elosete: konye naalemarere kolosete.

²³ Edukurenenete kaicorakinet naka EJAKAIT, ido alosenenete da kaicorakinet naka EJAKAIT: edarenenete akirot naka EJAKAIT, kaicorakinet naka EJAKAIT kama ka Musa.