Read Ebaibuli 1961 Mika 3 Bible Online

Mika 3 - Ebaibuli 1961 bible

Mika 3

¹ Abu katema atiar: Kopupokisi, keŋaiŋait, yes ikapolok luka Yakob, Ka ikayaitok luka ekek loka Isirael! Mere kereka nakus ajenun etube?

²Luisaeete ajokis, kominas aronis; Luibulucarete amunyinokec, Ka akiriŋikec alemar kakojokec;

³ Luinyamete akiriŋ naka ikatuŋa; Ijenete amunyinokec, ibilete akojokec: Eebo, irikirikete kes, kwape toma amot, Kwape akiriŋ toma atakwa.

⁴ Ŋes konyet emonyakiniata EJAKAIT, Konye mam ŋes eboŋokini kes: Eebo, ibwai ekereet kamakec kapak kaŋin, Naarai eswamata aronis kaswamisiokec.

⁵ Inera EJAKAIT kwanata nuka inabin luitapaarete ikatuŋa, Luiworoete ebe, “Ainapakin,” Arai kejaas kaluekonyete kikecekel: Konye ekapanakinos ejie kaŋol Lomam ibwaikini ibore aitukekec.

⁶ Kanuka ŋun eraun akuare mama ijaas, Komam aitapoet; Kimutonikis, komam idwarete. Elomari akoloŋ kama ejaas inabin, Kojesi da apaaran cucucuc kamakec.

⁷ Irumete ikadwarak ileic, Edakaros akwes nuka ikaroak; Eebo, ebunete kesi aitukekec: Naarai emamei aboŋokinet naka Edeke.

⁸ Konye abeit elelebun eoŋ agogoŋ, Ka Emoyo loka EJAKAIT, Ka etube, ka apedor da, Alimonokin Yakob aibucareteke, Ka Isirael da akeronis.

⁹Kopupokisi nu, keŋaiŋait, Yes ikapolok luka ekek loka Yakob, Ka ikayaitok luka ekek loka Isirael, Luilaete etube, Luitiriete nuitenara kere.

¹⁰Edukete Sion kaokot, Ka Yerusalem da kanumam adolit.

¹¹ Etubete lukapolokoke akiro kanuka ainakinet, Isisianakinete isasedotinike kanuka eropit, Edwarete inabinoke kanuka apesan: Konye egoŋakina neejai EJAKAIT ebalas ebe, “Mere ejai EJAKAIT kidiŋiwok? Mam aronis kidoikini oni.”

¹² Aso kanukus ŋes ekoriere Sion kwape emanikor, Eraun Yerusalem aapoŋor, Eroŋat da loka etogo Kwape aiboisio nuiceleleete nuka amagoro.