Read Ebaibuli 1961 Mika 5 Bible Online

Mika 5 - Ebaibuli 1961 bible

Mika 5

¹ Kwana itukokin korioŋeta, Ijo akoku naka moneta: Kirigau ŋesi sio asurokin: Inomete kesi ekatubon loka Isirael Kebela oitiny.

² Konye jo, Bet-lekem Epurata, Loidit ajaut toma okekia luka Yuda, Elomuni kotomakon kanukaŋ Etuŋanan loeraun ekayaiton loka Isirael; Alomanaretake ejaas ameun apeŋo, Ameun ikar lumam enaŋete.

³Kanuka ŋun ijaikini kes, Aitodol apak naidounio ŋin naeriebi: Kosodete luideunos luka ikeinacan Aboŋor mama ejaas idwe luka Isirael.

⁴ Ebwoi ŋesi, itadaki ekesipan kagogoŋ naka EJAKAIT, Kapolou naka ekiror loka EJAKAIT, Ekedeke: Iboienenete kesi; Naarai kwana eraun ŋesi loepol Kiton osaŋeta luka akwap.

⁵ Eraun etuŋanan ŋol ainapakiniwok: Naelomunia Eyasuriat akwapuwok, Naecakia ŋesi itogoiwok lukapolou, Kasodete oni aitonyoun ikecokok ikanykaarei, Ka ituŋa ikanykauni lukapolok asurokin ŋes.

⁶ Itisilete kesi akwap naka Asuria kekileŋ, Ka aiboisio nuelomarere nuka akwap naka Nimirod: Kiyuuni ŋesi oni kama ka Eyasuriat, Naelomunia ŋesi akwapuwok, Naecakia ŋesi kotoma oikoruwok.

⁷ Eraun aatoŋot naka Yakob kokidiŋ katekerin nuipu Kwape akopyo nuepote kama ejai EJAKAIT, Kwape elimilim neejaas anya; Lomam idareuni ituŋanan, Karaida aidareun idwe luka ituŋa.

⁸Eraun aatoŋot naka Yakob mama ejaas atekerin, Kokidiŋ kituŋa luipu, Kwape eŋatuny mama ejaas itiaŋ luka amagoro, Kwape iŋatuny mama ejaas isipanin luka amerekekin: Naitorio, icakacakai epoopooi, Emamei yeneyuuni.

⁹Kikiara akonikan kuju kalukediŋetakon, Komudiaros lukasurupokon kere.

¹⁰ Kosodi kanen, ebala EJAKAIT ebe, Kapaaran kaŋin agelari ibalasinikon kokidiŋikon, Amudiari agalinikon:

¹¹Agelari ireria luka akwapukon, Akesi ireriakon kere luegogoŋ.

¹²Agelari icudeta kakanikon; Mam bobo ijaunos kikadwarak:

¹³ Amudiari aputosiakon nuegerer, Ka ipirinokon kokidiŋikon; Mam bobo imai aswam naka akaninikon.

¹⁴Arutuni Aserimikon kokidiŋikon: Amudiari ireriakon.

¹⁵Etodoli eoŋ enyaŋit kanyunyura kaisiop Mama ejaas atekerin numam erimarito.