Read Ebaibuli 1961 Mika 6 Bible Online

Mika 6 - Ebaibuli 1961 bible

Mika 6

¹Aso kiirasi nuinera EJAKAIT atiar: Konyou, kopur kakonyen nuka imor, Kisiira iukon ekoniporoto.

² Kiirasi, yes imor, aŋolopa naka EJAKAIT, Ka yes da apeteta nuka akwap numam edaunos; Naarai ejai EJAKAIT aŋolopa ka iketuŋa, Epuri ka Isirael.

³ “Okwe ikatuŋa, kekonak eoŋ yes ai? Inyo gwai ketapasitor eoŋ yes? Koboŋokinoi!

⁴ Naarai abu ketonyou yes kakwap nako Misiri, Kalaku kotogo loka ebulesene; Kesiŋarenik yes Musa, ka Aaron ka Miriam.

⁵ Okwe ikatuŋa, kiitutu bo nueneruni Balak ekabaka loka Moab, Ka nuaboŋokini da Balaam okoku loka Beor; Kiitutu ageun koSitim kiton Giligal, Tetere ijenunete aswamisio nukadolit nuka EJAKAIT.”

⁶ “Abunari inyo akonyen nuka EJAKAIT, Kesudede kakonyen nuka Edeke loitelekarit kere? Ekunyakini kereka ŋes kainakineta nuicweio, Ka itak luka ekaru ediopet?

⁷ Itojoki kereka EJAKAIT imerekekin ilukumin, Arai icorin ilukumin itomon luka akinyet? Ainakini kereka eoŋ ikoku yenikiyai kanuka apaarika, Araito naka akuanaka kanuka aronis nakotauka?”

⁸Okwe etuŋanan, kipukok jo naejok; Inyo bo kiburai EJAKAIT, Mere aswam nuebeito, amin aitim, Alosit da kaitasono nepepe ka Ekonideke?

⁹Iworoi eporoto loka EJAKAIT mama ejai ere, Yenikacoa da eyoŋi ekonikiror: “Kopupokisi yesi ebela, ka loaseuni ŋes.

¹⁰Eroko kereka ejaas iboro luka akais nuipu luka aronis Kotogo loka ikaronok, Ka aitemis da naiŋoŋara naerai naketal?

¹¹ Asegara kereka eoŋ kajaas kainiŋisio nukaronok, Ka eriagi da loka aitemisio nukaiŋal?

¹²Naarai ileleba ikabarakake akaje, Esabanakinete luiboiete kotomake, Iŋalaete aŋajepakec kotoma aitukekec.

¹³Kanuka ŋun ŋes kenomia eoŋ jo kamusuŋut naerono noi; Ketisil jo kanuka aronisiokon.

¹⁴Inyami, konye mam imonanakin; Iworoori kotomakon; Ilemari, konye mam iyuuni; ŋul da luiyuuni ejaikini eoŋ ekileŋ.

¹⁵Iyei, konye mam isaki; Ipudapudai iseitunin, konye mam inyonyoikin akinyet; Icui emusabibu da, konye mam imasi ebino.

¹⁶ Naarai iricete ikisila luka Omiri, Ka aswamisio kere nuka ekek loka Akab; Ilosenenete kainerunikec: Tape ketuluor yes aapoŋor, Ka luiboiete kotoma eraunos aijuaret; Ibwokete amorosit naka ikatuŋa.”