Read Ebaibuli 1961 Mika 7 Bible Online

Mika 7 - Ebaibuli 1961 bible

Mika 7

¹ Wu okwe! Naarai asubit bala naedaunere atukokin araito nuka aiporo, Bala naedaunere aide emusabibu: Emamei aibuŋet naanyamat; Karaida etini loegeit akonore loimiela ekatau.

² Aolio ituŋanan yeneyoŋit Edeke kakwap, Emamei da yenitenara etau kotuŋa: Eperunete kere aiar; Emejai ŋinituŋanan onaceke keboi.

³ Ejaas akecekanin mama ejai aronis, Ekukuraka aswam; Ilipi ekapolon, ekoto ekatubon eropit; Ituŋanan loepol ŋes da inera nuka aiŋobel nakaronon nakotauke; Kwaŋin ewojiete nepepe.

⁴Loejok kakesi erai ekodokodoi; Loitenara aitelekar luce erono kwape abwas naka ikukwa. Adolu apaaran naka ikedarakakon, ŋes aiticaniokon; Kwana ebuonokinos.

⁵Sirikimunokinos ipaper, Sirikigoŋakinos ekeŋarenon; Kidar ikekia luka aitukukon Kaneejai ŋin naeperi atorobukon.

⁶ Naarai itisili okoku papake, Enyoikini akoku totoke, Aberu naka okoku eluikini tataake; Lukasurupo luka ituŋanan kes ituŋa lukokaleke.

⁷Konye kanukaŋ, aseseni eoŋ EJAKAIT; Edareuni Edeke loka aitajarioka; Kapupok Ekadeke eoŋ.

⁸ Sirikibwoŋ kanukaŋ, ijo lokasurupika; Arai kebiror, anyouni; Naeboikinor amuton, Eraun EJAKAIT aica kamakaŋ.

⁹Atitiŋikini anyunyura naka EJAKAIT, Naarai adiaka kamakeŋ: Aitodol nekapurokinia akakirot, Itodolikini eoŋ etube, Ketolomuni eoŋ toma aica; Aanyuni da akedolit.

¹⁰Kosodi nakasurup aanyun ŋun, Koraparito ileic nakabala eoŋ ebe, “Ai bo ejai EJAKAIT Ekonideke?” Elakara akakonye aanyun ŋin; Ipudapudao ŋes kwape erit lokorotin.

¹¹Apaaran naka aiduk arwatatinikon! Kapaaran kaŋin italalaario eikorukon.

¹²Kapaaran kaŋin epote mama ijai Anyoun koAsuria ka ireria luko Misiri, Anyoun koMisiri da kiton Ocor, Anyoun kaŋolol kiton aŋolol, Koroŋat da kiton oroŋat.

¹³Konye esilior akwap kanuka ŋul kaluiboiete kotoma, Kanuka araito nuka aswamisiokec.

¹⁴ Kitadak ikonituŋa kebelakon, Esipan loka airumetekon, Luiboiete ileŋokino, Toma amagoro kidiŋ ka Karumel; Kodakasi kesi toma Basan ka Gilead, Kwape kapaarasia nupeŋo.

¹⁵Kwape kapaarasia nuilomunia ijo kakwap nako Misiri Etodikini ŋes akiro nukaumokin.

¹⁶ Eanyunete atekerin, irumete ileic, Kanuka agogoŋukec kere: Ebunete aitukekec, Imaiinikinos akiikec.

¹⁷Emeorete apua kwape kemun; Elomunete emaranete kaiboisiokec nuŋopis, Kwape lueliatos kakwap: Epote kaiyoŋ mama ejai EJAKAIT Ewokodeke, Ekuriakaros kanukon.

¹⁸ Iŋai bo Edeke loiputos kajo, Loisioniei numam adolit, Loinaci aibucar naka aatoŋot naka airumeteke? Mam enyunyuranakinenei ikar kere, Naarai isiyalamikinit aitim.

¹⁹ Ibelokin bobo ŋesi, itimi; Icakacakai numam adolitewok kokwap kakejeneke. Icakari ijo aronisiokec kere ataro naka aŋolol.

²⁰ Itodolikini abeit mama ejai Yakob, Ka aitim da mama ejai Aburaam, Nuibu kiyapoik lukapapaakos Ameun kapaarasia nupeŋo.