Read Ebaibuli 1961 Kabakuk 1 Bible Online

Kabakuk 1 - Ebaibuli 1961 bible

Kabakuk 1

¹Abwokon naabu Kabakuk enabi koany.

² Wu EJAKAIT, etodoli eoŋ ai aimony, Komam jo ipupuni? Eworo mama ijai nuka akaje, Komam jo itajari?

³Kanukinyo kitodikinia eoŋ numan adolit, Asesen ameŋeranut? Naarai ejai amudiar ka akaje kakonyeneka: Ejai da epeget, elomuni do aŋolopa.

⁴ Kanuka ŋun ŋes etapalunere ekisil, Mam etube da elomununei: Naarai irigauni ikaronon ikadoliton; ŋes elomununia etube lomagul.

⁵Koanyutu yesi kotoma atekerin, Kosesenete, koumokis noi: Naarai eswamai eoŋ aswam kapaarasiakus, Namam iyuunete karaida kilimonokinitai.

⁶ Naarai koany, etonyouni Ikaludean, Ateker ŋin naededeŋ, naedodoro; Eracaete aitor alalau naka akwap, Airum aiboisio nuiboikinos numere nukec.

⁷Eraas luesogim ka luketasuro: Elomuni etubekec ka apoloukec kama kikulepek.

⁸ Etiroko ibalasinikec aitelekarit irisai, Ededeŋ aitelekarit ipeen lukeboŋ; Igararaete ikebwanenokokec, Eebo, epote ikebwanenokokec kama elwana; Eporitos bala emorukaalet loerurukit ainyam.

⁹Epote kesi kere kanuka akaje; Iŋarenikinit kes etasuro. Etukonokinete lukijoreoro kwape kasiŋe.

¹⁰Eebo, isekelete kesi ikabakan, Emwaŋio ikapolok kamakec. Emwaŋete kesi ŋiniibois naegogoŋ; Naarai etukonokinete apua, irumete.

¹¹Kosodete amotar kwape kekwam, Etuboros, luegwaunito akiro: Akecegogoŋ ŋes ekecedeke.

¹²Wu EJAKAIT Ekadeke, Ekalaunanika, Mam kereka jo ijai ageun apeŋo? Mam sio kitwaki. Wu EJAKAIT, ibu kicorak kes kanuka etube; Ijo da, wu Atiiba, itieata kes kanuka alecor.

¹³Irai ijo loka akonye nuesegaara numam esesenete aronis, Mam ipedori aite ameŋeranut, Kanukinyo iteio ijo ŋul luebilakinete ebotet, Ililiŋia da nailikoria ikaronon ituŋanan yenedolit aitelekarit ŋes?

¹⁴Ituluori ituŋa kwape agaria nuka aŋolol, Kwape lueliatos, luemameete ekayaitonikec.

¹⁵Ikami kes kere kegolu, Eloki kes karujake, Etukonokini kes oboike: Ŋes ibwoŋar, kiyalamikin da.

¹⁶Kanuka ŋun ŋes einakinia asuban mama ejai arujake, Isupurikini eboike lukisupurununo; Naarai kanukec ebur ewaike, epu inyamatake.

¹⁷Aso do ebukenenei kereka lukoboike, Mam inyeini aiar atekerin tiritir?