Read Ebaibuli 1961 Sepania 1 Bible Online

Sepania 1 - Ebaibuli 1961 bible

Sepania 1

¹ Akirot naka EJAKAIT naabu kobu mama ejai Sepania okoku loka Kusi, okoku loka Gedalia, okoku loka Amaria, okoku loka Kesekia, kapaarasia nuka Yosia okoku loka Amon, ekabaka loka Yuda.

²Ebala EJAKAIT ebe, “Etanaŋi cut iboro kere kakwap.”

³Ebala EJAKAIT ebe, “Etanaŋi ituŋanan ka itiaŋ; Etanaŋi akweny nuka apak, ka iboro lukecor, Ka luitiguikinete nepepe ka ikaronok; Amudiari da ituŋanan kakwap.

⁴ Ariori akakan mama ejai Yuda, Ka luiboiete koYerusalem kere; Amudiari aatoŋot naka Baal kaibois kana, Ka ekiror da loka isasedotin luemaete aputosia;

⁵ Ka ŋul da luemaete ajore naka akuj Koswion luka itogoi; Ka ŋul luemaete, luiyapoikinete mama ejai EJAKAIT, Iyapoikinete da elimito Malakam;

⁶Ka ŋul da luaboŋosi anyoun katupit EJAKAIT: Ka ŋul da lumam apotu komoata EJAKAIT, Karaida aiŋit nuke.”

⁷Kililiŋ kakonyen nuka Ejakait EDEKE: Naarai eapie apaaran naka EJAKAIT: Naarai etemoki EJAKAIT asubanit, Etalau da ikepejok.

⁸Kosodi kanen ejaun kapaaran naka asubanit naka EJAKAIT, “Eticani eoŋ ikapolok, ka odwe luka ekabaka, Ka ŋul kere luenapitos anapito numo.

⁹Kapaaran kaŋin eticani eoŋ ŋul kere luilamete ekek, Luilelebete etogo loka ejakaitikec akaje ka aiŋal.”

¹⁰ Ebala EJAKAIT ebe, “Kapaaran kaŋin ejaun ecelet loka aimony Naebuni korute loka Agaria, Ka aibwolol kari nakiareit, Ka aigugururunun koukon.

¹¹ Kibwololoto yesi luiboiete koMakatcs, Naarai amudiaros ituŋa kere lukagwelanarak: Ŋul kere luigugunatos kepuesa agelaros.

¹² Kosodi kanen kapak kaŋin Aŋici eoŋ Yerusalem kakalasia; Eticani ituŋa luaburokoros kanuka adakaikec, Luebalas kotauonokec ebe, ‘Mam EJAKAIT iswamai nuejok, Karaida aswam nueroko.’

¹³ Eraun do abarakec amejauna, Ikecetogoi da amejei, Eebo, edukete itogoi, Konye mam iboikinos toma; Iraete imanikoria luka emusabibu, Konye mam emasete ebinoke.”

¹⁴ Eapie apaaran nakapolon naka EJAKAIT, Eapie, iwonyunit noi, Ŋes eporoto loka apaaran naka EJAKAIT; Emonyi noi etuŋanan lokirigi kanen.

¹⁵Apaaran ŋin ŋes apaaran naka anyunyura, Apaaran naka ican ka aburun, Apaaran naka asilio ka ameje, Apaaran naka amuton ka ajikilil, Apaaran naka idouon ka amuton naejesi cucucuc.

¹⁶ Apaaran naka arupepe ka elulu, Aluikin ireria luebwaitai, Aluikin da itogoi lukagogoŋok lueojak.

¹⁷Ayauni eoŋ aburun otuŋa, Tetere elosete bala imudukiok, Naarai adiakasi kama ejai EJAKAIT: Ebukoros aokotokec bala apua, Akiriŋikec da bala aoret.

¹⁸ Mam epedori epuesakec karaida esabukec aitajar kes Kapaaran naka anyunyura naka EJAKAIT, Konye idoporo akwap kere kakim naka ekoloke; Naarai itanaŋi, eebo, itanaŋi ketasuro Ŋul kere luiboiete kakwap.