Read Ebaibuli 1961 Kagai 2 Bible Online

Kagai 2 - Ebaibuli 1961 bible

Kagai 2

¹Kokaru lokiareit loka ekabaka Dario, kolap lokikanyetekaarei, kapaaran naka akaisaarei kanadiopet naka elap, kobu akirot naka EJAKAIT mama ejai Kagai enabi ebe,

²“Kolimok Serubabel okoku loka Sealutiel, ekayaiton loka Yuda, ka Yosua okoku loka Yekosadak, esasedoti lopeti, ka luedeuna kotuŋa ebe,

³ ‘Iŋai bo esalit kayesi loabu koanyunite etogo lo kaibusesuke nasek? Etakani kwana biai kamakus? Mere esubit kakonyenekus bala ibore yenitai?’

⁴ Konye ebala EJAKAIT ebe, Kogogoŋior, ijo Serubabel; kogogoŋior, ijo Yosua, okoku loka Yekosadak, esasedoti lopeti; kogogoŋioros, yes ituŋa kere luka akwap; ebala EJAKAIT ebe, Kiswamata: naarai ebala EJAKAIT loka ajoresio ebe, Ajai eoŋ kayes,

⁵ kwape ajaar akirot naabu ketutukik yes nailomuniata koMisiri, iboienenei ekamoyo kotomakus: sirikikuriakaros.

⁶ Naarai inera EJAKAIT loka ajoresio kwanata ebe: Irwan atipet bobo, apak naedit, ejaŋakini akuj, ka akwap, ka aŋolol, ka akwap naeonit;

⁷ ejaŋijaŋi atekerin, epote iboro luimielas atekerin kere: ebala EJAKAIT loka ajoresio ebe, Elelebi aibuses togo lo.

⁸Ebala EJAKAIT loka ajoresio ebe, Erai epuesa ekaŋ, esabu da ekaŋ.

⁹ Ebala EJAKAIT loka ajoresio ebe, Aibuses naka etogo kalo nakoiŋaren itelekari nasek: Ebala EJAKAIT loka ajoresio ebe, Esinapikini aibois na,”

¹⁰Kapaaran naka akaisaarei ka nuoŋon kolap lokikanyetekaoŋon, kokaru lokiareit loka Dario, kobu akirot naka EJAKAIT mama ejai Kagai enabi ebe,

¹¹ “Inera EJAKAIT loka ajoresio kwanata ebe: Kiŋit cani isasedotin nuka ikisila ebe,

¹²‘Arai kitiŋ ituŋanan akiriŋ nakalaunan katwele naka egoeke, kotiroria emugati, arai atap, arai ebino, arai akinyet, arai akiriŋ kere katweleke, araun kereka ŋin yenikalaunan?’ ” Koboŋokis isasedotin ebe, “Mam.”

¹³ Kosodi Kagai atemar atiar, “Arai ketiro yenimam elai kanuka akuan nakatwan idiopet koboro kaŋul eraun kereka ŋin yenimam elai?” Koboŋokis isasedotin atiar, “Eraun yenimam elai.”

¹⁴ Kosodi Kagai aboŋokin ebe, “Ebala EJAKAIT ebe, Ikote nen ituŋa lu, ikoni da nen ateker na kakonyeneka; ikoni nen ŋiniswam naka akaninikec; ŋin yeneinakinete kaŋina erai yenimam elai.

¹⁵ Aso do, keŋaiŋait, koomoomata nuejaunete amear kapaaran kana ape. Eroko idokokino amoru kuju amoru koyekalu loka EJAKAIT: ipotu kojaas biai?

¹⁶Ameun kapaki kaŋin kere, naabunio ituŋanan atukit naka aitemisio akaisaarei, emwaasi do atomon bon; naabunio ituŋanan acues naka ebino aokun amotii akaisakany, emwaasi do akaisaarei bon.

¹⁷ Ebala EJAKAIT ebe, Abu kadany yes kaitukub, ka airouroun, ka akaka da kotoma aswamisio kere nuka akaninikus; konye mam ipotu kibeleunos mama ajai.

¹⁸ Keŋaiŋait, koomoomata amear kapaaran kana ape, amear kapaaran naka akaisaarei ka nuoŋon naka elap lokikanyetekaoŋon. Amear kapaaran naasipokinere apetetait naka eyekalu loka EJAKAIT, koomoomata:

¹⁹eroko kereka ikinyom ejaas odula? Eroko teni mam erai emusabibu, ka etini, ka ekamamaga ka eseituni? Kesirereŋi yes ameari lolo.”

²⁰Kobu akirot naka EJAKAIT irwan nakiareit mama ejai Kagai kapaaran naka akaisaarei ka nuoŋon naka elap ebe,

²¹ “Kolimok Serubabel, ekayaiton loka Yuda ebe, Ejaŋijaŋi akuj ka akwapin:

²² abuburiari eicoloŋ loka ajakanuto; amudiari agogoŋ naka ajakanuto nuka atekerin; abuburiari agalin, ka ŋul da luiboiete kotomakec; ibiroros abalasin ka lukebwanenokokec, ŋinituŋanan kekileŋ loka onaceke.

²³ Ebala EJAKAIT loka ajoresio ebe, Kapaaran kaŋin kayaŋaari jo, Serubabel ebulesitika, okoku loka Sealutiel; Ebala EJAKAIT ebe, Ketuluori jo egilut lokipucet, Ebala EJAKAIT loka ajoresio ebe, Naarai kaseu jo.”