Read Ebaibuli 1961 Sekaria 1 Bible Online

Sekaria 1 - Ebaibuli 1961 bible

Sekaria 1

¹ Toma olap lokikanyetekauni, kokaru lokiareit loka Dario, kobu akirot naka EJAKAIT mama ejai Sekaria okoku loka Berekia, okoku loka Ido, enabi, kobala ebe,

²“Anyunyuriki noi EJAKAIT lukapapaakus.

³ Kanuka ŋun kolimok kes ebe, Inera EJAKAIT loka ajoresio kwanata ebe: Ebala EJAKAIT loka ajoresio ebe, Koboŋutu neajai eoŋ, Ebala EJAKAIT loka ajoresio ebe, Eoŋ da aboŋuni mama ijaas.

⁴ Sirikiputokinos kalukapapaakus, luamonyanakinete inabin lusek mamakec ebe, ‘Inera EJAKAIT loka ajoresio kwanata ebe, Koboŋutu ca yesi anyoun koponesiokus lueroko, ka aswamisiokus da nueroko.’ Konye ebala EJAKAIT ebe, Mam apotu kopuput, karaida akiirar eoŋ.

⁵Ai bo ejaas lukapapaakus? Inabin da, ejarenenete kereka kesi ikar kere?

⁶ Konye akakiro ka ikakisila luecorakinit ikakejaanakinak inabin, mam kes apotu kodolokis lukapapaakus? Kibelokis kotemasi atiar, Kwape keomitor EJAKAIT loka ajoresio aiswamakin oni, kwape ejaatar iponesiowok, kwape ejaatar da aswamisiowok, abu kiswamak oni kwape kwaŋin.”

⁷Kapaaran naka akaisaarei ka nuoŋon naka elap lokitomonet ka lodiopet, ŋes elap Sebat, kokaru lokiareit loka Dario, kobu akirot naka EJAKAIT mama ejai Sekaria okoku loka Berekia, okoku loka Ido, enabi. Kobala Sekaria ebe,

⁸ “Abu kaany kuare, ido koany, etuŋanan ibwanenit ebalasit lokareŋan, kobwo ŋesi kaneajaas ikito luka ekadas luajaas ajesa; kauke da ajaas ibalasin lukareŋak, ka lukomolik, ka lukakwaŋak.

⁹Kasodi atemar ebe, ‘Wu ekajakait, inyoika bo lu?’ Kabala emalaika lokinera keoŋ ebe, ‘Etodikini jo kwape ejaatar.’

¹⁰ Koboŋok etuŋanan loabwoi neejaas ikito luka ekadas kotema atiar, ‘Lu kes luejukarit EJAKAIT alosit lailo ka laije kakwap.’

¹¹ Koboŋokis kesi emalaika loka EJAKAIT loabwoi neajaas ikito luka ekadas, kotemasi atiar, ‘Kipou kaloto lailo ka laije kakwap, ido koany, iboie akwap kere iyamakina.’

¹² Kosodi emalaika loka EJAKAIT aboŋokin ebe, ‘Wu EJAKAIT loka ajoresio, itodoli ai mam itimi Yerusalem, ka ireria luka Yuda, luinyunyurikinit ijo ikar lu akaisakanykaarei?’

¹³ Koboŋok EJAKAIT emalaika lokinera keoŋ kakiro nuejok, kes akiro nuitalakarete.

¹⁴ Katema do emalaika lokinera keoŋ ebe, ‘Kiworo ijo ebe, Inera EJAKAIT loka ajoresio kwanata ebe: Ekokotikin noi Yerusalem ka Sion kekokote loepol.

¹⁵ Anyunyurik noi atekerin nuebwalara; naarai abu kanyunyurikin edit, kiyatakis kesi aiticanet.

¹⁶ Kanuka ŋun inera EJAKAIT kwanata ebe: Aboŋu eoŋ Yerusalem kaitim; ebala EJAKAIT loka ajoresio ebe, Edukokinio nen ekatogo, eriorio auno nakitemis ko Yerusalem.

¹⁷ Kiworo bobo ebe, Inera EJAKAIT loka ajoresio kwanata ebe: Ilaparos bobo ireriaka kanuka akerianut; italakari bobo EJAKAIT Sion, eseuni bobo Yerusalem.’ ”

¹⁸Keteluo akakonye kete, ido koany, amumwar aoŋon.

¹⁹ Katema emalaika lokinera keoŋ atiar, “Anyoika bo nu?” Kaboŋok ebe, “Nu kes amumwara nukisiarisiarete Yuda, ka Isirael, ka Yerusalem da.”

²⁰Ketodik EJAKAIT eoŋ ikatatak iwoŋon.

²¹ Kasodi atemar ebe, “Anyoika nueponitos lu aswam?” Kiner ebe, “Nu kes amumwara nukisiarisiarete Yuda, tape emameun ituŋanan yenitonyouni akouke: konye eponito lu aitukurian kes, aiket amumwara nuka atekerin nuadakakis amumwarakec akwap naka Yuda aisiarisiar ŋes.”