Read Ebaibuli 1961 Sekaria 10 Bible Online

Sekaria 10 - Ebaibuli 1961 bible

Sekaria 10

¹ Kilipa yesi EJAKAIT akiru Kapak naka akiru nakiloboet, Ŋes EJAKAIT loesubi aimiliaununeta; Einakini ŋesi kes ilimilimia luka akiru, Ŋinituŋanan ikui komanikor.

² Naarai eneras iterapim [4] aamameak, Apotu ikadwarak koanyutu aimod; Apotu ikerujak kolimokis airujasia nukaiŋal, Italakarete atai. Kanuka ŋun ŋes epaariata ituŋa kwape amerekekin; Iticanio naarai emamei ekecokon.

³ “Enepu anyunyuraka aluikin ikecokok, Eticani ikorwa: Naarai aanyana EJAKAIT loka ajoresio esipanike, ekek loka Yuda, Itarauni kes kwape ekebalasit loejok kojie.

⁴ Elomuni kamakec amoru naka agor, Kamakec eloit, kamakec akabwa naka ejie, Kamakec da ŋolikayaiton.

⁵Eraunos bala ituŋa lukirigin, Icakacakaete lukasurupokec korit loka irotin kojie; Ejiosi, naarai ejai EJAKAIT kakes: Isurumete ikebwanenok ibalasin ileic.

⁶“Etogogoŋi eoŋ ekek loka Yuda, Etajari da ekek loka Yosep. Enyakuni kes, naarai etimi kes; Eraunos bala mam eoŋ ereŋearit kes; Naarai arai eoŋ EJAKAIT Ekecedeke, eirari kes.

⁷Eraunos luka Epuraim kwape etuŋanan lokirigi, Elakara ikecetauon kwape luelakara kanuka ebino. Eebo, eanyunete ikecedwe ŋun, elakaros: Iyalamikinos ikecetauon kotoma EJAKAIT.

⁸ “Einyuni kes, atukonokini kes; Naarai alaku kes: Iyatanakinos kwape kolo eyatanakinototor.

⁹Karaida abu kesiarisiar kes kotuŋa; Keitunete kesi eoŋ kakwapin nuelwaka: Ebusete nepepe kidwekec, eboŋunete.

¹⁰ Enyakuni kes bobo anyoun kakwap nako Misiri, Atukonokini kes koAsuria; Etolomuni kes akwap naka Gilead ka Lebanon; Komam akwap ilosikini kes.

¹¹ Itorete kesi aŋolol naka aiticanitoi, Inomio akailan nuka aŋolol, Eokete ataroi kere nuka Nile. Itisilio eitur loka Asuria, Enyouni da ebela loka ajakanut nako Misiri.

¹²Etogogoŋi eoŋ kes kotoma EJAKAIT, Ebala EJAKAIT ebe, Irimete kokirorike.”