Read Ebaibuli 1961 Sekaria 2 Bible Online

Sekaria 2 - Ebaibuli 1961 bible

Sekaria 2

¹ Keteluo akakonye kete, ido koany, etuŋanan loitiŋit auno nakitemis kakanike.

² Kasodi atemar ebe, “Ai bo ilosi ijo?” Katema ŋesi eoŋ atiar, “Aitem Yerusalem, aanyun alalauke, ka aojauke da.”

³Ido koany, koloma emalaika lokinera keoŋ, kolom ecemalaika aisiriamar ŋes.

⁴ Kotema ŋes atiar, “Koker, kinera kekatumunan kaŋol ebe, ‘Ejaunos luiboiete ko Yerusalem kwape koreria lumam ebwaitai, kanuka aipues naka ituŋa ka ibaren kotoma.

⁵ Naarai ebala EJAKAIT ebe, Araun eoŋ arwatat naka akim airimor ŋes, araun da aibuses kidiŋike.’ ”

⁶ Yesi ba, ebala EJAKAIT ebe, Yesi ba, kokerata anyoun kakwap naka agolitomei: naarai ebala EJAKAIT ebe, Kesiarisiari yes kwape kikwamin iwoŋon luka akuj.

⁷Ijo ba, Sion, koyuun bon, ijo loiboiete kakoku naka Babulon.

⁸ Naarai inera EJAKAIT loka ajoresio kwanata ebe: Akaulo kaibuses abu kejuk eoŋ mama ejaas atekerin nukiŋatarito jo: naarai ŋin yenikitirori jo etirorit ecopot loka akoŋuke:

⁹“Naarai, koany, elakilaki akakan kamakec, eraunos amejei mama ejaas ŋul luejaanakinete kes. Ijenunete do ebe kejuku EJAKAIT loka ajoresio eoŋ.

¹⁰ Koye, kolel, ijo akoku naka Sion; naarai ebala EJAKAIT ebe, Koany, abuni, eboikini mamakon.

¹¹ Imorikikinos atekerin nuipu mama ejai EJAKAIT kapaaran kaŋin, eraunos ikatuŋa; eboikini mamakon, ijenunete do ebe kejuku EJAKAIT loka ajoresio eoŋ mamakon.

¹² Irumi EJAKAIT Yuda bala ewaike kakwap nakalaunan, eseuni bobo Yerusalem.”

¹³ Kililiŋata, awat kere, kakonyen nuka EJAKAIT: naarai akwenyu ŋesi anyoun kaiboisike nakalaunan.