Read Ebaibuli 1961 Sekaria 8 Bible Online

Sekaria 8 - Ebaibuli 1961 bible

Sekaria 8

¹Kobu akirot naka EJAKAIT loka ajoresio mama ajai ebe,

² “Ebala kwanata EJAKAIT loka ajoresio ebe: Ekokotikin Sion kekokote loepol, ekokotikin ŋes kanyunyura naepol.

³ Inera EJAKAIT kwanata ebe: Aboŋuni eoŋ Sion, eboienenei kokidiŋ Yerusalem: emaikinio Yerusalem Ere loka abeit: ka eroŋat da loka EJAKAIT loka ajoresio Eroŋat lokalaunan.

⁴ Inera kwanata EJAKAIT loka ajoresio ebe: Iboienenete imakio ka amakio bobo korotin luka Yerusalem, kitiŋite ŋinituŋanan ebelake loitabia kakanike naarai amojoŋ noi.

⁵Ilelebunos irotin luka ere itelepai ka apesur koboliasi korotinike.

⁶ Inera kwanata EJAKAIT loka ajoresio ebe: Arai erai nakaumokin kakonyen nuka aatoŋot naka ituŋa kalu kapaarasia kanu; ebala EJAKAIT loka ajoresio ebe, Tikeraun nakaumokin da kakonyeneka?

⁷Inera kwanata EJAKAIT loka aloresio ebe: Koany, Etajari ikatuŋa anyoun kakwap nakokide, kakwap nakoto da:

⁸ ayauni kes, iboienenete kokidiŋ Yerusalem; eraunos kesi da ikatuŋa, eoŋ da araun Ekecedeke, kotoma abeit ka adolit da.”

⁹ Inera kwanata EJAKAIT loka ajoresio ebe: “Kogogoŋoto akusikanin, yes luipupete kapaarasia kanu akiro nu nuepote kaituke nuka inabin, luajaas kapaaran naapesikinere apetetait naka etogo loka EJAKAIT loka ajoresio, tetere edukio eyekalu.

¹⁰Naarai eriŋa kedolo apaarasia ŋun amamei eropit loka ituŋanan, karaida eropit loka etiaŋ; amamei da ainapakin ŋol loaloman ka loalomuni kanuka lokasurup: naarai abu ketuluik ŋinituŋanan kekeidunyet.

¹¹Konye ebala EJAKAIT loka ajoresio ebe, Mam kwana ekoni nen mama ejai aatoŋot naka ituŋa lu kwape kapaarasia nukoloŋo.

¹² Naarai ejaunos ikinyom luka ainapakin; einakini emusabibu araitoke, einakinete alup amiokec, einakini da akuj akopyoke; esurumi da aatoŋot naka ituŋa kalu iboroŋul kere.

¹³ Kosodi kanen, kwape kiraar ekenit kotoma atekerin, ijo ekek loka Yuda ka ekek loka Isirael, ketajari do yes kwaŋin, iraunos yesi arereŋ. Sirikikuriakaros, konye kogogoŋoto do akusikanin.”

¹⁴ Naarai inera kwanata EJAKAIT loka ajoresio ebe: “Kwape abu kaomitor aiswamakin yes aronis naketunyunyurikinitotor lukapapaakus eoŋ, ebala EJAKAIT loka ajoresio ebe, ido mam abu keitu;

¹⁵ kwape kwaŋin kapaarasia kanu abu kaomite aiswamakin Yerusalem ka ekek loka Yuda ajokis: sirikikuriakaros.

¹⁶ Nu kes akiro nuiswamaete; kinerasi yesi ŋinituŋanan abeit mama ejai ikeidunyet; kitodolenenete etube loka abeit ka ainapakin koruteikus:

¹⁷ kinyek idio kayesi aitetemonor aronis kotauke aluikin ikeidunyet; siriminas aiyaposit naka aiŋal: naarai ebala EJAKAIT ebe, Ŋun kere eraas nuasacit eoŋ.”

¹⁸Kobu akirot naka EJAKAIT loka ajoresio mama ajai eoŋ ebe,

¹⁹ “Inera kwanata EJAKAIT loka ajoresio ebe: Ailuŋ naka elap lokiwoŋonet, ka ailuŋ naka lokikanyet, ka ailuŋ naka lokikanyetekaarei, ka ailuŋ naka lokitomonet eraunos ipucin lukailel ka lukaiyalama, ka lukalakara mama ejai ekek loka Yuda: kanuka ŋun kominas abeit ka ainapakin.

²⁰“Inera kwanata EJAKAIT loka ajoresio atiar: Epote teni atekerin, ka luiboiete koreria luipu:

²¹luiboiete kore ediopet elosete ore ece, kinerasi ebe, ‘Karurukaros aimaimaun asianut naka EJAKAIT, ka amoun EJAKAIT loka ajoresio: alosi eoŋ da.’

²²Eebo, epote ituŋa luipu ka atekerin nuegogoŋ amoun EJAKAIT loka ajoresio Yerusalem, ka aimaimaun da asianut naka EJAKAIT.

²³Inera kwanata EJAKAIT loka ajoresio atiar: Kapaarasia kaŋun, ikamunete ituŋa itomon, kotoma aŋajepa kere nuka atekerin, ikamunete kito anapito naka ituŋanan kayeni-Yudayat, ebe, ‘Kiupar kayes, naarai kiira isio ebe ejai Edeke kayes.’ ”