Read Ebaibuli 1961 Malaki 1 Bible Online

Malaki 1 - Ebaibuli 1961 bible

Malaki 1

¹Abwokon naka akirot naka EJAKAIT mama ejai Isirael kama ka Malaki.

² Ebala EJAKAIT ebe, “Kamina yes.” Konye ibalas yesi ebe, “Kimina ijo sio biai?” Ebala EJAKAIT ebe, “Mam kereka Esau arai onace loka Yakob? Konye amina Yakob;

³ kwabo alait Esau, ketuluo da ikeroŋan luiswapito, kainak da airumeteke ikuwei luka amodiŋ.”

⁴Karaida kebala Edom ebe, “Kitiyakin kwap, konye kiboŋori aiduk aiboisio nuatiyanakinos”; inera EJAKAIT loka ajoresio kwanata ebe, “Edukete kesi, konye atiyakini eoŋ kwap: emaikinete ituŋa kes Eikor loka aronis, ido Ituŋa luenyunyurikinit EJAKAIT ikar kere.”

⁵ Eanyunete akusikonye, itemarete ebe, “Kitopolooritete EJAKAIT adepar eikor loka Isirael!”

⁶ Ebala EJAKAIT loka ajoresio yes ebe, “Eyoŋit ikoku papake, ka ebulesit da ekejakait, Arai do arai eoŋ papa, ani bo akapolou? Arai arai eoŋ ejakait, ani bo akayoŋio? Wu yes isasedotin luimwanito ekakiror. Ibalas yesi ebe, ‘Kimwaŋit biai ekonikiror?’

⁷ Iinakinete emugati loitisilitoi kotemuka. Ibalas ebe, ‘Kitisil isio jo biai?’ Naarai ibalas ebe, Emenen emesa loka EJAKAIT.

⁸ Naiinakiniata ibarasit yenimuduk araun asubanit, mam erai aronis! Naiinakiniata da iŋwalas ka ikadekan, mam erai aronis! Ebala EJAKAIT loka ajoresio ebe, Koinakisi do ekayaitonikus; kisiyalamikini kereka ŋesi jo? Ecamuni kereka jo?”

⁹ Keŋaiŋait, kilip asianut naka Edeke, tetere esianiar mamawok. Ebala EJAKAIT loka ajoresio ebe, Alomunete ŋun kakaninikus: ecamuni kereka ŋesi idio kayesi?

¹⁰ Ti ejok arai kojaun idiopet kayesi yenegolokini ikekia tetere mam yes isinepunete akim kotemuka titai! Ebala EJAKAIT loka ajoresio ebe, Mam kesiyalamikinit yes, karaida acamun ainakinet naka akanikus.

¹¹ Naarai ameun kaneelomunia akoloŋ kiton neelomaria ŋesi epol ekakiror kama ka lukacekwapin; ido kaŋiniibois einakinio lukisupurununo mama ejai ekakiror, ka ainakinet naelai: ebala EJAKAIT loka ajoresio ebe, Naarai epol ekakiror kama ka lukacekwapin.

¹²Konye imunaunete yesi ŋes, naarai ibalas ebe, Esil emesa loka EJAKAIT, emenen da ikenyamat.

¹³ Ibalas da ebe, Koany, epol ca ma aitapasitoi! Ebala EJAKAIT loka ajoresio ebe, Isuanasi ŋes. Iyaut luademunio kagogoŋ, ka iŋwalasik, ka luedekas; iyaut kwaŋin ainakinet! Ebala EJAKAIT ebe, Acamuni tope eoŋ ŋin kakanikus?

¹⁴ Konye ikenitoi ekamodan loejai ibarasit yenikiliokit osipanike, kiyapoi, kosodi ainakin EJAKAIT yeneŋwalit. Naarai ebala EJAKAIT loka ajoresio ebe, Arai eoŋ Ekabaka loapol, esogim da ekakiror kama ka lukacekwapin.