Read Ebaibuli 1961 Matayo 10 Bible Online

Matayo 10 - Ebaibuli 1961 bible

Matayo 10

¹ Konyarau ikekesisiak itomon ka luarei, koinak kes apedor mama ejaas imoyon lueroko, aireŋear kes, ka aitaŋaleun ŋolipone kere loka adek ka akalanyanut da.

² Ikiroria luka ikiyakia itomon ka luarei kes luta: losodit, Simon, loenyaritai Petero, ka Anderea onaceke; Yakob okoku loka Sebedayo, ka Yokana onaceke;

³Pilip ka Batolomayo; Tomas ka Matayo eketeleman esolo; Yakob okoku loka Alipayo, ka Tadayo;

⁴Simon Ekananayot, ka Yuda Isikariot, lokebilakini ŋes ebotet.

⁵Kijuka Yesu ŋul itomon ka luarei, kicorak kes ebe, “Sirikilomasi orotin luka lukacekwapin, sirikilomasi da ediore kere loka Isamarian,

⁶ konye gwai koloto mama ejaas amerekekin nueoliorito nuka ekek loka Isirael.

⁷ Nailosioto kolimonokis ebe, ‘Aapu ajakanut naka akuj’.

⁸ Kitaŋaleununete lukadekak, kitajarununete lukatwak, kiswaganarete lukatapon, kireŋeanarete ajokin, Kiinakinitai atitai, yes da koinakis atitai.

⁹Sirikiyaŋaasi koriaginikus esabu, karaida epuesa, karaida aikomon,

¹⁰ karaida ecoe loka alosit, karaida ikootin iarei, karaida amuk, karaida ebela; naarai ibusakinit ekeswaman ikenyamat.

¹¹Ido ŋolire arai ekialo loilomanarete, komoenenete yenibusakinit kanen, kosalenenete mamake aitodol neinyounioto.

¹² Nailomariata togo, kiyogaete.

¹³Arai ibusakinit etogo, kodol ainapakinikus tomake; konye arai mam ibusakinit, koboŋu do ainapakinikus mamakus.

¹⁴ Arai mam kisukunyikinio karaida akiirar akirokus, nailomuniata kotogo kaŋol, arai kore kaŋol, kilakilakete adae nuka akejenekus.

¹⁵ Abeit, katemari yes atiar, Epatanikini rwaru akwap naka Sodom ka Gomora atitiŋikin kapaaran naka etube aitelekarit ere ŋol.

¹⁶ “Koany, keyakiari yes kwape amerekekin kokidiŋ opeen; aso kopiriaka bala imunwo, ido kiyapaara bala ajeleik.

¹⁷ Konye kocoito ituŋa; naarai kiyaŋaarete aurianeta, kidaete da kotoma atukosiakec.

¹⁸ Kiriarete akonyen nuka ikayaitok ka ikabakan kanukaŋ, araut ikajenak kamakec, kama kalukacekwapin da.

¹⁹ Konye nakiyaŋanariata, sirikiyaloŋoŋoto epone loineratar karaida nuinerasi; naarai kiinakinio kapak kaŋin nuinerasi;

²⁰ naarai mere yes inerasi, dimarai Emoyo loka Papakus loinera kotomakus.

²¹ Onace einakini onaceke aario, papa da ikokuke, enyoikinete idwe lukauriakakec aicutar;

²² kiŋarunete yes ituŋa kere kanuka ekakiror. Konye yenetitiŋikini kiton awasia ŋes itajario.

²³ Nakireiata yes kore ediopet, kokerata ore ece, naarai abeit katemari yes atiar, Mam idaunete ireria kere luka Isirael aitodol naebunio Okoku loka etuŋanan.

²⁴ “Ekesisian mam itelekarit ekesisianakinanike, karaida ebulesit mam itelekarit ejakaitike.

²⁵ Edaunit ekesisian aputoor ekesisianakinanike, ka ebulesit aputoor ejakaitike. Arai enyaraete elopet etogo Beelesebul, edeparete ca do amoromor luejaas okaleke.

²⁶ “Aso sirikikuriakaros kes; naarai emamei akirot naerapitai namam epukorio, karaida naibwaitai namam ejenunio.

²⁷Nukalimokini yes kamuton, kinerata yesi kotoma aica; nuiirarete kaiyeiyea, kolimonokis kokuju otogoi.

²⁸ Sirikikuriakaros ŋul luearete akuan komam epedorete aiar aijar; konye gwai kokuriaka ŋol loepedori amudiar akuan ka aijar da kotoma oGeena.

²⁹Mam kereka egwelete anyiporin aarei apesa adiopet? Emamei adio da naedoi kwap komam Papakus ejeni,

³⁰Konye yes, imaritai itima da kere luka akwesikus.

³¹ Aso sirikikuriaka; iraas yesi luka etiai adepar anyiporin nuipu.

³²Aso ŋinituŋanan yenikalimori eoŋ kakonyen nuka ituŋa, alimori eoŋ da ŋes kakonyen nuka Papaka loejai toma akuj;

³³ konye ŋin yenikaŋeri eoŋ kakonyen nuka ituŋa, aŋeri eoŋ da ŋes kakonyen nuka Papaka loejai toma akuj.

³⁴ “Siriwomito ebe abu kabu ayaŋaun ainapakin kakwap: mam abu kabu ayaŋaun ainapakin, dimarai ekileŋ.

³⁵ Naarai abu kabu aitusurupikin etuŋanan ka papake, apese ka totoke, aberu naka okokuke ka tataake.

³⁶Lukokale luka etuŋanan kes eraunos lukasurupoke.

³⁷ Ŋin yenemina papake arai totoke adepar eoŋ, mam kebusakinit; ŋin da yenemina ikokuke yenitelepat arai yenipese adepar eoŋ, mam kebusakinit.

³⁸ Ŋin da yenimam erioŋi ekemusalaba ka atupar eoŋ, mam kebusakinit.

³⁹ Ŋin yenedumuni akeijar itooliori, ŋin da yenitooliori akeijar kanukaŋ edumuni.

⁴⁰ “Ŋin yenikisukunyikini yes, kesukunyikini eoŋ, ŋin da yenikesukunyikini, isukunyikini ŋol lokejukuni.

⁴¹Ŋin yenisukunyikini enabi naarai erai enabi, edumuni eropit loka enabi, ŋin da yenisukunyikini ekadoliton naarai erai ekadoliton, edumuni eropit loka ekadoliton.

⁴² Ŋin yenitamasi idiopet ka ludidik kalu akoli naka akipi nuelilim bon, naarai erai ikesisian, abeit katemari yes atiar, mam etwaniari cut eropitike.”