Read Ebaibuli 1961 Matayo 11 Bible Online

Matayo 11 - Ebaibuli 1961 bible

Matayo 11

¹ Kosodi kanen, kedau Yesu aicorakin ikekesisiak itomon ka luarei, konyou kanen kolot aisisianakin ka alimonokin da koreriakec.

² Kosodi nakiiraria Yokana kaidaris aswamisio nuka Kristo, kijuka ikekesisiak aiŋit,

³ kobalas ebe, “Irai kereka ijo ŋol loebunit, arai bo kedarata ece?”

⁴Koboŋok Yesu kotema kes atiar, “Koloto, kolimokis Yokana akiro nuiirasi ka nuianyut:

⁵ Ekwenyunete imudukiok, elosete iŋwalasik, iswagio lukatapon, epupete ikimiŋiok, itajario lukatwak, elimonokinio da lukican akiro nukajokak.

⁶ Isirereŋitoi da ŋol lomam itiguikin kanukaŋ.”

⁷ Kosodete keboŋosi kwi, kogeu Yesu alimokin ikodeta nuka Yokana ebe, “Kilomarete alosit amodiŋ aanyun inyo? Egada lokijaŋijani ekwam?

⁸Konye bo kilomarete asesen inyo? Etuŋanan lokenapit anapito naanebek? Koany, ŋul luenapito anapito nuunebek ejaas toma otogoi luka ikabakan.

⁹ Konye kanukinyo kilomariata? Asesen enabi? Eebo, katemari yes atiar, Loitelekarit enabi.

¹⁰ Ŋol ŋes iwadikatere nu ebe, ‘Koany, ejukari ekakiyakia kakonyenekon, Loitemonokini ekonirot kakonyenekon.’

¹¹ Abeit katemari yes atiar, eriŋa enyouno etuŋanan kotoma lukeuriete aŋor loitelekarit Yokana Lokebatisan; konye loedit kotoma ajakanut nakotoma akuj ŋes epol aitelekarit ŋes.

¹² Ameun kapaarasia nuka Yokana Lokebatisan kiton kwana ebuikinitoi ajakanut naka akuj, enatarete da ikabuorok.

¹³Naarai apotu inabin kere ka ikisila kodwarata kiton apak naka Yokana;

¹⁴ Arai ikotosi acamun, ŋes Eliya loedwara abunore.

¹⁵Yenejaas aki kiira.

¹⁶“Konye etupusi kinyo atur na? Eputos kidwe luiboiete kagwelanaret luenyaritos ipaupakec kobalas ebe,

¹⁷ ‘Kikut alamarun, mam yes esoma; Kibwolol, mam yes ibworo.’

¹⁸ Naarai abu Yokana kobu komam enyami karaida aimat, kobalas ebe, ‘Ejai ajokit.’

¹⁹ Abu Okoku loka etuŋanan kobu enyami emasi da, kobalas ebe, ‘Koany, ekeraŋat lo, ekameran da, epapero loka iketelemak esolo ka ikadiakanarak!’ Konye aswamisioke kes itojokere acoa.”

²⁰ Kosodi kogeu aitoron ireria lukiswamaa nukaumokinike nuipu, naarai mam itoronikina.

²¹ Kobala ebe, “Itukwi ijo Korasin! Itukwi ijo Betesaida! Naarai arai kiswamatai koTuro ka Sidon nukaumokin nukiswamatai kamakus, ti kitoronikinos ŋo sek, ka ainap da ipukoi ka ekurwon.

²²Konye katemari yes atiar, Epatanikini rwaru Turo ka Sidon atitiŋikin kapaaran naka etube aitelekarit yes.

²³ Ka jo da, Kaparanaum, kitopoloorio kereka kiton akuj? Kijesario do kiton Okatwak, Naarai arai kiswamatai koSodom nukaumokin nukiswamatai kamakon, ti kesal ore ŋol kiton lolo.

²⁴ Konye katemari yes atiar, Epatanikini akwap naka Sodom atitiŋikin kapaaran naka etube aitelekarit jo.”

²⁵ Kapak kaya Koboŋok Yesu kobala ebe, “Kemalai jo, wu Papa, Ejakait loka akuj ka akwap, naarai ibu kimunonik akiro nu lukacoa ka lukaijen, kopukok da idwe Iudidik;

²⁶eebo, Papa, naarai kwaŋin ibu kitojokia kakonyenekon.

²⁷ Kainak Papaka iboro kere; ido emamei yenejeni Okoku dimarai Papa, kwabo emamei yenejeni Papa dimarai Okoku, ka ŋin da yenekot Okoku apukokin ŋes.

²⁸ Kopotu neajai, yes kere luitaaritos ka lukilaŋirikinito, eoŋ da kesiyenuni yes.

²⁹ Korioŋata ajookotoka, kisisiautu kamakaŋ; naarai etasiono eoŋ, eyapepera kotau, yes da idumunete aiyeŋun kotauonokus.

³⁰ Naarai imeimeo akajookot, akabwokon da ebenen.”