Read Ebaibuli 1961 Matayo 13 Bible Online

Matayo 13 - Ebaibuli 1961 bible

Matayo 13

¹ Kapaaran kaŋin kolomu Yesu kotogo kiboikin ariri kaŋolol.

² Kotukokinos ikodeta luipu mama ejai, kodoka ataker kiboikin; kobwoi ekodet kere koitolima.

³Kolimonok akiro nuipu kawaragasia, kotema atiar, “Koany, abu ekayean koloma aiye.

⁴Napeyei, kodooto ikinyom ice ariri kerot, kopotu akweny, konyamata.

⁵Kodooto ice aŋaŋam, nemam kipu alup, atipet kobwaŋutu, kanumam idulotor alup,

⁶konye kecau akoloŋ konomosi, kanuamameatar alias korinyosi.

⁷Kodooto ice okukwa, kolibut ikukwa koridakis.

⁸Kodooto ice alupo nuejok koraata, ice akwatat, ice akaisakanykape, ice da akaisauni.

⁹Yenejaas aki, kiira.”

¹⁰Kosodi kopotu ikekesisiak mama ejai, kotemasi atiar, “Kanukinyo kineratar kakes kawaragasia?”

¹¹Koboŋok kotema kes atiar, “Kiinakinitai yes ajenun nukaiyeiyea nuka ajakanut nakotoma akuj, konye kes mam einakinitai.

¹² Naarai yenejai ibore, einakinio luiyatakina luipu; konye yenemamei ibore, ŋin da yenejaas kaŋes edemario.

¹³ Kanuka ŋun kinera kakes kawaragasia, naarai naeseseniata mam esesenete, naeirariata da mam iirarete, karaida ajenun.

¹⁴ Ido itodolikinio akirot naka enabi Isaia kamakec naebala ebe, ‘Akiirar iirarete, konye mam ijenunete cut, ido asesen isesenete, konye mam ianyunete cut.

¹⁵Naarai esiepaikis itauon luka ituŋa kalu, Kimiŋarito akiikec, Itumudakito akecekonye, Tetere mam eanyunete kakecekonye, Ka akiirar kakeceki, Ka ajenun da kikecetauon, Kibelokinos ketaŋaleu.’

¹⁶ Konye isirereŋitoi akusikonye, naarai esesenete, ka akusiki da, naarai iirarete.

¹⁷Abeit katemari yes atiar, Apotu kimielas inabin luipu ka ikadolitok aanyun nuisesenete yesi, mam eanyuna, ka akiirar da nuiirarete yesi, mam iirara.

¹⁸“Aso kopupokisi awaragan naka ekayean.

¹⁹Naiiraria ituŋanan akirot naka ajakanut, komam ejenuni ŋes, ebuni lokaronon kourupo nukeyeitai otauke; ŋul kes lukeyeio ariri kerot.

²⁰Ŋul da lukeyeio aŋaŋam, ŋul kes luiirarete akirot, atipet kiyuutu kaiyalama;

²¹konye emameete alias kotomakec, kicata nediokasilon, kedolokis ican arai areio kanuka akirot, atipet itiguikinos.

²² Ŋul da lukeyeio okukwa, ŋul kes luiirarete akirot, konye aiyaloiŋon naka ikar kalu, ka aiŋal naka abar koridakis akirot, mam eraa.

²³Ŋul da lukeyeio alup nuejok, ŋul kes luiirarete akirot ka ajenun; eraete ŋul, ice akwatat, ice akaisakanykape, ka ice da akaisauni.”

²⁴ Koinu kes acewaragan, kobala ebe, “Ajakanut naka akuj; eputos ketuŋanan lokeyei ikinyom luejok amanake:

²⁵konye kejotooros ituŋa, kobu lokasurupike koyeik igitun toma akima, kolot.

²⁶Konye kebwaŋut akima, ka aisur, kotakanut igitun da.

²⁷Kopotu ibulesin luka elopet etogo kolimokis ŋes ebe, ‘Ejakait, mam tope kiyeit ikinyom luejok amanakon? Kepote bo kai igitun?’

²⁸Kotema kes atiar, ‘Lokasurup ŋes kiswamai ŋun.’ Kotemasi ibulesin ŋes atiar, ‘Aso ikoto kaloto karutosi kes?’

²⁹Konye kotema atiar, ‘Mam; elemuni nairusioto igitun, kimoriununut kakima da.’

³⁰ Kinyeisi kere kopolooros kiton aidweny; ido kapak naka aidweny alimokini ikadwenyak ebe, ‘Koruto ber igitun, koenata ikes kicweata; konye akima kotukonokis odulaaka.’ ”

³¹ Koinu kes acewaragan, kobala ebe, “Eputos ajakanut naka akuj; bala ecokat loka ekaradali, lokelemari etuŋanan kiraik toma amanake.

³² Kedit ŋesi aitelekarit ikinyom kere, konye kepoloor, kiteleka ikui kere koraun do ekitoi, kopotu akweny nuka apak koperenenete atenieikike.”

³³ Kolimok kes awaragan ace ebe, “Eputos ajakanut naka akuj bala aitubuunet nakelemari aberu kibwa kotoma aitemisio auni nuka akiria, kiton neabuunioto kere.”

³⁴ Kolimok Yesu ikodeta ŋun kere kawaragasia; kwabo arai emamei awaragan mam kelimokini akirot.

³⁵ Tetere itodolikin akirot nakinerit enabi ebe, “Etooŋari akaituk kawaragasia, Alimori da nukibwaitai ameun kapetetait naka akwap.”

³⁶ Kosodi kotwar ikodeta, koloma togo. Kopotu ikekesisiak mama ejai, kotemasi atiar, “Kitejenunai sio awaragan naka igitun lukomana.”

³⁷Koboŋok kotema kes atiar, “Lokeyei ikinyom luejok erai Okoku loka etuŋanan;

³⁸ Amana da erai akwap, ikinyom luejok eraas idwe luka ajakanut; igitun eraas idwe luka lokaronon,

³⁹lokasurup lokeyei kes erai Satan; aidweny erai awasia naka akwap, ikadwenyak da kes imalaikan.

⁴⁰ Kwape etukonokinere igitun ka aicweikin kakim, ikonakinio nen kawasia naka akwap.

⁴¹ Ijukuni Okoku loka etuŋanan ikemalaikan, etukonokinete kotoma ajakanutuke kere nuitiguikinete kere, ka luiswamaete nukepali,

⁴² ecakakinete oupa loka akim; ejaun kaŋina aimony ka airiamanakin ikel.

⁴³ Kosodete ecaunete ikadolitok kwape kakoloŋ kotoma ajakanut naka Papakec, Yenejaas aki, kiira.

⁴⁴ “Eputos ajakanut naka akuj bala abar nakibwaitai kotoma amana, nakedumuni etuŋanan kimunona; kosodi kanuka akeiyalama kolot kogwela lukejaatatar kere kogwelu amana ŋin.

⁴⁵“Bobo da, eputos ajakanut naka akuj; bala ekagwelanaran loemoi ilulun luejok;

⁴⁶ nakedumunia elulu ediopet loka etiai loepol, kolot kogwela lukejaatatar kere, kogwelu.

⁴⁷ “Bobo da, eputos ajakanut naka akuj; bala eboi lokecakakinio aŋolol, kotukonok lukecor luka iponesio kere.

⁴⁸Kosodi kilelebun, kiriut ituŋa oitolima, kiboikinos, kotukonokis luejok oboro, konye lueroko kocakasi.

⁴⁹ Ikoni nen awasia naka akwap. Epote imalaikan, etiakarete lukaronok kama ka lukadolitok,

⁵⁰ecakakinete kes oupa loka akim; ejaun kaŋina aimony ka airiamanakin ikel.”

⁵¹Kiŋit Yesu kes ebe, “Ijenutu kereka yesi ŋun kere?” Kotemasi atiar, “Eebo.”

⁵²Kotema kes atiar, “Kanuka ŋun ŋinikewadikan yenituutooritai kajakanut naka akuj; eputos bala etuŋanan elopet etogo loelemuni kotoma abarake iboro lukitetiak ka lumojoŋ da.”

⁵³ Kosodi kedau Yesu awaragasia ŋun, konyou, kolot.

⁵⁴ Nakedolio bukec, kisisianak kes kotoma atukosikec, koumokis kotemasi atiar, “Kedumuni bo lo kai acoa na ka nukaumokin nu?

⁵⁵Mam kereka lo erai okoku loka ekekeon? Mere totoke naenyaritai Mariam? Mere ikeinacan Yakob ka Yosep ka Simon ka Yuda?

⁵⁶ Emameete akeinacan kere kane kamawok? Aso kedumun bo lo kai nu kere?”

⁵⁷ Kitiguikinos kanukeŋ. Konye kotema Yesu kes atiar, “Mam eswaki enabi aitopoloorio dimarai bukec kotogoke da.”

⁵⁸Mam abu kiswama nukaumokin nuipu kanen, kanu amamus aiyuunikec.