Read Ebaibuli 1961 Matayo 16 Bible Online

Matayo 16 - Ebaibuli 1961 bible

Matayo 16

¹ Kopotu Iparisayon ka Isadukayon mama ejai, kokodokodata ŋes, kilipata ŋes aitodikin kes aanyunet naebuni kokuju,

² Koboŋok kotema atiar, “Naitiboŋia, ibalas ebe, ‘Ipiororoi moi, naarai ereŋ akuj.’

³ Tupuruc da ebe, ‘Etepi lolo, naarai ereŋ akuj, edalidali da.’ Ijenete yesi amisiikin kwape ejaar akuj, konye mam ipedorete amisiikin aanyuneta nuka apakio.

⁴ Atur naerono naadote emoot aanyunet, konye mam einakinio aanyunet, dimarai aanyunet naka Yona.” Kinyek kes, kolot.

⁵Kedoloto ikesisiak okekwa juwai, kimurwokis ayaŋaar imugatin.

⁶ Kotema Yesu kes atiar, “Kokwenya, kocoito aitubuunet naka Iparisayon ka Isadukayon.”

⁷Kiŋitanakinos bonik ebe, “Mam kiyaunit imugatin.”

⁸ Konye kojen Yesu, kotema atiar, “Wu yes luedit aiyuun, kanukinyo iŋitanakinotor, naarai emameete yes imugatin?

⁹ Eriŋa yes ejenuna? Karaida akiitun imugatin kwi ikany luka ilukumin ikany, ka iditai luemwaasi nen Iuipotu kotukonokis?

¹⁰ Arai bo imugatin ikanykaarei luka ilukumin iwoŋon, ka ibukito luemwaasi nen luipotu kotukonokis?

¹¹Ikonakinito bo yesi ai mam imisiikinito ebe mam enera kayes nuka imugatin? Kocoito aitubuunet naka Iparisayon ka Isadukayon.”

¹² Kosodete kojenut ebe mam kelimokinit kes acoit aitubuunet naka emugati, dimarai aisisianakin naka Iparisayon ka Isadukayon.

¹³ Kosodi kobu Yesu atutubeta nuka Kaisarea Pilipi, kiŋit ikekesisiak ebe, “Ebalas ituŋa Okoku loka etuŋanan ebe erai iŋai?”

¹⁴ Kobalas ebe, “Ebalas ice ebe Yokana Lokebatisan, ice Eliya, ice da Yeremia arai ediopet konabin.”

¹⁵Kotema kes atiar, “Ido bo yes kibalas ebe arai eoŋ iŋai?”

¹⁶ Koboŋok Simon Petero kobala ebe, “Irai ijo Kristo, Okoku loka Edeke lokajaran.”

¹⁷ Koboŋok Yesu kotema ŋes atiar, “Kisirereŋitoi jo, Simon okoku loka Yona! Naarai mam akuan ka aokot kipukokinito jo ŋun, dimarai Papaka loejai toma akuj.

¹⁸ Eoŋ da kalimokini jo ebe irai ijo Petero, adukokini ekakanisa toma atiida na, ikirigin da luka okatwak mam ipikorete.

¹⁹ Kainakini jo ilaceta luka ajakanut naka akuj, kere nuieni ijo kakwap, eenio kokuju, kere da nuilacakini ijo kakwap, elacakinio kokuju.”

²⁰ Kosodi kicor jokan ikesisiak sirikelimokis idiotuŋanan ebe erai ŋesi Kristo.

²¹ Ameun kapak kaŋin kogeu Yesu aikwenyar ikekesisiak ebe ibusakinit ŋes alosit Yerusalem, aiticanio da nuipu kama ka imakio ka isasedotin lupeti ka ikewadikak, ka aario, ka ajarun kapaaran nakiwuniet.

²²Koyaŋa Petero Yesu, kogeu aitoron ŋes, kobala ebe, “Madi akuj, Ejakait! Mam kiponikinete jo ŋun.”

²³Konye kibelokin kotema ŋesi Petero atiar, “Koboŋo kaukaŋ, Satan! Irai ijo ekomio kamakaŋ; naarai mam iwomit nueraas nuka Edeke, dimarai nuka ituŋa.”

²⁴ Kosodi kolimok Yesu ikekesisiak ebe, “Arai ekoto ituŋanan kere atupit eoŋ, koŋerokin ilopet korioŋ ekemusalaba, katup eoŋ.

²⁵ Naarai ŋin yenekoto aitajar akeijar etwaniari, ka yenetwaniari akeijar kanukaŋ edumuni.

²⁶ Naarai ajokis anyoin kedum etuŋanan akwap kere kosodi atwaniar akeijar? Arai bo elemuni ituŋanan inyo alakunia akeijar?

²⁷ Naarai ebuni rwaru Okoku loka etuŋanan nepepe kikemalaikan kotoma aibuses naka Papake, kosodi etacakini ŋinituŋanan kwape ejaatar akeswamisio.

²⁸ Abeit katemari yes atiar, ejaas ituŋa luebwoete kane lumam iirete cut atwanare kiton naeanyuniata Okoku loka etuŋanan ebuni toma ajakanutuke.”