Read Ebaibuli 1961 Matayo 17 Bible Online

Matayo 17 - Ebaibuli 1961 bible

Matayo 17

¹ Ketuboros apaarasia akanykape abu Yesu koyaŋa Petero ka Yakob ka Yokana onaceke, kogitaros bonik, kitodoka ŋesi kes oroŋat loeoja.

² Kituluor kakonyenekec, koiriir ekereet kwape kakoloŋ, kokwaŋuut akenapito kwape kaica.

³Ido koany, kitakanikinos Musa ka Eliya, inerasi kaŋes.

⁴Koboŋok Petero kotema Yesu atiar, “Ejakait, ejok oni ajaut ne; arai ikoto, eswami ne iswamin iuni, ediopet lokon, ediopet loka Musa, ka ediopet da loka Eliya.”

⁵ Napekinerar ŋun, koany, kiteribo kes edou loemilia; ido koany, kolom eporoto kotoma odou kobala ebe, “Lo ŋes Okokuka lominat, loalelakinit noi; kiirasi ŋes.”

⁶Nakiirariata ikesisiak ŋun, kibiroros ebuburia, kokuriakaros noi.

⁷Kobu Yesu kotiro kes, kotema atiar, “Konyoutu, sirikikuriakaros.”

⁸Kikeutu akecekonye, mam eanyuna ituŋanan dimarai Yesu bon.

⁹ Napedokunete koroŋat, kicorak Yesu kes kotema atiar, “Sirikilimokis idiotuŋanan kere nuianyut, aitodol naejarunia Okoku loka etuŋanan kotoma okatwak.”

¹⁰ Kiŋita ikekesisiak ebe, “Aso kanukinyo ineratar ikewadikak ebe, ibusakinit ber Eliya aige abunore?”

¹¹Koboŋok ŋesi ebe, “Abeit ebunit ber Eliya, itemokini ŋesi kere:

¹² konye katemari yes atiar, Adau Eliya abunore, mam apotu kojenutu ŋes, konye kiswamakis kere nuakotos, Kwape kwaŋin elosi Okoku loka etuŋanan da aiticanio kamakec.”

¹³ Kosodete kojenut ikesisiak ebe enera ŋesi kakes nuka Yokana Lokebatisan.

¹⁴ Nakedolokinioto ekodet, kobu etuŋanan ediopet mamakeŋ, kokukokin, kobala ebe,

¹⁵“Ejakait, kitim ikakoku, naarai edek ipumu iticanete noi; naarai irwan ipu ibironokin akim, irwan ipu da akipi.

¹⁶Abu kainu ikonikesisiak, mam epedoro aitaŋaleun ŋes.”

¹⁷ Koboŋok Yesu kotema atiar, “Wu atur namam iyuunit, naepaarit, etodoli ai aiboi kayes? Etodoli ai da atitiŋikinit yes? Koinunai kane.”

¹⁸Kiretak Yesu ŋes, kolom ajokit: koŋaleu etelepat ameun kosawa kaŋol.

¹⁹ Kosodete kopotu ikesisiak mama ejai Yesu kaiyeiyea, kotemasi atiar, “Kanukinyo mam sio kipedoria aireŋear ŋes?”

²⁰ Kotema atiar, “Kanuka aiyuunikus naedit. Naarai abeit katemari yes atiar, arai kijaas kaiyuun naetia ecokat loka ekaradali, ilimokinete eroŋat lo ebe, ‘Konyou kane, kolot laije,’ enyouni do; kwabo emamei akirot nakikaruni yes. [

²¹Konye mam enyouni epone lo, dimarai kanuka ailip ka ailuŋ.]”

²² Nakiboioto koGalilaya, kotema Yesu kes atiar, “Elosi Okoku loka etuŋanan ainakinio akanin nuka ituŋa,

²³earete ŋes, apaaran nakiwuniet ejaruni.” Kokadakis kes noi.

²⁴ Nakedolioto Kaparanaum, kopotu iketelemak esolo loka atutubet naka esekel mama ejai Petero, kobalas ebe, “Mam kereka ekesisianakinanikus elemi esolo loka atutubet naka esekel?”

²⁵Kobala Petero ebe, “Elemi.” Nakelomaria togo, koliŋ Yesu aiŋit ŋes ebe, “Iwomit ijo biai, Simon? Edumunete ikabakan luka akwap esolo loka akwap arai esolo loka ekayaiton kotuŋa inyoika? Kodwekec, arai bo komo?”

²⁶Napekiner ebe, “Komo,” kobala Yesu ebe, “Aso anu ikote nen, ijakakaete cado odwe.

²⁷Konye kenyeis aitiguikin kes, kolot aŋolol kocakak egolu, kolem agar nasodit naikeuni; kiŋaa aitukuke, ianyuni esekel; koyaŋa ŋol, koinak kes kanukaŋ, kanukon da.”