Read Ebaibuli 1961 Matayo 2 Bible Online

Matayo 2 - Ebaibuli 1961 bible

Matayo 2

¹ Nakeurii Yesu koBetelekem loka Yudaya kapaarasia nuka Kerode ekabaka, koany, kodolut lukacoa lukepote kokide Yerusalem,

² kobalas ebe, “Ai bo ejai ŋol lokeurio Ekabaka loka Iyudayan? Naarai kipou kaanyutu aaceritike kokide, ido kiponit isio aima ŋes.”

³Nakepupunio Kerode ekabaka ŋun, kiyaloŋoŋ, ka luko Yerusalem da kere nepepe kaŋes.

⁴Kotukonok isasedotin lupeti ka ikewadikak luka ituŋa kere, kiŋitana kes netieurikinitai Kristo.

⁵ Kolimokis ŋes ebe, “Toma Betelekem loka Yudaya, naarai iwadikat enabi kwaŋin ebe,

⁶ ‘Ka jo da Betelekem, akwap naka Yuda, Mam irai loidite kokapolok luka Yuda; Naarai kotomakon elomuni ekayaiton, Loicokiei ikatuŋa Isirael.’ ”

⁷Kosodi konyarau Kerode lukacoa kaiyeiyea, kinyikok aiŋitiŋit kes apak nakitaanyikinor aacerit.

⁸Kijuka kes Betelekem, kotema atiar, “Koloto, komoata ikoku kainyikokin; kidaut aanyun ŋes, kitejenut eoŋ akiro, tetere eoŋ da alosi aima ŋes.”

⁹Nakedauniata apupun akiro nuka ekabaka, koloto; ido koany, kiŋarenik kes aacerit ya nakeanyunete kokide, aitodol neabwoia kaibois kanaajai ikoku,

¹⁰Nakeanyuniata aacerit kiyalamikinos aiyalama naepol noi.

¹¹ Kolomasi togo, koanyut ikoku ka Mariam totoke; kibiroros komaata ŋes; kosodete kopukosi ikeceboro lukakais, kijaikis ŋes ainakineta, esabu ka lukisupurununo ka luesaete.

¹²Kosodi kikwenya kes Edeke kairujasit ebe sirikeboŋosi mama ejai Kerode, koboŋosi obukec kecerot.

¹³ Nakedauniata kesi aekar, kitakanikin emalaika loka Ejakait Yosep kotoma airujasit, kobala ebe, “Konyou, koyaŋa ikoku ka totoke, kokeria Misiri, kiboie kaŋina aitodol nekalimokinia: naarai ekot Kerode amoun ikoku amudiar.”

¹⁴Konyou ŋesi, koyaŋa ikoku ka totoke kuare, koloto Misiri;

¹⁵ kiboi kaŋina aitodol neatwania Kerode; tetere edoli akirot nakinerit Ejakait kama ka enabi ebe, “Abu kanyarau okokuka koMisiri.”

¹⁶Kosodi nakeanyunia Kerode ebe amodata lukacoa, konyunyurikin noi, kiyakia ituŋa aiar idwe kere lusap lukejaas Betelekem, koidunyetake da kere, lukeraas luka ikar iarei ka lumam edolito ŋul, kwape ejaar apak kaya nakinyikokinia aiŋitun kama ejaas lukacoa.

¹⁷ Kosodi kitodolikin akirot nakinerit enabi Yeremia ebe,

¹⁸ “Aponi kiirarai eporoto koRama, Aibworo ka akuudian naepol, Ibworo Rakel ikedwe, Komam ecamunit aitalakario, naarai emameete.”

¹⁹Konye ketwana Kerode, koany, kitakanikin emalaika loka Ejakait Yosep kairujasit koMisiri,

²⁰ kobala ebe, “Konyou koyaŋa ikoku ka totoke, kolot akwap naka Isirael: naarai atwakata luemootos aijar naka ikoku.”

²¹Konyou ŋesi, koyaŋa ikoku ka totoke, kodol akwap naka Isirael.

²²Konye nakepupunio ebe erum Arekelao Yudaya aibois naka Kerode papake, kokurianar alosit ŋina; kosodi kikwenya Edeke ŋes kairujasit, kolot akwap nako Galilaya.

²³ Kolot kiboikin ore loenyaritai Nasaret: tetere itodolikinio akirot naenerito inabin ebe, “Enyarao Enasarayot.”