Read Ebaibuli 1961 Matayo 23 Bible Online

Matayo 23 - Ebaibuli 1961 bible

Matayo 23

¹ Kosodi kotema Yesu ikodeta ka ikekesisiak atiar,

²“Iboikinos ikewadikak ka Iparisayon oicoloŋ loka Musa;

³ aso nukilimokinete kere kiswamata, koricito da, konye sirikiswamata nuiswamaete kesi; naarai inerasi kesi kwabo mam iswamaete.

⁴Eenete arita nuelaŋir nuetioko aibwok, kisirioŋata ituŋa; kwabo mam kes ikulepek ekotosi atiror kebokoritikec.

⁵ Iswamaete aswamisiokec kere tetere eanyunete ituŋa; naarai italalaarete ikuniaikec luetoronokinete oreeta; itoojaete da atokito nuka inapenekec.

⁶ Ekotosi aibois nakapolon kopucin, ka iicoloŋo lukapolou kotoma atukosia,

⁷ka ayogao kagwelanareta, konyaritos ituŋa kes ebe Rabi.

⁸Konye yes, sirikinyaritai Rabi, naarai ejai yes ekesisianakinan ediopet, yes da kere iraas iinacan.

⁹Sirikinyarata ediotuŋanan papa kakwap, naarai ejai yes Papakus ediopet, loejai toma akuj.

¹⁰Sirikinyaritai da ikeŋarenok, naarai ejai yes ekeŋarenon ediopet, ŋes Kristo.

¹¹ Konye loerai lokapolon kotomakus eraun ekusikejaanakinan.

¹² Yenitopoloor bon itidisiario, yenitidisiar bon da itopoloorio.

¹³“Itukwi yes, ikewadikak ka Iparisayon, lukesoswai! Naarai igolokinete ituŋa ajakanut naka akuj; naarai yes ikulepek mam ilomarete, kwabo luelomarete da mam icamakinete alomar. [

¹⁴Itukwi yes, ikewadikak ka Iparisayon, lukesoswai! Naarai icamete itogoi luka apuserun, kanuka ejose da ilipete ailipasia nueojak; kanuka ŋun kitubokinio aitelekarit.]

¹⁵Itukwi yes, ikewadikak ka Iparisayon, lukesoswai! Naarai irimirimete aŋolol ka akwap, tetere ibelokinete idiopetuŋanan, kedau aibelokin ituluorete ŋes ikoku yenika Geena irwan aarei aitelekarit yes ikulepek.

¹⁶ “Itukwi yes, ikeŋarenok lumudukiok, luibalas ebe, ‘Arai kiyapo ituŋanan kolimite eyekalu, mam akiro; konye ituŋanan yeniyapoi kolimite esabu loka eyekalu, aenikin.’

¹⁷Ibaŋiok yesi, imudukiok! Naarai ali bo epol!, esabu arai bo eyekalu loitalauni esabu?

¹⁸Ebe da, ‘Arai kiyapo ituŋanan kolimite otem, mam akiro; konye ituŋanan yeniyapoi kolimite asubanit naejai otem, aenikin.’

¹⁹ Imudukiok yesi! Naarai ani bo epol, ainakinet, arai bo etem loitalauni ainakinet?

²⁰Aso yeniyapoi kolimite etem, iyapoi kolimite ŋes ka ŋinibore kere yenejai tomake;

²¹ŋin da yeniyapoi kolimite eyekalu, iyapoi kolimite ŋes ka ŋol da loiboie kotomakeŋ;

²² ŋin da yeniyapoi kolimite akuj, iyapoi kolimite eicoloŋ loka Edeke, ka ŋol da loiboikin tomakeŋ.

²³ “Itukwi yes, ikewadikak ka Iparisayon, lukesoswai! Naarai itacakinete iitomoneta luka emopim, ka aneta ka ekumin, konye inyeis akiro nuepolok nuka ikisila, kes etube ka aitim ka aiyuun; ibusakinit yes aswam ŋun, komam inyeinete kwa da.

²⁴Yes ikeŋarenok lumudukiok, ijililiete esirut, ilikorete da akaala!

²⁵ “Itukwi yes, ikewadikak ka Iparisayon, lukesoswai! Naarai itesegarete kiŋa kakolin, ka asanin, konye kotoma ileleba aiŋat ka airaŋanut.

²⁶ Ijo Eparisayot lomuduk! Kilot ber toma akoli ka asanit, tetere kiŋa da elauni.

²⁷ “Itukwi yes, ikewadikak ka Iparisayon, lukesoswai! Naarai iputosi katesina nuiworiworitai kakwanis, etakanete kokiŋa ejokuka, konye toma ileleba akojo nuka lukatwak ka amodokok da kere.

²⁸ Yes da kwape kwaŋin itakanete kokiŋa kaneejaas ituŋa koraas luidolito, konye kotomakus ileleba aisoswanut ka epali.

²⁹“Itukwi yes, ikewadikak ka Iparisayon, lukesoswai! Naarai idukete atesin nuka inabin ka aitubus ailiin nuka ikadolitok,

³⁰ka einer ebe, ‘Arai kiija isio kolo kapaarasia nuka lukapapaakosi, timam kiimorikikin kakes toma abukor aokot nuka inabin.’

³¹ Kanuka ŋun itejenunos bonik ebe iraas yesi ikecedwe kalukearete inabin.

³²Aso kilelebata aitemis naka lukapapaakus.

³³ Yes imunwo, yes ailwek naka imusagan, ikuete biai atubokinio naka Geena?

³⁴ Kanuka ŋun koany, kejukakini yes inabin, ka lukacoa, ka ikewadikak; iarete ice kakesi, ka aibubuonokin, idaete ice kotoma atukosiakus, irukitotor da koreria kere.

³⁵ Tetere kibeikinete yes aokot kere nuka ikadolitok nukebukokinos kakwap, ageun kaokot nuka Abel ekadoliton, kiton aokot nuka Sakaria okoku loka Barakia, lokiarakinete kidiŋ aibois nakalaunan ka etem,

³⁶Abeit katemari yes atiar, Eponikinete akiro ŋun kere atur na.

³⁷ “Wu okwe, Yerusalem, Yerusalem, loeari inabin, ka aibiribir kamor ŋul lukiyakunio mamakon! Irwan imwa ai abu kakotor atukonokin ikonidwe, kwape etukonokinia akokor ikemiyoi kwap abebenokake, konye mam yes ekotokino!

³⁸ Koany kinyeinere yes ekusitogo esil.

³⁹ Naarai katemari yes atiar, Mam kianyunete eoŋ bobo cut, aitodol naitemariata ebe, ‘Isirereŋitoi ŋol loebunit kokiror loka Ejakait.’ ”