Read Ebaibuli 1961 Matayo 25 Bible Online

Matayo 25 - Ebaibuli 1961 bible

Matayo 25

¹ “Kapakio kaŋun ituputoorio ajakanut naka akuj kapesuru atomon nukelemunete atalaikec koloto airiamun keteran.

²Akany kakes kebanaaka, akany da kepiriaka.

³Naarai nakeyaŋaariata nukebaŋaaka atalaikec, mam apotu koyaŋaasi akinyet da;

⁴Konye nukepiriaka koyaŋaasi akinyet kokubeikec nepepe katalaikec.

⁵Nakiyapia eteran, kiluranaros kere, kojotooros.

⁶Konye kidiŋebai kojau ecelet ebe, ‘Koany, eteran! Kolomutu kisiriamasi.’

⁷Kosodete konyout apesur ŋun kere, kitemonokis atalaikec.

⁸Kotemasi nukebaŋaaka nukepiriaka ebe, ‘Koinakinai sio da amodiokinyetekus, naarai aduŋeosi akositalai.’

⁹Konye koboŋokis nukepiriaka ebe, ‘Diat mam ilosikin sio kayes; koloto gwai mama ejaas ikagwelanarak kogwelut.’

¹⁰Konye napelosete agwel, kobu eteran, kolomasi nuetemokino nepepe kaŋes toma opucit; kogolokinoi ekek.

¹¹ Kokau kopotu apesur nuce da kobalas ebe, ‘Ejakait, ejakait, koŋaarai.’

¹² Konye Koboŋok, kotema atiar, ‘Abeit katemari yes atiar, mam kajeni yes.’

¹³ Aso kokwenyete, naarai mam ijenete apaaran karaida esawa.

¹⁴ “Naarai esubit bala etuŋanan loelosi apejo konyarau ikebulesin, kititiŋ kes ikeboro.

¹⁵ Koinak ediopet atalatan akany, ka ece aarei, ka ece da adiopet, ŋolituŋanan kwape kejaar apedorike; kosodi kolot akwap ace.

¹⁶Atipet kolot ŋol lokedumuni atalatan akany, kogwelana, kitobon ameda naka atalatan ace akany.

¹⁷Kwape kwaŋin lokeinakinitai aarei, kitobon ameda naka atalatan ace aarei.

¹⁸Konye lokeinakinitai atalat adiopet, kolot kobok alup, kibwa apesan nuka ejakaitike.

¹⁹Kosodi ketuboros apaarasia nuipu, kobu ejakait loka ibulesin kaŋul, kimar kakes akepesan.

²⁰Kobu lokeinakinitai atalatan akany, koyau atalatan ace akany, kotema atiar, ‘Ejakait, ibu kititiŋ eoŋ atalatan akany; koany, etoboŋu atalatan ace akany.’

²¹ Kotema ejakaitike atiar, ‘Ejok, ebulesit ijo loejok lomunot da; ibu korau lomunot kaluikidioko, kadakakini jo ayait luipu; aso kolom ma toma aiyalama naka ejakaitikon.’

²²Kobu da ŋol lokeinakinitai atalatan aarei, kotema atiar, ‘Ejakait, ibu kititiŋ eoŋ atalatan aarei; koany, etoboŋu atalatan ace aarei.’

²³ Kotema ejakaitike atiar, ‘Ejok, ebulesit ijo loejok lomunot da; ibu korau lomunot kaluikidioko, kadakakini jo ayait luipu; aso kolom ma ijo da toma aiyalama naka ejakaitikon.’

²⁴Kobu da ŋol lokeinakinitai atalat adiopet, kotema atiar, ‘Ejakait, abu kajen ebe irai ijo etuŋanan loeninik, idwenyi kama nemam iyeikinit, itukonokini kanemam isiarakinit;

²⁵aso kakurianar, kalot kebwa akonitalat kalup: koany, napekon na.’

²⁶Konye Koboŋok ejakaitike kotema atiar, ‘Ebulesit ijo loerono loeloŋwana! Ibu kojen ebe adwenyi kama nemam ayeikinit, atukonokini da kanemam esiarakinit;

²⁷ti ibusakinit ijo ainakin akapesan mama ejaas ikeŋadak arupian, eoŋ da kabu tikadum nuaraas nukaŋ ka amedakec da.

²⁸Aso kodemasi ŋes atalat, koinakis ŋol loejaas atalatan atomon.

²⁹ Naarai yenejai ibore einakinio, ido edumuni luipu noi; konye yenemamei ibore, ŋin da yenejaas kaŋes edemario.

³⁰ Kocakakisi ebulesit ŋol lomam ajokis amuton nakokiŋa: ejaun kanen aimony ka airiamanakin ikel.’

³¹ “Naebunio Okoku loka etuŋanan kotoma aibusesuke, ka imalaikan da kere nepepe kaŋes, iboikini oicoloŋoke loka aibuses;

³² etukonokinos atekerin kere akonyeneke, etiakatiakai ŋesi kes kwape etiakatiakaa ekecokon amerekekin ka akinei:

³³ ibwaikini amerekekin akanike nakoteten ka akinei da akanike nakokediany.

³⁴Kosodi etemari ekabaka lukakanike nakoteten atiar, ‘Kopotu yesi lukisirereŋit Papaka, kirumata ajakanut nakitemonokinitoi ameun kaisub akwapin;

³⁵ naarai kariebi eteŋei, ipotu koinakis aimuj, kajakit akur, ipotu koinakis numatan; arai epejonon, ipotu kisukunyikis;

³⁶amujalal, ipotu kitanapa; adeka, ipotu koanyanasi; ajai toma aidaris, kopotu mama ajai.’

³⁷ Kosodete eboŋokinete ikadolitok ebe, ‘Ejakait, kipou kaanyutu jo wori kiriebi eteŋei, kesimujata? Arai kijakit akur, ketamata?

³⁸Kipou kaanyut jo wori irai epejonon, kesukunyikis? Arai imujalal, ketanapa?

³⁹Kipou da kaanyutu jo wori ideka, arai toma aidaris, kapotu mama ijai?’

⁴⁰ Kanen eboŋokini ekabaka ebe, ‘Abeit katemari yes atiar, Kwape kiswamakiniata idiopet kalu iinacanaka ludidik, ipotu kiswamakis eoŋ.’

⁴¹ Kosodi do etemari lukakanike nakokediany atiar, ‘Irwa yesi, lukilamakinitai, kolomasi akim naka ikar kere naitemokinitoi Satan ka ikemalaikan.

⁴²Naarai kariebi eteŋei, mam ipotu koinakis aimuj; kajakit akur, mam ipotu koinakis numatan;

⁴³arai epejonon, mam ipotu kisukunyikis; amujalal, mam ipotu kitanapa; adeka, ajai da toma aidaris, mam ipotu koanyanasi.’

⁴⁴Kosodete eboŋokinete kesi da ebe, ‘Ejakait, kipou kaanyutu jo wori iriebi eteŋei, arai kijakit akur, arai irai epejonon, arai imujalal, arai ideka, arai ijai toma aidaris, komam kijaanakinit jo?’

⁴⁵Kanen eboŋokini kes ebe, ‘Abeit katemari yes atiar, Kwape mam kiswamakiniata idiopet kaludidik kalu, mam ipotu kiswamakis eoŋ.’

⁴⁶ Elosete ŋul alomar toma aiticanio naka ikar kere, konye luedolito elosete toma aijar naka ikar kere.”