Read Ebaibuli 1961 Matayo 3 Bible Online

Matayo 3 - Ebaibuli 1961 bible

Matayo 3

¹ Kapaarasia kaŋun kobu Yokana Ekebatisan, elimonokini kamodiŋ naka Yudaya,

² ebala ebe, “Kitoronikinos; naarai aapu ajakanut naka akuj.”

³ Naarai ŋol ŋes lokinerai kama ka Isaia enabi ebe, “Eporoto loka loiworoi kamodiŋ ebe, Kitemonokisi erot loka Ejakait, Kitetenata ikesokono.”

⁴ Konapenenei Yokana ŋol egoe loka ajul nuka ekaala, ka amunyo kaŋabetekeŋ; ikenyamat da keraas emaase ka esik loka ais.

⁵Kosodete kolomasi mama ejai lukoYerusalem ka luko Yudaya kere, ka lukakwapin kere nuidunyas Yorodan;

⁶kibatisa ŋesi kes kocor Yorodan, kolimonorete akecediakanareta.

⁷ Konye nakeanyunia ŋesi epote Iparisayon ka Isadukayon luipu aibatisao, kolimok kes ebe, “Yes aur naka imusagan, iŋai bo kiikwenyari yes akerit anyunyura naebunit?

⁸Aso koraata araito nuibusakinito aitoronikin:

⁹ kwabo siriwomito kotauonokus ebe, ‘Ejai oni Aburaam papaawok’: naarai kalimokini yes ebe epedori Edeke aitonyoikin Aburaam idwe kotoma amoru kanu.

¹⁰ Nati kwape kwana da ibwaikinitai aep atoromin nuka ikito: aso ŋolikitoi lomam erai araito nuejok ejepario, ka acakakin akim.

¹¹ “Abeit eoŋ ebatisai kakip kanuka aitoronikin: konye loebuni atupakin eoŋ ketelekarit eoŋ agogoŋ, mam kebusakinit akodit akemuk; kibatisai ŋol yes kEmoyo Lokalaunan, ka akim.

¹² Ejai ekeritei akanike, epiari cut ekepejal; etukonokini akimake odula, konye icwei agugu kakim namam itudeŋio.”

¹³ Kosodi konyou Yesu koGalilaya, kobu Yorodan mama ajai Yokana aibatisao.

¹⁴Konye kokoto Yokana aitikokin, ebala ebe, “Epuda jo aibatis eoŋ, ijo da ibuni mamakaŋ?”

¹⁵Konye Koboŋok Yesu, kolimok ŋes ebe, “Kocam do kwana; naarai kwaŋin ibusakinitor oni aitodol adolit kere.” Kosodi kocam.

¹⁶Nakedaunia Yesu aibatisao, atipet kodoku kakipi: ido koany, kopukokin akuj, koany Emoyo loka Edeke ijesun kwape ajele, ebuni mamakeŋ;

¹⁷ ido koany, kobu eporoto kokuju ebe, “Lo ŋes Okokuka lominat, loalelia eoŋ noi.”