Read Ebaibuli 1961 Marako 10 Bible Online

Marako 10 - Ebaibuli 1961 bible

Marako 10

¹ Konyou kaŋina, kolot oikorun luko Yudaya okekwa Yorodan: kotukokinos bobo ikodeta mamakeŋ; kisisianak kes bobo kwape atapitor.

²Kopotu Iparisayon mamakeŋ, kiŋita ŋes ebe, “Ibus kereka etuŋanan aitwar akeberu?” Kokodut ŋes.

³Koboŋok kotema kes atiar, “Anyoika kicorakinit Musa?”

⁴ Kotemasi atiar, “Abu Musa kocam aiwadik ebalua loka alacakin, ka aitwar.”

⁵Konye kotema Yesu kes atiar, “Kanuka aninik naka ikusitauon abu ŋesi kiwadik aicorakinet ŋin kanukus.

⁶ Konye ameun kageunet naka asubunio, ‘Abu kosub yenikiliokit ka yeniberu.’

⁷ Kanuka akirot kaŋin ŋes inyeinia etuŋanan papake ka totoke, kirotakinos kakeberu;

⁸eraunete ŋul luarei adiopetekuan: mam bobo eraas iarei dimarai adiopetekuan.

⁹Kwaŋin luadau Edeke airotakin, kinyek ituŋanan aitiak.”

¹⁰Kiŋita bobo ikekesisiak akirot ŋin naajaar togo.

¹¹ Kotema kes atiar, “Ŋolituŋanan loetwari akeberu komany ace, adotear, adiaka kama ejai aberuke.

¹²Ŋin da arai inyeini okilenike, kodukok ece, adotear.”

¹³ Koinunai idwe ludidik da tetere etirori kes; kitorona ikekesisiak ŋul lukeyaunete kes.

¹⁴Konye nakeanyunia Yesu kokadak noi, kotema kes atiar, “Kocamutu idwe ludidik abunore mama ajai, sirikisimika kes; naarai lueputos kalu ajakanut naka Edeke erai nakec.

¹⁵ Abeit katemari yes atiar, Ŋin yenimam iyuuni ajakanut naka Edeke kwape ikoku yenididi, mam cut elomari toma.”

¹⁶ Kotun kes, kidokok akekanin, kisirereŋ da.

¹⁷ Napenyouni ŋesi alosit orot, kokeru etuŋanan; kokukokin ŋes, kiŋit ebe, “Ekesisianakinan lokajokan, keswama anyoika tetere erumi aijar naka ikar kere?”

¹⁸Kotema Yesu ŋes atiar, “Kanukinyo kinyaraaa eoŋ lokajokan? Emamei yenikajokan dimarai ediopet, ŋes Edeke.

¹⁹ Ijeni aicorakineta ebe, Siriari, Siridote, Sirikokoi, Sirisabanakinenei, Sirirodi, Koyoŋitenenei papakon ka totokon.”

²⁰Kotema ŋes atiar, “Ekesisianakinan, aricit ŋun kere ameun keiditeuka.”

²¹ Kosesen Yesu ŋes komina, kotema atiar, “Kiwolik adiopekirot: kolot, kogwela luijaatar kere, kokoranak lukican, ijaunete moolo kabar kotoma akuj: kosodi kobu kotup eoŋ.”

²²Konyorididior ereeteke kanuka akirot kaŋin, kolot itururwei: naarai kejaas iboro luipu.

²³Koŋoleŋole Yesu, kotema ikekesisiak atiar, “Etiono ca ma lukabarak alomar ajakanut naka Edeke!”

²⁴ Koumokis ikekesisiak kanuka akiroke, Konye Koboŋok Yesu bobo, kotema kes atiar, “Idwe, etiono ca ma lukabarak alomar ajakanut naka Edeke!

²⁵Epatana ekaal aitor apedot naka ekus, itia ekabaran alomar ajakanut naka Edeke.”

²⁶Koumokis noi jokan, kotemasi ŋes atiar, “Aso iŋai bo do epedori aitajario?”

²⁷ Kosesen kes Yesu kotema atiar, “Mam epedorio kotuŋa, konye mam ikote nen kama ejai Edeke: naarai epedoros kere kama ejai Edeke.”

²⁸Kogeu Petero alimokin ŋes ebe, “Koany, kipou isio kenyeis kere, katuputu jo.”

²⁹Kotema Yesu atiar, “Abeit katemari yes atiar, Emamei ituŋanan yeninyeinit etogo, arai iinacan, arai ainacan, arai toto, arai papa, arai idwe, arai amanat, kanukaŋ, kanuka Akiro Nukajokak da,

³⁰konye edumuni irwan akwatat kwape kwana apak na, itogoi, ka iinacan, ka ainacan, ka nukatoto, ka idwe, ka amanat, nepepe kareio; kosodi moolo toma okar luepote aijar naka ikar kere.

³¹ Konye luipu lueraas lusodit eraunete lukawasia; ka lukawasia da eraunete lusodit.”

³² Kejaas orot, edokarete alosit Yerusalem; kiŋarenikinit kes Yesu: koumokis; kes da luketupitos kokuriaka. Koyaŋa bobo lutomon kaluarei, kogeu alimonokin kes akiro nuedoikinete ŋes.

³³Kobala ebe, “Koany, kidokari alosit Yerusalem; einakinio Okoku loka etuŋanan akanin nuka isasedotin lupeti ka ikewadikak; etubokinete ŋes atwanare, ijaikinete ŋes mama ejaas Imo,

³⁴Eboliatar, ka aimuanakin aimul, ka aida, ka aiar da; akaulo kapaarasia auni ejaruni.”

³⁵ Kikunyut Yakob ka Yokana, odwe luka Sebedayo mama ejai, kotemasi atiar, “Ekesisianakinan, kikoto kiswamak sio kere nukilipi jo.”

³⁶Kotema kes atiar, “Ikotosi keswamakis inyo?”

³⁷Kotemasi ŋesi atiar, “Kocamakinai sio keboikinos ediopet akanikon nakoteten, ediopet da akanikon nakokediany, kotoma aibusesukon.”

³⁸ Konye kotema Yesu kes atiar, “Mam ijenete nukilipito. Ipedorete tope aimat akoli naamasi eoŋ? Arai aibatisao kaibatis nakebatisatai eoŋ?”

³⁹ Kotemasi ŋes atiar, “Kipedori.” Kotema Yesu kes atiar, “Imasete bo akoli naamasi eoŋ: ido ibatisao kaibatis nakebatisatai eoŋ:

⁴⁰konye akiro nuka aiboikin akanika nakoteten arai nakokediany mere nakaŋ aikor: konye einakinio ŋul luitemokinitoi sek.”

⁴¹Kosodete nakepupunioto lutomon kogeut anyunyurikin Yakob ka Yokana.

⁴² Konyarau Yesu kes kotema atiar, “Ijenete ebe ŋul lueomitai araut ikayaitok luka Imo, eyaete kes kagogoŋ: ejai ikapolokokec apedor kamakec.

⁴³ Konye mam ikote nen kamakus: konye ituŋanan yenekoto araut yenikapolon kamakus, korau ikusikejaanakinan;

⁴⁴ŋin da yenekoto araut yenisodit kamakus, korau ibulesit yenika ituŋa kere,

⁴⁵Naarai Okoku loka etuŋanan da mam abu kobu aijaanakinio, dimarai aijaanakin, ka ainakin da akeijar alakunia luipu.”

⁴⁶ Kodoloto Yeriko: napelosi anyoun ko Yeriko, nepepe kikekesisiak ka ekodet loapol, abu okoku loka Timayo, Batimayo, emuduki ekelipiton, kiboie kariri kerot,

⁴⁷Nakiiraria ebe erai ŋol Yesu loko Nasaret, kogeu aiworo, kobala ebe, “Yesu, ijo okoku loka Daudi, kitimoi eoŋ.”

⁴⁸Kiretakis luipu tetere ililiŋi: konye ŋes kiyatak noi aiworo ebe, “Wu ijo okoku loka Daudi, kitimoi eoŋ.”

⁴⁹Kobwou Yesu, kotema atiar, “Konyarautu ŋes,” Konyaraut emuduk, kotemasi atiar, “Kotitiŋior: konyou, kinyarit ŋesi jo.”

⁵⁰Kocaka akenapito, kodetun, kobu mama ejai Yesu.

⁵¹Koboŋok Yesu kotema ŋes atiar, “Ikoto keswamak jo inyo?” Kotema emuduk atiar, “Raboni, (Ekesisianakinan,) akoto kakweny.”

⁵²Kotema Yesu ŋes atiar, “Kolot: kitaŋaleu jo akoniiyuun.” Atipet kokweny, kotupa ŋes korot.