Read Ebaibuli 1961 Marako 12 Bible Online

Marako 12 - Ebaibuli 1961 bible

Marako 12

¹ Kogeu einer kakes kawaragasia ebe, “Abu etuŋanan kira amana naka emusabibu, kirigak abwas, kobok aipany nacues, koduk aiteis, kititiŋ ikakoriok, kolot akwap ace.

²Kedol apak kiyakia ebulesit mama ejaas ikakoriok, tetere edumuni araito nuka amana naka emusabibu kama ejaas ikakoriok.

³Kikamut ŋol, kibuŋata, kotwarata atitai.

⁴Kijuka bobo ecebulesit mamakec; kobelebelata, kisuruma ileic,

⁵Kijuka ece; koarata ŋes: ka ice da luipu; kibuŋata ice, ice da koarata.

⁶Aso kesalit bobo ediopet, okoku lominat: kiyakia ŋol da kawasia, kobala ebe, ‘Eyoŋete okokuka.’

⁷Konye kineranakinos ikakoriok ŋul ebe, ‘Lo ŋes lokeruman; aso kaarata ŋes, koraun airum nawok.’

⁸ Kikamut ŋes, koarata, kocakasi kiŋa kamana naka emusabibu.

⁹Aso ikonakini ai ejakait loka amana naka emusabibu? Ebuni emudiari ikakoriok ŋul, einakini ice amana naka emusabibu.

¹⁰ Mam kereka isiomito nuiwadikatai nu ebe, ‘Amoru nakeŋerete ikadukok, Ŋin ŋes keponi kitaraunai amor nakapolon naka agor:

¹¹Abuni akirot ŋin kama ejai Ejakait, Erai nakaumokin kakonyenewok’?”

¹²Komoata aikamun ŋes; konye kokuriaka ekodet; naarai apotu komisiikis ebe enerakinit kes awaragan ŋin: kinyeis ŋes koloto.

¹³ Kiyakiasi ice koParisayon ka luKerodian mamakeŋ, tetere elokete ŋes kakiro.

¹⁴Nakedolokis, kotemasi atiar, “Ekesisianakinan, kijeni ebe irai ijo lokabeit, kwabo mam ipodo idiotuŋanan kere: naarai mam iseseni ejautene loka ituŋa, konye isisianakini erot loka Edeke kotoma abeit. Ibus kereka ainakin Kaisar esolo arai bo mam?

¹⁵Kiinakini, arai bo mam kiinakini?” Konye kojen ŋesi ekecesoswai, kotema kes atiar, “Kanukinyo kikoduniata eoŋ? Koinunai adenari, kaany.”

¹⁶Koinut. Kotema kes atiar, “Nakaŋai aput na ka nukiwadikatai?” Kotemasi atiar, “Nuka Kaisar.”

¹⁷ Koboŋok Yesu kotema kes atiar, “Kotacakis Kaisar nueraas nuka Kaisar, ka Edeke da nueraas nuka Edeke.” Koumokis noi jokan.

¹⁸ Kopotu Isadukayon mamakeŋ, luebalas ebe emamei ajarun; kiŋita ŋes ebe,

¹⁹ “Ekesisianakinan, abu Musa kiwadikak sio ebe, Arai ketwana onace ketuŋanan, kinyek akeberu emamei ikoku, eyaŋaari onaceke akeberu, tetere edumakini onaceke aur.

²⁰Kejaas iinacan ikanykaarei: komany losodit aberu, kotwana komam inyeinit aur;

²¹Kirum lokiareit ŋes, kotwana, komam inyeinit aur; ka lokiwuniet da kwape kwaŋin.

²²Kiton lukanykaarei kere komam inyeinito aur. Kokaukec kere kotwana aberu da.

²³Aso kotoma ajarun eraun ŋin aberu nakaŋai kama kaŋul? Naarai kerai aberu naka lukany kaarei kere.”

²⁴Kotema Yesu kes atiar, “Mere akirot na ŋes ipaanariata yesi? Naarai mam ijenete nukiwadikatai, karaida apedor naka Edeke.

²⁵Naarai naejaruniata kotoma okatwak, mam emanyete, karaida amanyio: konye eraas bala imalaikan toma akui.

²⁶ Konye nuka lukatwak ebe itajarunio; mam isiomito kotoma oitabo loka Musa kotoma owai loka Ekiot, kwape kelimokinia Edeke ŋes ebe, ‘Arai eoŋ Edeke loka Aburaam, Edeke loka Isaak, ka Edeke loka Yakob da’?

²⁷Mam ŋes erai Edeke loka lukatwak, dimarai loka lukajarak; ipaarete noi.”

²⁸ Kobu ediopet kokewadikak, kiira kes iŋitanaros, kojenu ebe aboŋoki kotenan, kiŋit ŋes ebe, “Ani aicorakinet nasodit kakere?”

²⁹ Koboŋok Yesu ebe, “Nasodit ŋes na ebe, ‘Kiira wu Isirael; Ejakait Ewokodeke, erai Ejakait ediopet.

³⁰ Komina Ejakait Ekonideke kekonitau kere, ka akoniijar kere, ka akonicoa kere, ka akonigogoŋ kere.’

³¹ Nakiareit da ŋes na ebe, ‘Komina ikoniidunyet kwape iminar bon.’ Emamei aicorakinet ace nakapolon aitelekarit nu.”

³² Kotema ekewadikan ŋes atiar, “Abeit, Ekesisianakinan, iner kotenan ebe erai ŋesi ediopet; kwabo emamei ece dimarai ŋes.

³³ Amina ŋes ketau kere, ka ajenun kere, ka agogoŋ kere, ka amina ikeidunyet kwape eminar bon, itelekarit noi ainakineta nuicweio kere ka asuban da.”

³⁴ Nakeanyunia Yesu ebe aboŋoki kapirianut, kotema ŋes atiar, “Mam jo ilwana kajakanut naka Edeke.” Akaulo kaŋun amamei bobo yeniketitiŋikinit aiŋit ŋes akirot.

³⁵ Koboŋok Yesu, nakisisianakinia koyekalu, ebe, “Biai bo ebalatatar ikewadikak nuka Kristo ebe erai okoku loka Daudi?

³⁶ Abu Daudi elopet kiner kanuka Emoyo Lokalaunan ebe, ‘Abu Ejakait kotema Ekajakait ebe, Kiboikin akanika nakoteten, Aitodol neebwaikinia lukasurupokon kwap kakejenekon.’

³⁷Daudi elopet enyarit ŋes Ejakait; aso keraun bo biai ikekoku?” Kopupokinite ekodet loapol kaiyalama.

³⁸ Kinera kaisisianakinike ebe, “Kocoito ikewadikak, luekotosi alosit konapito inapen lueojak, ka aiyogao kagwelanareta,

³⁹ka iicoloŋo lukapolou katukosia, ka aiboisio nukapolou kopucin.

⁴⁰Luecamete itogoi luka apuserun, luijoseete ebe ilipete nukaojak; edumunete ŋul atubokinio naitelekarit.”

⁴¹ Kiboikin koseseni aiŋadis, koany kwape ecakanakinia ekodet apesan toma aiŋadis; luipu keraas ikabarak kocakanakis nuipu.

⁴²Kobu apuserut nakican kocakak ikapun iarei luerai apesa.

⁴³Konyarau ikekesisiak, kotema kes atiar, “Abeit katemari yes atiar, acakaki apuserut ŋin nakican luipu adepar kere luecakanakinete aiŋadis.

⁴⁴ Naarai acakakis ŋul kere kideikina luipu; konye ŋin kotoma ocanike acakaki lukejaatar kere, ŋes aijarake kere.”