Read Ebaibuli 1961 Marako 16 Bible Online

Marako 16 - Ebaibuli 1961 bible

Marako 16

¹ Kosodi ketubor nakasabato, kogwelut Mariam Magadalene, ka Mariam toto naka Yakob, ka Salome, lueuru maa, tetere elosete ainyonyoanakin ŋes.

²Kosodi tupuruc sek kapaaran nasodit nakasabato, koloto ates napeŋiuni akoloŋ,

³Kineranakinos bonik ka bonik ebe, “Iŋai bo kikokorikini oni amoru alemar kokek loka ates?”

⁴Nakiteluoroto, koanyutu amoru ikokorioritai awai; naarai apol noi.

⁵Kolomasi ates, koanyutu etelepat iboie kowai lokoteten, enapit anapito nailiacanit; koumokis.

⁶Kotema kes atiar, “Sirikiwumokis; imoete yesi Yesu Enasarayot lokibubukinitoi: ajaru; emamei kane; koanyutu aibois kama kibwaikinitai ŋes!

⁷ Konye koloto, kolimokis ikekesisiak ka Petero da ebe, Kiŋarenikini ŋesi yes alosit Galilaya; ianyikinete ŋes ŋina, kwape kilimokinitor yes.”

⁸Kolomutu kiŋa, kokerata anyoun kates; naarai apotu komaranata, ka aumokin: mam elimokina imodiotuŋanan akirot; naarai akuriaka. [

⁹ Nakedaunia ajarun tupuruc apaaran nasodit nakasabato, kisiau aitakanikin Mariam Magadalene, nakolo kireŋeari ŋesi ajokin akanykaarei.

¹⁰Kolot ŋin kolimok lukejaenenas kaŋes, nakibworotor komonyete.

¹¹Kes da nakiirariata ebe ejari, aanyu ŋesi, mam apotu kiyuut.

¹² Akaulo kaŋun, kitakanik ituŋa iarei kakesi kopone loegelara, napelosete okialo,

¹³Koboŋosi kolimokis luce; mam apotu kiyuut ŋul da.

¹⁴ Kokau kitakanikin lutomon ka lodiopet iboiete enyamete; kitoron kanumam iyuuniata ka aninik naka ikecetauon, naarai mam apotu kiyuut ŋul lukeanyunete ŋes kedau ajarun okatwak.

¹⁵ Kotema kes atiar, “Koloto yesi akwapisinei kere, kolimonokis ŋinisubat kere Akiro Nukajokak.

¹⁶ Yeniyuuni kibatisai, itajario; konye yenimam iyuuni itelekarete akiro.

¹⁷ Etupanakinete aanyuneta nu ŋul luiyuunete; kokirorika ireŋeanarete ajokin: inerenenas aŋajepa nukitetiak;

¹⁸ ikamununete imunwo, karaida kemata ibore yenikaaran, mam isiriebi kes cut; idokonokinete lukadekak akecekanin, eŋaleunete.”

¹⁹ Kosodi Ejakait Yesu kedau einer kakes, koyaŋaarai toma akuj; kiboikin akan nakoteten naka Edeke.

²⁰ Konyoutu kwi, kolimonokis kotoma aiboisio kere, kiswamai Ejakait nepepe kakes, kitogogoŋ akirot kanuka aanyuneta nuketupanakinete. Amen.]