Read Ebaibuli 1961 Marako 4 Bible Online

Marako 4 - Ebaibuli 1961 bible

Marako 4

¹ Kogeu bobo aisisianakin kariri kaŋolol. Kotukokin ekodet loapol noi mama ejai, kanuka ŋun kodoka ŋesi ataker kiboikin aŋolol; kojai ekodet kere neeonit kariri kaŋolol.

²Kisisianak akiro nuipu kotoma awaragasia, kolimok kes kotoma aisisianakinike ebe,

³“Kiirasi! Koany, abu ekayean koloma aiye.

⁴Kosodi kanen napeyei, kodooto ikinyom ice ariri korot, kopotu akweny, konyama.

⁵Kodooto ice aŋaŋam, nekikidioko alup; atipet kobwaŋutu, naarai kesedeny alup.

⁶Nakecaunia akoloŋ konomo; ido naarai kemameete alias, korinyosi.

⁷Kodooto ice okukwa; kolibut ikukwa koridakis, mam apotu koraata araito.

⁸Kodooto ice alup nuejok, koraata araito, kopolooros, kiyatakinos; koraata akaisauni, ka akaisakanykape, kiton akwatat da.”

⁹Kotema atiar, “Yenejaas aki nuka akiirar, kiira.”

¹⁰Kosodi nakejaar bon, apotu ituŋa lukelukunito ŋes ka ikesisiak itomon kaluarei kiŋita ŋes akiro nuka awaragasia.

¹¹ Kotema kes atiar, “Kiinakinitai yes ajenun aiyeiyea naka ajakanut naka Edeke; konye mama ejaas kwi luejaas kiŋa eraas kere awaragasia:

¹² tetere aanyun eanyunete komam emisiikinete; akiirar da iirarete komam ejenunete; kinyeis aibelokin ka aisionio.”

¹³Kotema kes atiar, “Mam kereka yes ijenete awaragan na? Aso ijenunete biai awaragasia kere?

¹⁴Eyei ekayean akirot.

¹⁵Ŋul lukariri kerot kama keyeikinio akirot kes lu; kedaut akiirar, atipet ebuni Satan, elemari akirot nakeyeikinio otauonokec.

¹⁶Ikote nen da lukeyeikinio aŋaŋam, kedaut akiirar akirot, atipet ecamunete kaiyalama.

¹⁷Kwabo emameete alias kotomakec, konye etitiŋikinete nediokasilon; kosodete naeponikiniata aiticaneta ka areio kanuka akirot, atipet iguikinos.

¹⁸Ice kes lukeyeikinio okukwa; kes lukiirarete akirot,

¹⁹ kosodi aiyaloŋoŋ naka akwapin, ka aiŋal naka abar, ka eraŋa loka acekiro elomarete, eridakinete akirot, mam erai.

²⁰Ka ŋul da lukeyeikinio alup nuejok kes lukiirarete akirot, kocamut, koraata araito, akaisauni, ka akaisakanykape kiton akwatat da.”

²¹ Kotema kes atiar, “Eyaŋaunio kereka atala aibwaikin obukit, arai bo kwap keitada? Mam kereka ibwaikinio kuju ocoget?

²² Naarai emamei akirot naibwaitai, dimarai kito aitakanunio; kwabo emamei akirot naimunonitai, dimarai kito aikujunio.

²³Arai ejaas ituŋanan aki nuka akiirar, kiira.”

²⁴ Kotema kes atiar, “Kocoito nuipupete. Aitemis naitemioto yesi, ŋipeŋin kitemere yes, kiyatakinio da.

²⁵ Naarai yenejai ibore einakinio ice; konye yenemamei ibore, edemunio ŋin da yenejaas kaŋes.”

²⁶Kotema atiar, “Ikoni ne ajakanut naka Edeke bala etuŋanan lokeyei ikinyom alup;

²⁷ kojotoor, ka anyoun, kuare ka paaran; kobwaŋutu ikinyom kopolooros, komam ŋes ejeni kwape kikonakinere.

²⁸Eraete alup kanukec, egeuni akiot, kosodi aluŋuret, kosodi konyet akima nuekokito.

²⁹ Konye kekoko araito, atipet ijukari ecilikiki, naarai adol aidweny.”

³⁰ Kotema atiar, “Kitupusi kinyo ajakanut naka Edeke, arai ketetemo kawaragan anyoin?

³¹Eputos ka ecokat loka ekaradali, loeyeikinio toma alup, karaida kedit aitelekarit ikinyom kere luka akwapin;

³² konye nakeyeikin, epoloor, eraun lokapolon aitelekarit idiasio kere, kijany atenieik nuepolok, tape edukete akweny nuka apak akaisikec otolimike.”

³³Kolimok kes akirot kawaragasia nuipu nuekote nen, kwape kepedoriata akiirar.

³⁴Kwabo mam abu kolimok kes emamei awaragan: konye kitebeik ikekesisiak akiro kere kaiyeiyea.

³⁵ Kapaaran kaŋin, nakitiboŋ, kotema kes atiar, “Kekwaŋaros okekwa juwai.”

³⁶Kinyeis ekodet, koyaŋaasi ŋes nepepe kakes kwape kejaar, kotoma ataker. Koupasi atakerin ace da.

³⁷Kokut ekwam loededeŋ, Koretonokinos akailan ataker, aitodol neapiatar akipi ailelebun ataker,

³⁸Konye kejai ŋesi elopet okori kataker, ejotoi kaicolonit. Kitwekenyut ŋes kotemasi atiar, “Ekesisianakinan, mam jo ipodo kimudiari oni?”

³⁹Kokweny ŋesi, kiretak ekwam, kolimok aŋolol ebe, “Kililiŋ! Kinapakin!” Kopala ekwam, kojaun aiyamakin naepol.

⁴⁰Kotema kes atiar, “Kanukinyo ikuriakarotor? Eroko ca ma yes iyuuna?”

⁴¹Kolomak kes aiyoŋ naepol, kotemanaros atiar, “Iŋai bo lo, naarai ekwam ka aŋolol da erimasi ŋes?”