Read Ebaibuli 1961 Marako 5 Bible Online

Marako 5 - Ebaibuli 1961 bible

Marako 5

¹ Kodolot okekwa kaŋolol, akwap naka Igerasenin.

²Nakedokunia kataker, atipet kiriamunos ketuŋanan lokemoyo loerono, lokebuni katesin,

³Kiboienenei ŋol katesin. Komamei ituŋanan yenepedori aien ŋes bobo, karaida kirikoi;

⁴naarai keenenenoo irwan ipu kiloin ka irikoi, koŋedeŋedei irikoi, kobilibil da aeneta; komamei ituŋanan kere yenikejaas kagogoŋ aitapatan ŋes,

⁵Apaarasia kere, apaaran ka akuar, kojaenena atesin ka oroŋan, iworoi, ka atubutubo kamor.

⁶Nakeanyunia Yesu kama elwana, koker koma ŋes.

⁷ Kiworo keporoto loepol, kobala ebe, “Anyoika eoŋ ka jo, Yesu, Okoku loka Edeke Loejai kuju kakuj? Kesiyapoi kalimite Edeke, sirikiitican eoŋ.”

⁸Naarai abu Yesu kotema ŋes atiar, “Ijo emoyo loirono, kolom kotuŋanan!”

⁹Kiŋit Yesu ŋes ebe, “Ekonikiror iŋai?” Koboŋok ebe, “Ekakiror erai Ajore; naarai kipu isio.”

¹⁰Kiŋaiŋa noi ebe kinyek aireŋear kakwap kaŋin.

¹¹Kanen koroŋat kojai esipan loapol loka ipegei edakasi.

¹²Kiŋaiŋaata ŋes imoyon ebe, “Kijukarai toma opegei, kalomakisi kes.”

¹³Kocamak kes. Kolomut imoyon lueroko kolomasi toma opegei: komotar esipan kere neijululuei kiton aŋolol, emwaasi bala ilukumin iarei; kotwakikis aŋolol.

¹⁴Kokerata ikecokok, kisiarakis akiro ore, kokialon da. Kolomut ituŋa aanyun nuadoikis.

¹⁵Koloto mama ejai Yesu, koanyut lolem ajaas ajokin iboie, enapit igoen, kejokiar adam, ŋopeŋol lokejai lem ajore ŋin; kokuriakaros.

¹⁶Ŋul da luapotu koanyut kolimokis kes nuadoikis lolem ajaas ajokin, ka nuka ipegei da.

¹⁷Kogeut aiŋaiŋa Yesu anyoun koikorunokec.

¹⁸Nakedokaria ataker, kiŋaiŋa lolem ajaas ajokin aupar kaŋes.

¹⁹Konye koŋer Yesu, kotema ŋes atiar, “Kolot orekon mama ejaas lukobukus, kolimonok akiro nukapolok nuetia nen nukiswamak Ejakait, ido kwape kitimio jo.”

²⁰ Kolot, kogeu alimonokin kotoma Dekapoli akiro nukapolok nuetia nen nukiswamakinit Yesu ŋes; koumokis ituŋa kere.

²¹Nakedaunia Yesu aikwaŋar bobo aboŋor kataker okekwa, kotukokin ekodet loapol mamakeŋ; kojai ŋesi kariri kaŋolol.

²² Kobu ekayaiton ediopet loka atukos, ekekiror Yairo; nakeanyunia Yesu, kibirokin akejeneke,

²³ kiŋaiŋa noi, kotema atiar, “Ikapese eapikinit airidakin, keŋaiŋait kobu kidokok ŋes akonikanin, tetere itaŋaleuni ŋes, kojar da.”

²⁴Kolot nepepe kaŋes. Kotupa ekodet loapol, koridakis ŋes.

²⁵Kojai aberu nakedeka alele nakaokot ikar itomon kaluarei;

²⁶nakiticanitoi noi kakanin nuka imurwok luipu, nakitatacio kere lukejaatar, komam eŋaleuni, konye do kinyikokinite adek.

²⁷Nakiiraria akiro nuka Yesu, kitor okodet kikuny kokauke, kotiro akenapito.

²⁸Naarai abu kotema atiar, “Arai katiro anapitoke bon ketaŋaleunio.”

²⁹Atipet koonik alele naka akeokot; kojen kakuanake ebe aŋaleu ican ŋul.

³⁰ Atipet kojen Yesu ebe aloma apedor kamake, kibelokin kotoma okodet, kotema atiar, “Iŋai bo atiro anapitoka?”

³¹Kotemasi ikekesisiak atiar, “Iany ekodet kiiridak, ibala ebe, ‘Iŋai bo katiro?’ ”

³²Kirere Yesu aanyun iŋai kiswamat ŋin,

³³Konye kokurianar aberu komaran, kojen nukiswamakinio kobu kibirokin akonyeneke, kolimok abeit kere.

³⁴Kotema ŋes atiar, “Akokuka, kitaŋaleu jo akonikiyuun; kolot inapakina, koŋaleu icanikon.”

³⁵Napinera ŋun, kopotu lukepote kore loka ekayaiton loka atukos, kobalas ebe, “Atwana akokukon, Kanukinyo itaaria bobo Ekesisianakinan?”

³⁶Konye nakiiraria Yesu akirot ŋin nainerai, kolimok ekayaiton loka atukos ebe, “Sirikikurianar, kiyuu aiyuun.”

³⁷Mam abu kisunup icetuŋanan atupar ŋes dimarai Petero ka Yakob ka Yokana onaceke.

³⁸Kodoloto togo loka ekayaiton loka atukos, koany ecelet, ka ituŋa emonyete kibwololoete noi.

³⁹ Nakelomaria, kotema kes atiar, “Kanukinyo icelatar komonyete? Mam ikoku etwanit, konye ejotoi.”

⁴⁰Kokienatar ŋes. Konye nakedaunia aireŋear kes kere kiŋa, koyaŋa papa loka ikoku ka totoke, ka ŋul da lukejaas kaŋes, koloma nekejai ikoku.

⁴¹ Kitiŋ akan naka ikoku kotema atiar, “Talita kumai”; apolouke ebe, “Ipese katemari jo atiar, konyou.”

⁴²Atipet konyou ipese kosakasak; naarai kerai yenika ikar itomon kaluarei. Atipet koumokis kaumokin naepol.

⁴³ Kicor jokan kinye ituŋanan ajenun akiro ŋun, kicorak kes ainakin ŋes inyamat.