Read Ebaibuli 1961 Marako 6 Bible Online

Marako 6 - Ebaibuli 1961 bible

Marako 6

¹ Konyou kanen kobu akwapukec. Kotupasi ikekesisiak.

² Apaaran nakasabato kogeu aisisianakin kotoma atukos. Nakiirariata luipu koumokis, kotemasi atiar, “Kedumuni lo ŋun kai? Anyoin acoa naeinakinitai ŋes? Anyoika nukapedor nuetia nen nuiswamai kakaninike?

³Mere lo ekekeon, okoku loka Mariam, onace loka Yakob ka Yose ka Yuda ka Simon, akeinacan da emameete kane kamawok?” Kiguikis kanukeŋ.

⁴ Kotema Yesu kes atiar, “Enabi mam emwaŋio dimarai akwapuke, kaneejaas ipajenake, ka lukotogoke.”

⁵ Mam abu kopedo aswam nakapedor adio da kaŋina, dimarai aidokokin lukadekak idis akekanin kitaŋaleu kes.

⁶Koumok kanuka amamus aiyuunikec. Kimaniman ireria kere isisianakini.

⁷ Konyarau lutomon kaarei, kogeu aiyakiar kes iareiarei. Koinak kes apedor kama kimoyon kalueroko;

⁸ kicorak kes kinyeis ayaŋaar idiobore yenikerot, dimarai ebela bon; mam karaida inyamat, karaida ecoe, karaida apesan kamunyinikec;

⁹konye konapito amuk; ido sirinapenenete ikason iarei.

¹⁰Kotema kes atiar, “Ŋolitogo loilomanarete, kosalenenete nen aitodol nainyounioto kore kaŋol.

¹¹ Kaŋiniibois kere namam kisukunyikinere yes, karaida akiirar, nainyounioto kanen, kilakilakenenete adae nuejaas akejenekus araut akajenak kamakec.”

¹²Koloto kesi kolimonokis ituŋa aitoronikin.

¹³ Kireŋeanasi ajokin nuipu, kinyonyoanakis lukadekak luipu akinyet, kitaŋaleut.

¹⁴ Kopup ekabaka Kerode ŋun; naarai aruo ekiror loka Yesu. Abakai ebe, “Ajaru Yokana Lokebatisan kotoma okatwak, kanuka ŋun iswamaete nukapedor kotomakeŋ.”

¹⁵Konye kobalas ice ebe, “Erai Eliya.” Ice da ebe, “Erai enabi, kwape ediopet kotoma onabin.”

¹⁶Konye nakiiraria Kerode, kotema atiar, “Yokana, lokajepari eoŋ akekou, ajaru ŋol.”

¹⁷ Naarai abu Kerode elopet kijuka kikam Yokana, koenik aidaris kanuka Kerodia, aberu naka Pilipo onaceke; naarai amanyit ŋes,

¹⁸ kosodi Yokana alimokin Kerode ebe, “Mam ibus jo ajaut kaberu naka onacekon.”

¹⁹Kwaŋin kolil Kerodia, kokoto aiar ŋes; mam epedoro;

²⁰naarai keyoŋit Kerode Yokana, kojen ebe erai etuŋanan loedolit, lokalaunan, koricite ŋes. Nakiiraria kobuonokin noi; kiiranari ŋes kaiyalama.

²¹Kosodi kodolok apak naajok nakipoikinio Kerode ijakake, ka ikapolokitok lukapolok, ka ituŋa lukapolok luko Galilaya epucit kanuka apaaran naka aurioke,

²²Kanen kolom akoku naka Kerodia kikosi, kisiyalamik Kerode ka lukejaas kaŋes opucit. Kolimok ekabaka apese ebe, “Kilipai eoŋ ibore kere yenikoto, kainakini jo.”

²³ Kiyapoik ŋes ebe, “Ŋinibore kere yenilipi, kainakini jo, kiton atutubet naka ajakanutuka.”

²⁴Koloma ŋin kiŋit totoke ebe, “Elipi inyo?” Kotema atiar, “Akou naka Yokana Lokebatisan.”

²⁵Atipet kisunya alomun mama ejai ekabaka, kilip ebe, “Akoto koinak kwape kwana akou naka Yokana Lokebatisan katuba.”

²⁶Kokadak ekabaka noi; konye kanuka akeiyapo, kanuka ŋul da lukejaas opucit, mam abu kokoto aimik ŋes.

²⁷Atipet kiyakia ekabaka eserikalet, kicorak ayaun akouke. Kolot kojepu akouke kaidaris.

²⁸Koyau akouke katuba, koinak apese; apese da koinak totoke.

²⁹Nakiirariata ikekesisiak akiro, koloto koyaŋaasi akekuan, kidaikis ates.

³⁰ Kotukonokinos ikiyakia mama ejai Yesu; kolimokis ŋes akiro kere nueswamata ka nuesisianakis.

³¹Kotema kes atiar, “Kogitunos yesi bonik aibois naesil, kibworasi nediokasilon.” Naarai kejaas ituŋa luipu eponenenete koboŋonorete, komam adiopak da naka ainyam.

³² Koloto toma ataker kogitaros aibois naesil.

³³Koanyutu ituŋa kes elosete, kojenata luipu, kokerata ŋina kakejen anyoun koreria kere, koliŋakis adolore.

³⁴ Nakedokunia kataker koany ekodet loapol, kitim kes, naarai kesubito bala amerekekin nuemamei ekecokon: kogeu aisisianakin kes akiro nuipu.

³⁵ Ketubor akwap, kopotu ikekesisiak mamakeŋ, kotemasi atiar, “Aibois na erai amodiŋ, atubor da akwap,

³⁶Kotwar kes, tetere elosete amanat koreria da luirimorito, kogwelata lunyaman.”

³⁷Konye Koboŋok kotema kes atiar, “Koinakis yesi kes lunyaman.” Kotemasi atiar, “Kilosi ca kagwelata imugatin luka adenarin[1] akwat aarei tetere kiinakini kes konyama?”

³⁸Kotema kes atiar, “Ejaas yes imugatin imwaasi ai? Koloto koanyut.” Nakedauniata ajenun kotemasi atiar, “Ikany ka agaria aarei.”

³⁹Kicorak aisiboikin ituŋa kere katukon toma anya numel.

⁴⁰Kiboikinos katukon, ice akwatat ka ice akaisakany.

⁴¹ Kolem imugatin lukany ka agaria aarei, kosesen akuj, kisirereŋ, kobilibil imugatin; koinak ikekesisiak akorokor. Kokoranak agaria aarei mamakec kere.

⁴²Konyamata kere kimonikinos.

⁴³ Kotukonokinai atutubeta nuabilibila nuelelebete idita itomon kaluarei, ka atutubeta nuka agaria da.

⁴⁴Lukenyamete emwaasi ikiliok ilukumin ikany.

⁴⁵ Atipet kitiŋaik ikekesisiak adokar ataker, aiŋarenikin ŋes adokar okekwa Betesaida, apak naatwaria ŋesi ekodet.

⁴⁶Kedau aitwar kes, kolot oroŋat ailip.

⁴⁷Kimukok, kojai ataker kidiŋ aŋolol, kojai ŋesi da bon oitela.

⁴⁸Koany kes itaaritos aikwaŋ, naarai kemeunit ekwam koiŋaren, kedol akwenyunet nakiwoŋonet naka akuar, kobu mama ejaas kicakacakai aŋolol; kokoto adepar kes,

⁴⁹Konye nakeanyuniata ŋes icakacakai aŋolol, keomitos ebe erai etoil, kilalaata:

⁵⁰naarai apotu kere koanyut, kokuriakaros. Atipet kinera kakes, kotema atiar, “Kotitiŋioros! Eoŋ lo. Sirikikuriakaros.”

⁵¹ Kodoka ataker nekejaas kesi; kiyamakin ekwam. Koumokis noi kotauonokec;

⁵²naarai mam apotu kojenutu nuka imugatin, konye keninik ikecetauon.

⁵³Nakedauniata aikwaŋar, kodolo akwap naka Genesaret, koenata ataker oitolima.

⁵⁴Nakedokuniata, atipet kojenut ituŋa ŋes.

⁵⁵Kokerata kirimosi akwap ŋin kere, kogeut ayaŋanar lukadekak kakapekec, alosit ŋiniibois nakepupunete ebe ejai ŋesi.

⁵⁶ Ido kama kelomanari kere, oreria, ka oreria da lukapolok, arai amanat, kiperionokis lukadekak agwelanareta, kiŋaiŋaata atiror atwele naka anapitoke. Luketironorete kere kitaŋaleunoi.