Read Ebaibuli 1961 Marako 8 Bible Online

Marako 8 - Ebaibuli 1961 bible

Marako 8

¹ Kapaarasia kaŋun, nakejaar bobo atukot naapol, kemameete kes inyamat, konyarau ikesisiak, kolimok kes ebe,

² “Etim ekodet, naarai adaut apaarasia auni iboiete keoŋ, kwabo emameete kes inyamat,

³Arai katwara kes alosit oreriakec eriebi eteŋei, iiloros korot; ice kakesi eponito kama elwana.”

⁴Koboŋokis ikekesisiak ebe, “Okwe, epedori biai ituŋanan aisimonikin ituŋa lu kimugatin kane kamodiŋ?”

⁵Kiŋit kes ebe, “Ejaas yes imugatin imwaasi ai?” Kobalas ebe, “Ikanykaarei.”

⁶Kicorak ekodet aiboikin kwap; kolem imugatin lukanykaarei, kimala, kobilibil, koinak ikekesisiak akoranakin, kokoranakis kesi da ekodet.

⁷Kejaas da agaria nuikidioko. Kisirereŋ kes, kolimok kokoranakis ŋun da.

⁸ Konyama, kimonikinos; kotukonokis atutubeta nuabilibila nukesalete, ibukito ikanykaarei.

⁹Keraas ituŋa bala ilukumin iwoŋon. Kotwar kes.

¹⁰Atipet kodoka ataker nepepe kikekesisiak, kolot atutubeta nuka Dalamanuta.

¹¹ Kopotu Iparisayon mamakeŋ, kogeutu epeget kaŋes. Kokotos aanyunet naebuni kokuju, kokodokodata ŋes.

¹² Koom etau, kokadak komoyokeŋ, kotema atiar, “Kanukinyo emootor atur na aanyunet? Abeit katemari yes atiar, Mam cut atur na einakinio aanyunet.”

¹³Kinye kes kodoka bobo ataker, kolot okekwa juwai.

¹⁴Kimurwokis kes ayaŋaar imugatin; dimarai kejai emugati ediopet bon kakes toma ataker.

¹⁵ Kicor kes kobala ebe, “Kokwenya, kocoito aitubuunet naka Iparisayon, ka aitubuunet da naka Kerode.”

¹⁶Kiŋitanakinos bonik naarai amameete imugatin.

¹⁷ Konye kojen Yesu kotema kes atiar, “Kanukinyo iŋitanakinotor, naarai emameete yes imugatin? Eriŋa ber emisiikina, karaida ajenun? Eninik ca ma ikusitauon?

¹⁸ Ijaas kakonyen, mam ca ianyunete; ijaas kaki da, mam ca ipupunete? Mam kereka iitunito?

¹⁹ Naabilibilia imugatin ikany kanuka ituŋa ilukumin ikany, ipotu kotukonokis iditai imwaasi ai lueleleba atutubeta nuabilibila?” Kolimokis ŋes ebe, “Itomon kaluarei.”

²⁰ Ebe da, “Ka lukanykaarei kanuka ilukumin iwoŋon, ipotu kotukonokis ibukito imwaasi ai lueleleba atutubeta nuabilibila?” Kolimokis ŋes ebe, “Ikanykaarei.”

²¹Kotema kes atiar, “Eriŋa ca yes ejenuna?”

²² Kodoloto Betesaida. Koinunai emuduki, kiŋaiŋaata atiror ŋes.

²³ Kitiŋ akan naka emuduki, kitoloma kiŋa naka ere; kosodi kedau aimuikin akonyeke, ka aidokokin akekanin, kiŋit ŋes ebe, “Ianyuni ibore?”

²⁴Kosesen kuju kotema atiar, “Aanyuni ituŋa; konye esubito bala ikito elosete.”

²⁵Kanen kidokok bobo akekanin akonyeke; kosesen kotenan, koŋaleu, koany iboro kere ejok.

²⁶ Kotwar ŋes alosit oreke, kobala ebe, “Sirikiloma ber ore lo.”

²⁷Konyou Yesu nepepe kikekesisiak, koloto oreria luka Kaisarea Pilipi, Korot kiŋit ikekesisiak kotema atiar, “Ebalas ituŋa ebe arai eoŋ iŋai?”

²⁸ Kolimokis ŋes ebe, “Yokana Lokebatisan; ice ebe ‘Eliya’; ka ice da ebe, ‘Ediopet konabin.’ ”

²⁹ Kiŋit kes ebe, “Ido bo yes kibalas ebe arai eoŋ iŋai?” Koboŋok Petero kotema atiar, “Irai ijo Kristo.”

³⁰ Kicor kes kinyeis alimokin idiotuŋanan akiroke.

³¹Kogeu aisisianakin kes ebe, ibusakinit Okoku loka etuŋanan aiticanio nuipu, egirete da imakio ka isasedotin lupeti ka ikewadikak, ka aiar, kapaaran da nakiwuniet ejaruni,

³²Kinera ŋun aitebeunun. Koyaŋa Petero ŋes, kogeu aitoron,

³³Konye kibelokin kosesen ikekesisiak, kitoron Petero, kotema atiar, “Koboŋo kaukaŋ, Satan; naarai mam iwomit aomisio nuka Edeke konye nuka ituŋa.”

³⁴ Konyarau ekodet nepepe kikekesisiak, kotema kes atiar, “Arai ekoto ituŋanan aitup eoŋ, koŋerokin ilopet, korioŋ ekemusalaba, katup eoŋ.

³⁵ Naarai ŋin yenekoto aitajar akeijar etwaniari; konye ŋin yenetwaniari akeijar kanukaŋ, kanuka akiro nukajokak da, itajari ŋes.

³⁶Naarai ajokis anyoin arai kedumu ituŋanan akwapin kere, kitwatania akeijar?

³⁷Naarai etacakini ituŋanan inyo alakunia akeijar?

³⁸ Naarai yenirumete ileic kanukaŋ kanuka akakiro da kotoma atur na naadote nakadiakanaran, irumete ileic Okoku loka etuŋanan da kanukeŋ, naebunio rwaru kaibuses naka Papake nepepe kimalaikan lukalaunak.”