Read Ebaibuli 1961 Marako 9 Bible Online

Marako 9 - Ebaibuli 1961 bible

Marako 9

¹Kotema kes atiar, “Abeit katemari yes atiar, ejaas ituŋa kaŋul kaluebwoete kane lumam iirete cut atwanare, aitodol neaanyuniata ajakanut naka Edeke abu kapedor.”

² Akaulo naka apaarasia akanykape koyaŋa Yesu Petero ka Yakob ka Yokana, kogitaros bonik, kitodoka ŋesi kes oroŋat loeoja; kituluor kakonyenekec,

³kimilias ikenapen, kokwanut kiac, kopone lomam epedori ekelotan loka akwap aitwakaŋuunia.

⁴Kitakanikinos Eliya ka Musa, inerasi ka Yesu.

⁵Koboŋok Petero kotema Yesu atiar, “Ekesisianakinan, ejok oni ajaut ne; ikoto keswamata iswamin iuni, ediopet lokon, ediopet loka Musa, ka ediopet da loka Eliya.”

⁶Naarai mam kejeni nukinera, naarai apotu kokuriakata noi.

⁷ Kobu edou kiteribo kes, kolom epororo kotoma odou ebe, “Lo ŋes Okokuka lominat; kiirasi ŋes.”

⁸Atipet koŋoleŋoleoto, mam bobo eanyuna idiotuŋanan nepepe kakes dimarai Yesu bon.

⁹ Napedokunete koroŋat, kicor kes kinyeis alimokin idiotuŋanan kere nuaanyut, aitodol naejarunia Okoku loka etuŋanan kotoma okatwak,

¹⁰Koricito akirot, kiŋitanaros bonik ebe ajarun kotoma okatwak ikoni bo ai?

¹¹Kiŋita ŋes, kotemasi atiar, “Kanukinyo ineratar ikewadikak ebe ibusakinit ber Eliya aige abunore?”

¹² Kotema kes atiar, “Abeit ebunit ber Eliya aiteteun akiro kere; ido iwadikatai bo biai nuka Okoku loka etuŋanan, ebe iticanio nuipu ka amwaŋio da?

¹³ Konye katemari yes atiar, Adau Eliya abunore, kiswamakis ŋes kere nuakotos, kwape Iwadikatere nukeŋ.”

¹⁴ Nakedolioto mama ejaas ikesisiak, koanyut ekodet loapol elukunit, ka ikewadikak lukepegas kakes.

¹⁵Atipet nakeanyuniata ŋes lukokodet kere, koumokis noi, kokerata mama ejai kiyogata ŋes.

¹⁶Kiŋit kes ebe, “Nunyoika nuipegas kakes?”

¹⁷Koboŋok ediopet kotoma okodet ebe, “Ekesisianakinan, ayaŋaunit ikakoku mamakon, ejai ajokit naabaŋ;

¹⁸ido naikamunia kere, ibirokini kwap: ekui ekuetete, iriamanakin ikel, idekererar; elip ikonikesisiak aireŋear ŋes; mam epedoro.”

¹⁹Koboŋok kes kotema atiar, “Wu okwe yes atur namam iyuunit, etodoli eoŋ ai ajaut kayes? Etodoli ai da atitiŋikinit yes? Koinunai.”

²⁰Koyaut ŋes mamakeŋ; atipet nakeanyunia kisiilio ajokit; kibirokin kwap, kibelibel koku ekuetete.

²¹Kiŋit Yesu papake ebe, “Apak anyoin adau ŋesi ikoni nen?” Kotema atiar, “Ameuni keiditeu.

²²Ecakanakini irwanipu toma akim, toma akipi da, tetere emudiari: konye arai ipedori akirot kere, kitimoi sio, kiŋarak.”

²³ Kotema Yesu ŋes atiar, “Arai ipedori! Epedorio kere kama ejai yeniyuunit.”

²⁴ Atipet kiworo papa loka ikoku kotema atiar, “Eyuunit; kiŋarak amamus aiyuunika.”

²⁵Nakeanyunia Yesu ebe akeru ekodet mama ejai, kiretak ajokit naerono, kotema atiar, “Ijo ajokit naabaŋ naakimiŋ, kecorakinit jo ebe kolom kaneejai ŋesi, ido sirikiboŋok bobo.”

²⁶ Komony, kitamaran jokan, kolom do: kosubite ikoku bala atwana; kotemasi luipu ebe, “Atwana.”

²⁷Konye Yesu kitiŋ akekan, kitonyou ŋes; kobwo do.

²⁸Nakelomaria togo, kiŋita ŋes ikekesisiak kaiyeiyea ebe, “Kanukinyo mam sio kipedoria aireŋear ŋes?”

²⁹Kotema kes atiar, “Mam epedori epone lo aireŋeario kanuka akirot kere dimarai kanuka ailip bon.”

³⁰ Konyoutu kanen kitoroto Galilaya: komam ŋes ekoto ituŋanan ajenun.

³¹ Naarai kisisianak ikekesisiak, kotema kes atiar, “Elosi Okoku loka etuŋanan ainakinio akanin nuka ituŋa, kes da earete ŋes; kedau aario, akaulo kapaarasia auni ejaruni.”

³² Konye mam kes apotu kojenut akirot ŋin, koyoŋata aiŋit ŋes.

³³ Kodoloto Kaparanaum: nakejaar togo kiŋit kes ebe, “Nuunyoika nan ipegas korot?”

³⁴Konye kililiŋata: naarai kepegas bonik ka bonik korot ebe iŋai bo lokapolon.

³⁵ Kiboikin, konyarau lutomon kaluarei kotema kes atiar, “Arai ekoto ituŋanan araun yenisodit, koraun yenikawasia adepar kere, ido ikejaanakinan yenika luce kere.”

³⁶ Kolem ikoku, kisibwo kokidiŋikec: kotun ŋes, kotema atiar,

³⁷ “Ŋin yenisukunyikini idiopet kodwe kwaka yen kokirorika, kesukunyikinit eoŋ; ŋin da yenikesukunyikini eoŋ, mam kesukunyikinit eoŋ, dimarai je lokejukuni.”

³⁸ Kotema Yokana ŋes atiar, “Ekesisianakinan, kipou kaanyutu etuŋanan ireŋeari ajokin kokirorikon lomam kiupa kaoni: kesimika ŋes, naarai mam kiupa kaoni.”

³⁹ Konye kotema Yesu atiar, “Sirikisimika: naarai emamei ituŋanan yeniswamai nakapedor kokirorika, yenepedori atipet amoromor eoŋ.

⁴⁰ Naarai yenimam kitusurupit oni, erai yenikowaiwok.

⁴¹ Naarai ŋin yenikitamasi yes akoli naka akipi, naarai kimaikinitai luka Kristo, abeit katemari yes atiar, Mam cut etwaniari ainak ineteke.

⁴²“Ido yenidupori idiopet ka ludidik kalu kalukeyuunito, tiejok aenikin akukuse naepol omurisiŋike, ka acakakin aŋolol.

⁴³ Arai kidupori jo akonikan, kojepa; ejok jo alomar aijar koŋwalite itia ajaut kak anin aarei alosit ogeena, neejai akim namam eduŋei. [

⁴⁴Nemam etwania ekurutukec, karaida akim mam eduŋei.]

⁴⁵Arai kidupori jo akonikeju, kojepa; ejok jo alomar aijar icedo, itia ajaut kakeje aarei acakakinio ogeena. [

⁴⁶Nemam etwania ekurutukec, karaida akim mam eduŋei.]

⁴⁷ Arai kidupori jo akonikoŋu, kogoro: ejok jo alomar ajakanut naka Edeke idoponyony, itia ajaut kakonyen aarei acakakinio ogeena;

⁴⁸ nemam etwania ekurutukec, karaida akim mam eduŋei.

⁴⁹ Naarai ibwaikinio ŋinituŋanan akim kwape ibwaikinere abalaŋ.

⁵⁰ Ejok abalaŋ; konye arai kepianiar, itemokinio kinyo? Kojaas kabalaŋ tomakus, kojaas kainapakin bonik ka bonik.”