Read Ebaibuli 1961 Luka 12 Bible Online

Luka 12 - Ebaibuli 1961 bible

Luka 12

¹ Kapaarasia kaŋun, naketukonokinotor ilukumin luka ikodeta kiton aicakacaka, kogeu alimokin ber ikekesisiak ebe, “Kocoito aitubuunet naka Iparisayon, ŋes aisoswanut.

² Konye emamei akirot naimunonitai, namam epukorio; karaida naibwaitai, namam ejenunio,

³Aso nuinerata kamuton iirario kaica; ido nuiyeiyeata kagolai nukotoma elimonokinio kokuju otogoi.

⁴“Katemari yes ikapapero atiar, Sirikikuriakaros luearete akuan, kosodi mam bobo nuepedorete aswam.

⁵Konye kekwenyari yes loikuriaka: kokuriaka ŋol loejai apedor kedau aiar acakakin Ogeena; eebo, katemari yes ariar, Kokuriaka ŋol.

⁶Mam kereka egwelete anyiporin akany apesan aarei? Kwabo mam imurwokinio adiopet kakonyen nuka Edeke.

⁷ Konye imaritai itima da kere luka akwesikus kere, Sirikuriaka; iraas yesi luketiai adepar anyiporin nuipu.

⁸“Katemari yes atiar, ŋinituŋanan yenikalimori eoŋ kakonyen nuka ituŋa, elimori da Okoku loka etuŋanan ŋes kakonyen nuka imalaikan luka Edeke;

⁹ Konye ŋin yenikaŋeri eoŋ kakonyen nuka ituŋa, enerio ŋin da kakonyen nuka imalaikan luka Edeke.

¹⁰ Ŋinituŋanan da yeninera akirot asurokin Okoku loka etuŋanan isionio; konye yeneinyanakini Emoyo Lokalaunan mam isionio.

¹¹ Nakiyaŋaariata yes akonyen nuka atukosia ka ikayaitok ka lukapolou, sirikiyaloŋoŋoto epone arai akiro nuiboŋokinete arai nuineras;

¹²naarai kisisianakini Emoyo Lokalaunan kosawa kaŋol nuibusakinit einer.”

¹³Kotema ediopet kokodet atiar, “Ekesisianakinan, kolimok onaceka katiakata keoŋ akosikirumet.”

¹⁴ Konye kotema ŋes atiar, “Ikatunanan, iŋai bo kadakakini eoŋ araut ekatubon arai ekakoran kamakus?”

¹⁵ Kotema kes atiar, “Kocoito, kidaras bonik kama ejai airaŋaanut kere; naarai aijar naka ituŋanan mere iboro luipu luejaatar ŋesi.”

¹⁶Kolimok kes awaragan ebe, “Kebwaŋunito noi alup nuka etuŋanan lokabaran.

¹⁷Kogeu aomoom kotauke ebe, ‘Kekonak ai, naarai emamei neengadakini ikanyamat?’

¹⁸Kotema atiar, ‘Ekonakini ne; atiyatiyai idulaaka, ka aje da luitelekarito; eŋadakini nen akakima kere ka ikaboro.’

¹⁹Atemari akaijar atiar, ‘Aijar, ejaas jo iboro luipu luimonot kanuka ikar luipu; aso kijamam, konyam, komat, kolakara da.’

²⁰ Konye kotema Edeke ŋes atiar, ‘Ibaŋaana ijo! Ekotoi akoniijar akuare na; iboro da luitemokinit, eraunete lukaŋai?’

²¹ Ikoni nen yeniŋadakinit iboro luka akais kanuke elopet, komam ebari mama ejai Edeke.”

²² Kotema ikekesisiak atiar, “Kanuka ŋun katemari yes atiar, Siriyaloŋoŋoete kanuka akusiijar, luinyamete, karaida kanuka akusiwat luinapete,

²³Naarai aijar itelekarit inyamat, ka akuan da itelekarit anapito.

²⁴ Koomito ikuruka ebe mam eyeete kwabo mam idwenyete, emameete aiŋadisia karaida idulaa; konye itanyami kes Edeke, Itelekarito cama yesi noi akweny!

²⁵Iŋai bo kayes kiyaloŋoŋ epedori aiyatakin akeibut?

²⁶Aso do arai mam ipedorete akirot naedit noi kwaŋin, kanukinyo iyaloŋonooro kanuka ace kere?

²⁷ Koomito aapecelun, kwape epolooto; mam itaaritos, karaida aoj; konye katemari yes atiar. Ka Solomon da kotoma aibusesuke kere mam esiritoi kojokan kwape adiopet kaŋun.

²⁸Aso arai itanapi Edeke kwaŋin inya luka ais, Iuejaas lolo, ecakario moi oupa; itelekarit cama noi aitanap yes, okwe yes luedit aiyuun.

²⁹Sirikimoata luinyamete karaida nuimasete, kwabo sirikibuonokinos.

³⁰Naarai emooto atekerin kere nuka akwapin ŋun kere: konye ejeni Papakus ebe ipudasi yesi ŋun.

³¹Konye komoata akejakanut, kiyatakinio da ŋun.

³² “Ijo esipan loedit, sirikikurianar, naarai isiyalamikinit Papakus ainakin yes ajakanut.

³³ Kogwelanasi luijaatar, kokora lukaitim; kodonyonokinos iriagin lumam emojoŋete, emono kotoma akuj lomam iŋoŋar, aibois namam eapikini ekokolan, karaida ikajekel amunaun.

³⁴Naarai nepejai akusibar, nepenen ejaikinos ikusitauon da.

³⁵ “Koenito akusiŋabes, konokete da akusitalai;

³⁶ yes da ikulepek kosubito bala ituŋa luidarete ejakaitikec naeboŋunio koiterane tetere naebunio aikuŋukuŋ koŋaikis atipet.

³⁷ Isirereŋitoi ibulesin ŋul luedumuni ejakaitikec ekwenyete naebunio; abeit, katemari yes atiar, eeni akeŋabet, isukunyikini kes onyamat, ebuni ŋesi elopet ijaanakini kes.

³⁸Arai kebu kakwenyunet nakiareit, arai nakiwuniet, kodum ikote nen, isirereŋitoi ibulesin ŋul.

³⁹ Konye kojenutu akirot na ebe arai kejeni elopet etogo esawa loebunio ekokolan, tikekweny, kwabo timam kejalaki eketogo abokio.

⁴⁰Yes da kokapakina; naarai ebuni Okoku loka etuŋanan kosawa lomam iwomito.”

⁴¹Kotema Petero atiar, “Ejakait, kilimokinit sio bon awaragan ŋin, arai bo ituŋa kere?”

⁴² Kotema Ejakait atiar, “Aso iŋai bo erai ekeŋadan lomunot loepiriana, lokedakakini ejakaitike ayait lukokaleke kere akoranakin kes ikecenyamat kapakikec?

⁴³Isirereŋitoi ebulesit ŋol, loedumuni ejakaitike iswamai kwaŋin naebunio.

⁴⁴ Abeit katemari yes atiar, Edakakini ŋes ayait luejaatar kere.

⁴⁵Konye arai etemari ebulesit ŋol otauke ebe, ‘Eyap ejakaitika abunore,’ kogeu aibuŋ itelepai ka apesur, ka ainyam ka aimat ka amer da;

⁴⁶ebuni ejakait loka ebulesit kaŋol kapaaran namam eomit, ka esawa da lomam ejeni, etubi ŋes katutubeta aarei, itebei ekewai nepepe kalumam iyuunito.

⁴⁷ Ebulesit ŋol loejeni nuekoto ejakaitike, komam ekapakin, karaida aswam nuekoto ejakaitike, edaio luipu.

⁴⁸Konye ŋol lomam ejeni, kiswama da nuibusakinito adaia, edaio luikidioko. Ŋin da yeneinakinitai nuipu, emoio nuipu kamake; ŋin da yenititiŋito ituŋa nuipu, iburaete nuiyatakina.

⁴⁹“Abunit acakakin akim akwap; ti akoto kinokokinitete sek!

⁵⁰ Ejai aibatis naebusakinit aibatisao; ido aridakina cama eoŋ kiton neitodolikinere!

⁵¹ Aso iwomitos kereka ebe abu kabu ayaŋaun ainapakin toma akwap? Katemari yes atiar, Mam; dimarai atiakatiak:

⁵²naarai amear kwana ejaikinos ituŋa ikany togo ediopet, etiakas iuni aluikin iarei, ka iarei da aluikin iuni;

⁵³ etiakas, papa eluikini okokuke, ka okoku da eluikini papake, toto eluikini akokuke, ka akoku da eluikini totoke, tataa eluikini ateranike, ateran da eluikini tataake.”

⁵⁴ Kotema ŋesi ikodeta da atiar, “Naianyuniata edou edakun koto, atipet ibalas ebe, ‘Etepi nat akir’; ido ejaun kwaŋin,

⁵⁵Naianyuniata ekusi ekwam loka eŋalakimak, ibalas ebe, ‘Ejaun aibuse naepol’; ejaun da kwaŋin,

⁵⁶Yes lukesoswai, ijenete aŋicun ejautene loka akwap ka akuj; konye kanukinyo mam ijeniata aŋicun apak na?

⁵⁷“Kanukinyo mam yes ikulepek itubioto nueraas nukabeit?

⁵⁸ Naarai naiupatarar ka lokiwosat alosit mama ejai ekayaiton, kinyikok ainerun kaŋes korot nuka aipuc, kinyek aidilidilar jo mama ejai ekatubon, ekatubon da kijaikini akanin nuka eketatacan, eketatacan da kieakakini aidaris.

⁵⁹Katemari jo atiar, Mam cut ilomuni kanen aitodol naidaunia atacakin apesa nakawasia.”