Read Ebaibuli 1961 Luka 16 Bible Online

Luka 16 - Ebaibuli 1961 bible

Luka 16

¹Kotema bobo Yesu ikekesisiak atiar, “Kojai etuŋanan ekabaran lokejai ekekeŋadan, kirupeai ŋol kamake ebe eweliwel iboroke.

²Konyarau kotema ŋes atiar, ‘Akiro nunyoika nu nueirarit kamakon? Kimar iboro luka akoniiŋad, naarai mam ipedori bobo araut ekeŋadan.’

³Kotema ekeŋadan je kotauke atiar, ‘Kekonak ai, naarai kadema papaka aiŋad? Emamei eoŋ agogoŋ akor, kerumito da ileic ailipitoi.

⁴Ajeni nueswamai, tetere keereŋei kaiŋadakaŋ, kesukunyikis otogoikec.’

⁵Konyarau lukapesenin luka ejakaitike ŋolidiopet, kotema losodit atiar, ‘Inyo bo kiburai ejakaitika jo?’

⁶Kobala ebe, ‘Aitemisio akwatat nuka akinyet.’ Kolimok ebe, ‘Kolem akoniitutuket, kiboikin atipet, kiwadik akaisakany.’

⁷Kosodi atemar ece atiar, ‘Inyo bo kiburao jo?’ Kobala ebe, ‘Aitemisio akwatat nuka akima.’ Kotema ŋes atiar, ‘Kolem akoniitutuket, kiwadik akaisakanykauni.’

⁸ Kitojok ejakaitike ekeŋadan lokeŋalan kanuka aswam nukapirianut; naarai idwe luka akwapin kanu kotoma aturikec ejaas kapirianut aitelekarit idwe luka aica.

⁹ Katemari yes atiar, Koneronosi ipapero kotoma abar naka amamus adolit, tetere naemamuunor, kisukunyikis yes toma aiboisio nuka ikar kere.

¹⁰ “Yenimunot kakirot naedit noi, erai yenimunot kakirot naepol; ŋin da yeniŋalai kakirot naedit, erai yeniŋalai da kakirot naepol.

¹¹Aso arai mam yes iraas lumunon kotoma abar naka aiŋal, iŋai bo kisiŋadikini yes abar nakabeit?

¹²Arai mam iraas lumunon kotoma kaŋul kalueraas luka ice, iŋai bo kiinakini yes lueraas lukus ikulepek?

¹³ Emamei ekejaanakinan loepedori aijaanakin ijaka iarei, naarai arai elai ediopet, komina loce, arai bo iketakin kediopet emeni loce. Mam ipedorete aijaanakin Edeke ka aijaanakin abar da.”

¹⁴ Kiirasi Iparisayon lueminas apesan ŋun kere, kimuasi ŋes.

¹⁵ Kotema kes atiar, “Iraas yesi luitojokas araut ikadolitok kakonyen nuka ituŋa, konye ejeni Edeke ikusitauon; naarai yenitopolooritai kotuŋa erai yeniketal kakonyen nuka Edeke.

¹⁶ “Kejaas ikisila ka inabin kiton Yokana; ameun kapak kaŋin elimonokinio akiro nukajokak nuka ajakanut naka Edeke, ebelakini da ŋinituŋanan kagogoŋ.

¹⁷ Konye epatana akuj ka akwap adaun itia aicunyakinet adiopet naka ikisila apalunio.

¹⁸ “Ŋolituŋanan loereŋeari akeberu komany ace adotear, ŋol da loemanyi nakireŋeari okilenike adotear.

¹⁹“Kojai etuŋanan lokabaran, lokenapenenei egoe lomuge ka ebaputa loejok, kolakanar ŋinipaaran koboro luetaitaete.

²⁰Kojai da lokican ekekiror Lasaro, loeperionokino oruteke, kojaas kajimii nuipu.

²¹ Kimiela ŋesi aimonianakin ararasia nukedoenenete komesa loka ekabaran; koponenenete iŋokwo da aime akejimii.

²²Kosodi kanen kotwana lokican, kodakasi imalaikan atorob naka Aburaam. Kotwana ekabaran da, konukai.

²³Kitonyou akekonye kotoma Okatwak, kanekejaar toma aikilianar naepol, koany Aburaam kama elwana ka Lasaro da katorobuke.

²⁴Kiworo ebe, ‘Aburaam Papa, kitimoi, kijuk Lasaro kidomak kiŋaren kebokoritike akipi ketojonia akaŋajep; naarai arieba noi kotoma akim na.’

²⁵Kobala Aburaam ebe, ‘Okokuka, kiitu ebe ibu ijo kodum nukajokakakon kotoma aijarakon, ka Lasaro da kwaŋin kodum nukaronok; konye kwana italakario ŋes kane, ka jo da kisiriebio.

²⁶Mere ŋun bon, konye kidiŋikosi kayes ejai asoogot naidul, tetere ŋulluekotosi anyoun kane mam epedorete atubun mamakus, emameete da luepedorete anyoun kaŋina ailamun mamakosi.’

²⁷Kotema atiar, ‘Aso papa, keŋaiŋait, kijuka ŋes togo loka papaka,

²⁸naarai ejaas eoŋ iinacan ikany, tetere ikwenyari kes, kinyeis kesi da adolun aibois na nakaikilianar.’

²⁹ Konye kobala Aburaam ebe, ‘Ejaas kes kaMusa ka inabin, kiirasi ŋul.’

³⁰Kotema atiar, ‘Mam, Aburaam Papa; konye arai kelot etuŋanan loenyouni kokatwak, itoronikinos.’

³¹ Kotema ŋes atiar, ‘Arai mam iirarete Musa ka inabin, mam ecamunete karaida kejaru ituŋanan kokatwak.’ ”