Read Ebaibuli 1961 Luka 19 Bible Online

Luka 19 - Ebaibuli 1961 bible

Luka 19

²Ido koany, kojai etuŋanan ekekiror Sakayo; korai eketeleman esolo lokapolon, kerai da ekabaran,

³Kemoot ŋol aanyun Yesu kerai loka epone enyoin, mam epedoro kanuka ekodet, naarai kewuriana ŋesi.

⁴Koker kiŋaren, kodoka kuju osukamin, tetere eanyuni; naarai itorunit orot ŋol.

⁵Nakedolio Yesu aibois ŋin, kosesen okitoi, kotema atiar, “Sakayo, kodoku atipet; naarai kebusakinit lolo aiboikin togokon.”

⁶Kodoku atipet, kisukunyik ŋes kaiyalama.

⁷ Nakeanyuniata ituŋa kirurumata kere, kobalas ebe, “Aloma aiboikin ketuŋanan lokadiakanaran.”

⁸ Kobwo Sakayo, kotema ŋesi Ejakait atiar, “Koany, Ejakait, akorakini lukican atutubet naka ikaboro; arai da arodit ituŋanan idiobore, atacakini irwan aoŋon.”

⁹ Kotema Yesu ŋes atiar, “Adolu lolo aitajario togo lo, naarai erai ŋesi da okoku loka Aburaam.

¹⁰ Naarai abu Okoku loka etuŋanan amoot ka aitajar yenikeoliorit.”

¹¹ Nakiirariata ŋun, kiyatak alimokin awaragan, naarai keapie ko Yerusalem, ido naarai komunosi ebe etakanuni ajakanut naka Edeke atipet.

¹² Aso kobala ebe, “Kojai etuŋanan lokapolon, kolot akwap naelwana, tetere edumuni ajakanut, kosodi konyet aboŋun,

¹³Konyarau itomon kobulesinike, koinak kes ŋinituŋanan arupian atomon, kotema kes atiar, ‘Aso kogwelanasi aitodol neaboŋunio.’

¹⁴ Konye kolaata ŋes ituŋa lukoreke, kiyakiasi ikiyakia atupar ŋes, alimokin ebe, ‘Mam kikoto ŋol ayait sio.’

¹⁵Kosodi kanen nakeboŋunio, kodumunite akejakanut, kicorak anyaraun ibulesin ŋul luainakinit arupian, tetere ejenuni ameda naadumut kanuka agwelanar.

¹⁶Kobu losodit akonyeneke, kobala ebe, ‘Ejakait, akonirupia emedau ace atomon.’

¹⁷ Kotema ŋes atiar, ‘Iswama ejok, ijo ebulesit loejok! Naarai irai lomunot kakirot naedit noi, koyaŋa apolou naka ireria itomon.’

¹⁸Kobu lokiareit da, kobala ebe, ‘Ejakait, akonirupia emedau ace akany.’

¹⁹Kotema ŋes atiar, ‘Ijo da koyaŋa ireria ikany.’

²⁰Kobu ece da kobala ebe, ‘Ejakait, koany akonirupia na, naeŋadakinit ogoe.

²¹Naarai abu kakurianar jo, naarai irai loininik: ilemuni numam ibwaikinit, idwenyi da numam iyeit.’

²²Kotema ŋes atiar, ‘Katubokini jo kakiro nuka aitukukon, ijo ibulesit loerono! Ibu kojeni ebe aninik eoŋ, alemi numam ebwaikinit, adwenyi da numam ayeit.

²³Aso kanukinyo mam kiinakinia akarupian mama ejaas ikagwelanarak, tetere neabunio kadum nepepe kamedakec?’

²⁴Kobala lukebwoete eapias ebe, ‘Kodemut arupia, koinakis je loka arupian atomon.’

²⁵Kotemasi ŋes atiar, ‘Ejakait, ejaas ŋes arupian atomon.’

²⁶ ‘Katemari yes atiar, yenejai ibore einakinio; konye yenemamei ibore, edemunio ŋin da yenejaas kaŋes.

²⁷Bobo da ŋul lukasurupoka, lumam akotos eoŋ ayait kes, koyaut ne, koarata kakonyeneka.’ ”

²⁸Nakedaunia einer ŋun, kiŋarenik kes adokar Yerusalem.

²⁹ Kosodi kanen nakeapiki Betepage ka Betaniya, komoru loenyaritai loka Iseitunin, kijuka iarei kokesisiak,

³⁰kobala ebe, “Koloto ore loisesenete; nailomariata toma idumunete ikoku yenika asigiria eenitai, yenimam lem ibwanenit idiotuŋanan: kolacut, koinut.

³¹Arai kiŋisi ituŋanan ebe, ‘Kanukinyo ilacariata?’ iboŋokinete ebe, ‘Ejakait ipuda ŋes.’ ”

³²Koloto lukijukario kodumut kwape kelimokinitere.

³³Napelacunete ikoku yenika asigiria, kobalas ikulepek ebe, “Kanukinyo ilacariata isigiria?”

³⁴Koboŋokis ebe, “Ejakait ipuda ŋes.”

³⁵Koyaŋaut mama ejai Yesu, kopetanakis isigiria ikecenapen, kisibwanenoto Yesu.

³⁶ Napelosi, kopetanakis ikecenapen orot,

³⁷Nakeapikinia aijesaret naka Emoru loka Iseitunin, kogeu ekodet kere loka ikesisiak ailel ka aiturit Edeke keporoto loepol kanuka aswamisio kere nukapedor nuaanyut.

³⁸ Kobalas ebe, “Isirereŋitoi Ekabaka loebunit kokiror loka Ejakait! Ainapakin kotoma akuj, ka aibuses da kokuju kakuj!”

³⁹Ice koParisayon lukejaas toma okodet kotemasi ŋes atiar, “Ekesisianakinan, kitoron ikonikesisiak.”

⁴⁰Koboŋok ebe, “Katemari yes atiar, Arai kililiŋata lu, iworoete do amor.”

⁴¹ Nakeapiki koany ere, komonyak,

⁴² kobala ebe, “Arai kojeni ijo kapaaran kana akiro nukiinakinete ainapakin! Konye kwana ibwaitai kakonyenekon.

⁴³Naarai epote apaarasia nukidukokiniata lukasurupokon itutio airigaunia, kiridakinete jo airiamar iwaitin kere,

⁴⁴ kibirokinete jo kwap, ka ikonidwe kotomakon, komam kinyeiniata amoru naidokokino amoru nace; naarai mam ibu kojen apak naka aanyanariokon.”

⁴⁵ Koloma toma oyekalu kogeu aireŋear lukagwelanarak.

⁴⁶ Kobala kes ebe, “Iwadikatai ebe, ‘Ekatogo eraun etogo lokilipet’; konye yes ituluosi abua naka ikaŋatak.”

⁴⁷ Kisisianakini ŋinipaaran kotoma oyekalu, Konye komooto isasedotin lupeti ka ikewadikak ka ikapolok luka ituŋa amudiar ŋes;

⁴⁸konye mam eanyuna nuepedorete aswam, naarai kokotos noi ituŋa kere akiirar ŋes.