Read Ebaibuli 1961 Luka 24 Bible Online

Luka 24 - Ebaibuli 1961 bible

Luka 24

¹ Kiyeŋutu kapaaran nakasabato, kwape kejaar aicorakinet. Konye kapaaran nasodit nakasabato, tupuruc sek, koloto ates, koyaŋaasi lueuru maa lukitemokinito.

²Kodumut amoru kikokorior kates.

³Kolomasi toma mam eanyuna akuan naka Ejakait Yesu.

⁴Kosodi kanen, napebuonokinos kanuka akirot kaŋin, koany, kobwaata ituŋa iarei aapu kakes enapito inapen luimilias;

⁵nakekuriakarotor kesi ka aitulur akonyenekec kwap, kotemasi ŋul atiar, “Kanukinyo imoototor lokajaran mama ejaas lukatwak?

⁶ Emamei kane, konye ajaru, Kiitutu kwape enerar kayes eroko ejai Galilaya,

⁷ebe ibusakinit Okoku loka etuŋanan ainakinio akanin nuka ikadiakanarak, ka aibubukinio, ka ajarun da kapaaran nakiwuniet.”

⁸Kiitut akiroke,

⁹koboŋosi kates, kolimokis lutomon kadiopet ka ice da kere, akiro ŋun kere.

¹⁰ Keraas kesi Mariam Magadalene, ka Yoana, ka Mariam toto naka Yakob, ka aŋor ace nuajaas nepepe kakes, nualimokinete ikiyakia akiro ŋun.

¹¹Kosubito akiro ŋun kakonyenekec bala nukabaŋaanut; mam apotu kiyuut kes.

¹²Konye konyou Petero, koker kiton ates; kokukum kireik toma, koany igoen luka ebaputa egitara; koboŋo ore eumokinit nuajaut.

¹³ Ido koany, kapaaran kaŋin alosete iarei kakesi ore ediopet ekekiror[3] Emao, lokelwanikina ko Yerusalem bala amairon akanykaarei,

¹⁴kineranakinos kesi bonik akiro ŋun kere nuadoikis.

¹⁵ Napinerasi epeganakinos, kikunyak Yesu elopet koupakinos kakes.

¹⁶Konye koraparai akecekonye kinyeis ajenun ŋes,

¹⁷Kotema kes atiar, “Akiro anyoika ŋun nuineranakinos ilosete?” Kobwaata ekadakinito.

¹⁸Kosodi ediopet kakes, ekekiror Keleopa, Koboŋok ebe, “Ijo bon ipejonikinit ko Yerusalem tape mam ijeni nuadoikis nen kapaarasia kanu?”

¹⁹ Kotema kes atiar, “Anyoika?” Kotemasi ŋes atiar, “Akiro nuka Yesu loko Nasaret, lokerai enabi lokapedor kotoma aswamisio ka akiro kakonyen nuka Edeke ka ituŋa da kere.

²⁰Bobo da epone loejaikiniata ŋes isasedotin lupeti ka ikayaitokowok toma atubokinio naka atwanare, kibubukis.

²¹ Konye kipou isio kamunosi ebe ŋes loekoto alakun Isirael. Eebo, keja ŋun da, lolo ŋes apaaran nakiwuniet ameun naeswamatar akiro ŋun.

²² Bobo da, kituwumokis sio ace kaŋor nukokodetekosi, nuadilito sek ates,

²³mam eanyuna akekuan; kopotu ebalas ebe etakanikina kes imalaikan luabalas ebe ejari ŋesi.

²⁴ Ice da lukejaas nenipe kasio apotu koloto ates, koanyut kwape kwaŋin kwape eneratar aŋor kwa; konye mam apotu koanyutu ŋes.”

²⁵Kotema kes atiar, “Wu yes luedit aijen, luiyapete da itauon aiyuun kere nukineras inabin!

²⁶Mam kereka ebusakinit Kristo aiticanio ŋun, ka alomar da toma aibusesuke?”

²⁷ Kosodi ageun kama ka Musa ka inabin kere kitejen kotoma kanukiwadikatai kere akiro nuabeito ŋes.

²⁸Keapikis ere lokelosete, kosubite bala elitor kiŋaren;

²⁹konye kitiŋaasi ŋes, kobalas ebe, “Kosalak ne kasio, naarai ekamus akwap, aapu apaaran adaun.” Koloma kosal kakes.

³⁰ Kosodi nakiboioto kakes enyamete, kolem emugati, kisirereŋ, kobilibil koinak kes.

³¹Kopukoroi akecekonye kojenut ŋes; koolio kakonyenekec.

³²Kotemanaros bonik atiar, “Mam tope amulaete iwokotauon naenerar kaoni korot, ka aikujonokin oni nukiwadikatai?”

³³Konyout kosawa kaŋope kaŋol koboŋosi Yerusalem, kodumut lutomon ka lodiopet etukokina, kes ka lukejaas nepepe kakes,

³⁴ ebalas ebe, “Abeit ajaru Ejakait, etakanikin ŋesi Simon,”

³⁵Kes da kolimokis akiro kwa nukorot, ka epone lokitejenunor mamakec kotoma abilibil emugati.

³⁶ Napinerasi akiro ŋun kobwo Yesu elopet kokidiŋikec, kotema kes atiar, “Kinapakinos.”

³⁷ Konye korieŋutu kokuriakata noi, koomitos ebe aanyut etoil.

³⁸Kotema kes atiar, “Kanukinyo iyaloŋoŋooto, kanukinyo da iŋitanarotor kotauonokus?

³⁹Koanyutu akakanin ka akakeje, ebe eoŋ lopelo: kotiroroi, koanyutu; naarai emamei etoil akuan, ka akojo da, kwape ianyuniata ejaas eoŋ.”

⁴⁰Kedau einer ŋun, kitodik kes akekanin ka akekeje,

⁴¹Naarokotor mam iyuuna kanuka aiyalama, koumokis da, kotema kes atiar, “Ejaas yes idisinyamat?”

⁴² Koinakis atutubet naka agar naipoo.

⁴³Kolem, konyam kakonyenekec.

⁴⁴ Kotema kes atiar, “Nu kes akakiro, nuabu kalimok yes, naariŋar ajai kayes, ebe ibusakinit kitodolikinos akiro kere nuiwadikatai kokisila luka Musa, ka inabin, ka isabulin, nukabeito.”

⁴⁵Kosodi kikujok akececoa ajenun nukiwadikatai.

⁴⁶ Kotema kes atiar, “Kwaŋin iwadikatai ebe ibusakinit Kristo aiticanio, ka ajarun da kotoma okatwak kapaaran nakiwuniet.

⁴⁷Ebe da elimonokinio atekerin kere kokirorike aitoronikin ka aisionio naka adiakanareta, agear ko Yerusalem,

⁴⁸iraas yesi da ikajenak luka akiro kaŋun.

⁴⁹ Ido koany, kejukakini yes aisumunet naka Papaka; konye kiboikinos ore, aitodol nekitanapere yes apedor naebuni kokuju.”

⁵⁰ Kosodi kiŋarenik kes kiton Betaniya, korio akekanin kisirereŋ kes.

⁵¹Kosodi kanen napisirereŋi kes, kotiakar kamakec, koyaŋaarai toma akuj.

⁵² Komaata ŋes, koboŋosi Yerusalem kailel naepol:

⁵³Kojaenenas duc toma oyekalu, ituritos Edeke.