Read Ebaibuli 1961 Luka 4 Bible Online

Luka 4 - Ebaibuli 1961 bible

Luka 4

¹ Kosodi Yesu, kilelebun Emoyo Lokalaunan, koboŋo koYorodan, kiŋarenik Emoyo Lokalaunan amodiŋ,

²kodau apaarasia akaisaoŋon, ecoduni Satan ŋes. Kapaarasia kaŋun mam kenyami ibore: kedaunos, korieb eteŋei,

³Kotema Satan ŋes atiar, “Arai tope irai ijo Okoku loka Edeke kicorak amoru na koraun atap.”

⁴ Koboŋok Yesu ŋes ebe, “Iwadikatai ebe, Mam ituŋanan ejari kanuka atap bon.”

⁵Kitodoka kuju, kitodianak ajakanuto kere nuka akwapin, katipet,

⁶Kotema Satan atiar, “Kainakini jo apolou na kere, ka aibusesukec; naarai kainakinitai eoŋ; eoŋ da ainakini yenakoto kere.

⁷Aso arai kiima eoŋ, eraunete kere nukon.”

⁸ Koboŋok Yesu kotema ŋes atiar, “Iwadikatai ebe, Komaenenei Ejakait Ekonideke, kijaanakinenei ŋes bon.”

⁹Koyaŋa ŋes Yerusalem, kisibwo koswi loka eyekalu, kotema atiar, “Arai tope irai ijo Okoku loka Edeke, kosomari kwap.

¹⁰ Naarai iwadikatai ebe, Icorakini ikemalaikan kanukon, kidarata jo.

¹¹ Ido, Kidakete jo kakaninikec, Kinyek amoru aiguikin akonikeju.”

¹² Koboŋok Yesu kotema ŋes atiar, “Ebalai ebe, Sirikodununei Ejakait Ekonideke.”

¹³ Nakedaunia Satan ŋinicodunet, kinyek ber ŋes.

¹⁴ Koboŋ Yesu kapedor naka Emoyo, kolot Galilaya: kisiarakin ekeemutu anatar akwapin kere nuidunyatar.

¹⁵Kisisianakinenei kotoma atukosiakec, kitopolooritos ituŋa kere.

¹⁶ Kobu Nasaret, kama kitopolounere; kapaaran nakasabato koloma toma atukos, kwape kejaar ekepitene, kobwo asoman.

¹⁷ Koinakinai eitabo loka enabi Isaia. Kopuko eitabo, kodum aibois mama kiwadikatai ebe,

¹⁸ “Emoyo loka Ejakait ejai keoŋ, Naarai abu kenyonyoik akinyet alimonokin lukican akiro nukajokak; Kejuk eoŋ alimor aosikinio mama ejaas luijoreoritai, Ka imudukiok da akwenyun, Alakakin lueridakinitai.

¹⁹ Alimor da ekaru loka Ejakait loecamunitai.”

²⁰Korapak eitabo, kinyakak ekejaanakinan, kiboikin; kosesenata ŋes noi ituŋa kere lukejaas atukos.

²¹Kogeu alimokin kes ebe, “Etodolikin lolo nukiwadikatai nu toma akiikus.”

²² Kitejenut kere, koumokis akiro nukasianut nukelomunete kaitukuke: kobalas ebe, “Mere lo okoku loka Yosep?”

²³ Kotema kes atiar, “Abeit ipote ainerakin eoŋ awaragan na ebe, ‘Emurwon, kitaŋaleun bon: ŋun kere nukiiranari ebe kiswamat Kaparanaum, kiswama kane da kobukus.’ ”

²⁴ Kotema atiar, “Abeit katemari yes atiar, Emamei enabi loecamunio kobukec.

²⁵ Konye abeit katemari yes atiar, Kojaas kolo apuserun nuipu koIsirael kapaarasia nuka Eliya, apak nakegolitere akuj ikar iuni ka ilapio ikanykape, nakedoikinio ebeli loepol akwap kere;

²⁶ mam aponi kijukarai Eliya mama ejai adiopet kakesi, dimarai Sarapeta, kakwap naka Sidon, mama ejai aberu nakerai apuserut.

²⁷ Kojaas da lukatapon luipu koIsirael kapaarasia nuka Elisa enabi; mam yenaponi kiswagarai, dimarai Naaman Esuriat.”

²⁸Nakiirariata kesi akiro ŋun kotoma atukos, kilelebunos kere anyunyura.

²⁹Konyoutu, koremosi kiŋa ka ere, koyaŋaasi neetukum koukot loadukokinitai ekecere, tetere eremorete ŋes kwap cut.

³⁰Konye ŋes kitoro kidiŋikec kolot.

³¹ Kikokorun kiton Kaparanaum, ore loko Galilaya. Kisisianak kes kapaaran nakasabato,

³² Koumokis noi ituŋa akeisisianakin; naarai kejai akekirot apolou,

³³Kejai etuŋanan atukos lokejai emoyo loka ajokit naerono, kiworo keporoto loepol ebe,

³⁴“Kinyeinai! Anyoika isio kajo, Yesu loko Nasaret? Ibu kereka amudiar sio? Kajeni jo kwape iraar, Lokalaunan loka Edeke.”

³⁵Kiretak Yesu ŋes ebe, “Kobuta, kolom kamakeŋ.” Kibirok ajokit lokadekan kidiŋikec, konyou kamakeŋ, komam imadiŋit,

³⁶Koumokis kere, kineranakinos bonik ka bonik ebe, “Akirot anyoin na? Naarai icorakini imoyon lueroko kapolou ka apedor, elomunete da.”

³⁷Kisiarakin ekeemut anatar aiboisio kere nuidunyatar akwap ŋin.

³⁸ Konyou katukos koloma togo loka Simon. Kedeka toto naka aberu naka Simon ekamidi loepol; kiŋaiŋaata ŋes kanukeŋ.

³⁹Kobwo kama ejai, kiretak ekamidi; kinyek ŋin: atipet konyou kijaanak kes.

⁴⁰Napibiror akoloŋ, ŋul kere lukejaas ituŋa lukedekasi adekesia nuegelegela koinut ŋes; kidokok akekanin ŋinidiopet kaŋul, kitaŋaleu kes.

⁴¹ Konyoununut ajokin da kaneejaas luipu, kiworoto ebe, “Irai ijo Okoku loka Edeke.” Kiretak kes, kisimik einer, naarai kejenete ebe ŋes Kristo.

⁴²Kosodi kiwala akwap, konyou kolot aibois naesil; komoata ŋes ikodeta, kopotu mama ejai, kokotosi aitasal ŋes, kinyek anyoun kamakec.

⁴³ Konye kotema kes atiar, “Kebusakinit alimonokin akiro nukajokak nuka ajakanut naka Edeke koreria ice da: naarai ŋin keyakuunere.”

⁴⁴ Kolimonokinenei katukosia nuko Galilaya.