Read Ebaibuli 1961 Luka 6 Bible Online

Luka 6 - Ebaibuli 1961 bible

Luka 6

¹ Kosodi kanen nakitoritor amanat apaaran nakasabato, kijejeata ikekesisiak aluŋuren nuka akima, koninata kakanin konyama.

² Konye ice koParisayon kotemasi atiar, “Kanukinyo iswamaata yesi numam ibus kapaaran nakasabato?”

³ Koboŋok Yesu kotema kes atiar, “Mam isiomito na nakiswamai Daudi, nakeriebia eteŋei, ŋes ka ikepaup;

⁴ kwape kelomaria togo loka Edeke, kolem imugatin luka aitodikin, konyam, koinak da ikepaup; lumam ibus ainyam dimarai isasedotin bonik?”

⁵Kotema kes atiar, “Okoku loka etuŋanan ŋes ejakait loka asabato.”

⁶ Kosodi kanen, kanakasabato ace, koloma toma atukos kisisianak: kojai nen etuŋanan, lokewonit akekan nakoteten.

⁷ Kiteikinito ikewadikak ka Iparisayon, aanyun arai itaŋaleuni kapaaran nakasabato; tetere edumunete akirot nakiwosaet ŋes.

⁸Konye kojeni akeceomisio; kolimok etuŋanan lokejai akan nakewonit ebe, “Konyou, kobwo kokidiŋ.” Konyou ŋesi kobwo.

⁹Kotema Yesu kes atiar, “Keŋisit yes ebe, Ibus kereka aswam nuejok kapaaran nakasabato, arai bo aswam nueroko, aitajar aijar arai bo amudiar?”

¹⁰Kosesen kes kere, kolimok je ebe, “Korio akonikan.” Kikonak nen: koŋaleu akekan,

¹¹Konye kilelebun kes anyunyura, kinerut bonik nuiswamakinete Yesu.

¹² Kosodi kanen kapaarasia kaŋun, kolot oroŋat ailip; kilip Edeke akuare kiya.

¹³ Kiwala akwap, konyarau ikekesisiak; koseu itomon ka luarei kotomakec, luabu komaik ikiyakia;

¹⁴Simon, loamaikini Petero, ka Anderea onaceke, ka Yakob ka Yokana, ka Pilip ka Batolomayo,

¹⁵ka Matayo ka Tomas, ka Yakob okoku loka Alupayo, ka Simon loenyaritai Selot,

¹⁶ka Yuda okoku loka Yakob, ka Yuda Isikariot, lokebilakini ŋes ebotet.

¹⁷ Kikokorun nepepe kakes, kobwo kaibois kanaeriana, ka ekodet loepol loka ikekesisiak, ka ituŋa luipu noi lukepote koYudaya kere ka Yerusalem, ka ariri nakaŋolol nako Turo ka Sidon, lukepote akiirar ŋes, ka aitaŋaleunio akecedekesia:

¹⁸ŋul da lukiticanete imoyon lueroko aponi kitaŋaleunoi.

¹⁹Kokotos lukokodet kere atiror ŋes; naarai kolom apedor kamakeŋ kitaŋaleu kes kere.

²⁰ Kikeu akekonye kosesen ikekesisiak, kotema atiar, “Isirereŋitoi yes lukican; naarai ajakanut naka Edeke erai nakus.

²¹ “Isirereŋitoi yes lukiriebi eteŋei kwana; naarai imonikinos. “Isirereŋitoi yes luimonyete kwana: naarai ikieniete.

²² “Isirereŋitoi yes, nakiŋaruniata ituŋa, kigitarete yes, kimoromoroete, ecakarete ekusikiror bala ibore yenerono, kanuka Okoku loka etuŋanan.

²³ Kolelakis ka eicur apaaran ŋin: naarai koany, epol ekusiropit kotoma akui: naarai kikonakis, lukapapaakec inabin kwaŋin.

²⁴ “Konye itukwi yes lukabarak! Naarai idaut adumun akusiitaakario.

²⁵ “Itukwi yes, luimonikinos kwana! Naarai ebuni eteŋei airieb yes. “Itukwi yes, luikienasi kwana! Naarai ipote aibworo ka aimony.

²⁶ “Itukwi yes, lukiturete kwana kere! Naarai kikonakis lukapapaakec inabin lukeŋalak kwaŋin.

²⁷ “Konye katemari yes luipupete atiar, Kominasi lukasurupokus, kikonakinete nuejok ŋul lukinaras yes,

²⁸kilipakis arereŋ ŋul lukilamete, kilipakis da ŋul lukireito yes.

²⁹Yenikibapi eitinyo, kibelok loce da; yenikidemari ekonilou, sirikimik ekaso da.

³⁰Koinak ŋinituŋanan kere yenikilipi; yenikidemari jo ikoniboro sirikiburau bobo.

³¹ Kwape ikototor ituŋa aikonakin yes, kikonakis yesi da kes kwape kwaŋin.

³²“Arai iminasi ŋul lukiminasi yes, kimalao kanuka inyo? Naarai ikadiakanarak da eminasi lueminasi kes.

³³Arai da iswamakinete nuejok ŋul lukiswamakinete yes nuejok, kimalao kanuka inyo? Naarai ikadiakanarak da iswamaete kwape kwaŋin.

³⁴ Arai da iyuunete ŋul luimunos adumun kamakec, kimalao kanuka inyo? Ikadiakanarak da eyuunete ikadiakanarak tetere edumunete ŋupeŋul bobo.

³⁵Konye kominasi lukasurupokus, kiswamakisi nuejok, koyuut, komam ijuruŋuŋito; epol rwaru ekusiropit, iraunete yesi idwe luka Je kaloejai kuju kakuj: naarai esiana ŋesi mama kalumam imalaete ka lueroko da.

³⁶Koraas luketimok, kwape eraar Papakus loketimon.

³⁷ “Siritubonokinete, yes da kinyeis atubokinio: sirisitelekanarete, yes da kinyeis aisitelekario; kisioniete, yes da kisionio;

³⁸ koinakisi, yes da kiinakinio; aitemis naejok, naicikakinitai, naijaŋijaŋitai, kiton abukonor, ŋin ŋes kiinakinete ituŋa atorobusiokus. Naarai aitemis naitemioto, ŋipeŋin kitemere yes da.”

³⁹ Kolimok kes awaragan ebe, “Epedori kereka emuduki aiŋarenikin emuduki? Mam ibirokinos kere iarei toma aipany?

⁴⁰ Mam ekesisian itelekari ekesisianakinanike, konye ŋinituŋanan yenituutooritai cut erianakinos ka ekesisianakinanike.

⁴¹Aso kanukinyo isesenia igugut yenejai akoŋu naka onacekon, komam ipodo akitoi naejai akoŋukon kilopet?

⁴²Arai ipedori biai alimokin onacekon ebe, ‘Onaceka, kinyek kalem igugut yenejai akoŋukon’, komam iseseni akitoi naejai akoŋukon kilopet? Yenikesoswai ijo, kolem ber akitoi naejai akoŋukon, kosodi konyet asesen kotenan alemun igugut kakoŋu naka onacekon.

⁴³“Naarai emamei ekitoi loejok loerai araito nukaronok; karaida ekitoi loerono loerai araito nuejok.

⁴⁴ Naarai ejenunio ŋolikitoi kanuka araitoke. Naarai kotoma okukwa mam ituŋa edeŋete itinin, karaida toma okodokodo aideŋ imusabibun.

⁴⁵ Itolomuni ituŋanan yenejok nuejok kotoma kanuejok nuiŋadakinit otauke; ituŋanan da yenikaronon itolomuni nukaronok kotoma kanueroko nuiŋadakinit: naarai inera akeituk nuilapununos kotauke.

⁴⁶ Kanukinyo kinyaritotor eoŋ ebe, ‘Ejakait, Ejakait,’ kwabo mam iswamaete nuabala eoŋ?

⁴⁷Ŋinituŋanan kere yenebuni mamakaŋ, kiira da akakiro ka aswam kes, ketodikini yes kwape eputor:

⁴⁸Eputos bala ekadukon etogo, loeboki kwap noi, epesikini apetetait atiida; naeleleunia akalel, naeretonokinotor akip nukecor togo ŋol, mam epedori aijaŋijaŋa: naarai edukitoi ejok.

⁴⁹Konye yenepupuni, komam iswamai, eputos bala lokeduki eketogo alup komamei apetetait; koretonokinos akip nukecor togo ŋol, atipet kibiror; kepol da atiyakinike.”