Read Ebaibuli 1961 Luka 8 Bible Online

Luka 8 - Ebaibuli 1961 bible

Luka 8

¹ Kosodi kanen ketubor apak naedit, kimaniman ireria kere lukapolok ka luedisiak, elimonokini ka alimor akiro nukajokak nuka ajakanut naka Edeke, kojaas nenipe ka lutomon kaarei,

² ka aŋor ace nukitaŋaleunitai imoyon lueroko ka adekesia, Mariam naenyaritai Magadalene, nakelomunete ajokin akanykaarei,

³ka Yoana aberu naka Kusa ekeŋadan loka Kerode, ka Susana, ka ace nuipu nukijaanakinete kiborokec lukejaatar.

⁴ Naketukokinor ekodet loepol, kopotu da lukepote kaŋolire mamakeŋ, kiner kawaragan atiar,

⁵“Abu ekayean koloma aiye ikekinyom; napeyei, kodooto ice ariri kerot; kicakacakai, konyama ikweny luka apak.

⁶Kodooto ice aŋaŋam; nakegeuniata abwaŋun, kooko, kanuemameatar akip.

⁷Kodooto ice okukwa; kopolooto ikukwa kakes, koridakis,

⁸Kodooto ice alup nuejok, kopolooros, koraata araito kiton akwatat.” Nakinerar akiro ŋun, kiworo ebe, “Yenejaas aki nuka akiirar, kiira.”

⁹Kiŋita ŋes ikekesisiak ebe inyo bo apolou kawaragan kaŋin.

¹⁰ Kotema atiar, “Kiinakinitai yes ajenun nukaiyeiyea nuka ajakanut naka Edeke; konye ice kawaragasia; tetere eanyunete komam eanyunete, ido iirarete komam ejenunete.

¹¹ Aso apolou naka awaragan ŋes nata: Ekinyomit ŋes akirot naka Edeke.

¹² Kwi da lukariri kerot kes lukiirarete; kosodi ebuni Satan, alemar akirot kotauonokec, tetere mam iyuunete ka aitajario da.

¹³Kwi da lukaŋaŋam kes lukiirarete kocamut akirot kailel; konye komameete alias, iyuunete nediokasilon, kosodete kapak naka acodunio etiakaros,

¹⁴Kwi da lukedoete okukwa, kes lukiirarete, ido kelototo koridakinos aiyaloŋoŋ, ka abar, ka aiyalama naka aijar, komam ititionete adioraito.

¹⁵ Kwi da luka alup nuejok, kes luka itauon luitenara luejok lukiirarete akirot, koricito, koraata araito katitiŋikin.

¹⁶ “Emamei ituŋanan yeninokokini atala, kobuburik ibore, arai aibwaikin kwap keitada; konye ibwaikini kuju ocoget, tetere epedorete luelomunete aanyun akeija.

¹⁷ Naarai emamei akirot naibwaitai, namam ikujunio, karaida naimunonitai namam ejenunio ka aikujunio.

¹⁸ Aso kocoito kwape ipupioto; naarai yenejai ibore, einakinio ice; ka yenemamei ibore, edemunio ŋin da yeneomit ŋesi ebe ejaatar.”

¹⁹ Kopotu do totoke ka ikeinacan, mam apedorete aikunyakin ŋes kanuka ekodet.

²⁰Kolimokinai ebe, “Ebwoete totokon ka ikoniinacan kokiŋa; ekotosi aanyun jo.”

²¹Konye Koboŋok kotema kes atiar, “Totoka ka ikainacan kes ŋul luiirarete akirot naka Edeke, kiswamata da.”

²² Kosodi kanen adiopet kapaarasia kaŋun, kodoka ataker, ŋes ka ikekesisiak; kotema kes atiar, “Aso kekwaŋaros aŋolol juwai”; kogeut alosit.

²³Konye napikwaŋasi kojotoor ŋesi, kokut ekwam loepol kaŋolol; kogeut akipi ailelebun ataker, kojaut toma ationis.

²⁴Koloto mama ejai kitwekenyut, kobalas ebe, “Ekapolon, ekapolon ba, kitwaka.” Kokweny ŋesi, kiretak ekwam ka agat naka akipi: kopalasi kojaun aiyamakin.

²⁵Kotema kes atiar, “Ani bo aiyuunikus?” Kokuriakata, koumokis, kotemanaros atiar, “Aso iŋai bo lo, naarai icorakini kiton ikwamin ka akipi da, korimarete?”

²⁶ Kodolot akwap naka Igerasenin, naetereikina Galilaya,

²⁷Nakedokunia koitolima, kiriamunos ketuŋanan loka ore kaŋol lokejaas ajokin; apak naepol mam anapit inapen, mam abu kosal togo, konye toma atesin,

²⁸Nakeanyunia ŋol Yesu, kilala, kibirokin kakonyeneke, kiner keporoto loepol ebe, “Anyoika eoŋ kajo, Yesu, Osoku loka Edeke loejai kuju kakuj? Keŋaiŋait, sirikiitican eoŋ.”

²⁹Naarai abu kicorak emoyo loerono alomun kotuŋanan. (Naarai kikamununei ŋes irwan ipu; kidareneno, koenen kirikoi ka iloin; koŋedeŋedei lukeenitere; kokerianara ŋes ajokit amodiŋ.)

³⁰Kiŋit Yesu ŋes ebe, “Ekonikiror iŋai?” Kobala ebe, “Ajore,” naarai kelomakinitos ŋes ajokin nuipu.

³¹Kiŋaiŋaata ŋes sirikicorak kes alomar aipany.

³²Kejai nen esipan loka ipegei luipu edakasi oroŋat; kiŋaiŋaata ŋes acamakin kes alomar opegei. Kocamak kes,

³³Kolomut ajokin kotuŋanan, kolomasi toma opegei: komotar esipan kaneijululuei, kibirokin aŋolol, kotwakikis akipi.

³⁴Nakeanyuniata ikecokok nuadoikis, kokerata, kisiarakis akiro toma ore kamanat da.

³⁵Koloto aanyun nuadoikis; kopotu mama ejai Yesu, kodumut etuŋanan lokelomunete ajokin, iboie kakejen nuka Yesu, enapit igoen, kejokiar adam; kokuriakaros.

³⁶Ŋul da luapotu koanyut kitejenut kes kwape kitaŋaleunere ŋol lolem ajaas ajokin,

³⁷Kosodete ituŋa kere luka akwap naka Igerasenin airiamar kilipa ŋes anyoun kamakec; naarai kikam kes akurian naepol; kodoka ataker, koboŋo.

³⁸Konye kilip etuŋanan lokelomunete ajokin aup kaŋes; konye kotwar, kobala ebe,

³⁹“Koboŋo orekon, kolimonok nukapolok nukiswamak jo Edeke.” Kolot, kolimonok anatar ere kere nukapolok nukiswamakini ŋes Yesu.

⁴⁰ Kosodi nakeboŋunio Yesu, kisukunyik ekodet ŋes kaiyalama; naarai kidaritos ŋes kere.

⁴¹Ido koany, kobu etuŋanan ekekiror Yairo, lokerai ekayaiton loka atukos; kibirokin akejen nuka Yesu, kiŋaiŋa ŋes alomar togoke;

⁴² Naarai kejai ŋes apese nateluna, naka ikar itomon ka luarei, keapikinit atwanare. Konye napelosi koridakis ikodeta,

⁴³Kosodi aberu nakedeka alele nakaokot ikar itomon ka luarei, naketacakinit imurwok lukejaatar kere, komam epedori ituŋanan aitaŋaleun,

⁴⁴komanu kokauke, kotiro atwele naka anapitoke; atipet kosaŋ alele nakaokotoke.

⁴⁵Kotema Yesu atiar, “Iŋai bo katiro?” Kosodete nakeŋerioto ituŋa kere, kobala Petero ebe, “Ekapolon, kilukut jo ikodeta kiridakis da!”

⁴⁶Konye kotema Yesu atiar, “Katiro ma ituŋanan: naarai amisiik ebe alom apedor kamakaŋ.”

⁴⁷Nakeanyunia aberu ebe mam epedori aibwaio, kobu emarani, kibirokin akonyeneke, kitejenu kakonyen nuka ituŋa kere akiro nukeinakinete ŋes atiror, ido kwape kitaŋaleunere atipet.

⁴⁸ Kotema ŋes atiar, “Akokuka, kitaŋaleu jo akoniiyuun; kolot inapakina.”

⁴⁹Napinera ŋun, kobu etuŋanan kore loka ekayaiton loka atukos, kobala ebe, “Adaun akoonipese; sirikitaar bobo Ekesisianakinan.”

⁵⁰Konye nakiiraria Yesu ŋun koboŋok ebe, “Sirikikurianar; konye kiyuu aiyuun, itajario.”

⁵¹Nakedolio togo, mam abu kisunup ituŋanan alomar nepepe kaŋes, dimarai Petero, ka Yokana, ka Yakob, ka papa loka ikoku ka totoke.

⁵² Emonyete kere kibworos; konye kotema atiar, “Sirikimonya; naarai mam etwanit, konye ejotoi.”

⁵³Kokienatar ŋes noi, naarai kejenete ebe adau ikoku atwanare.

⁵⁴Konye kitiŋ akekan, kiworo ebe, “Ipese, kokweny.”

⁵⁵Koboŋu ekemoyo, atipet konyou; kicorak ainakin ŋes inyamat.

⁵⁶ Koumokis ikekauriak; konye kicor kes kinyeis alimokin ituŋanan nukiswamao.