Read Ebaibuli 1961 Ikisila 10 Bible Online

Ikisila 10 - Ebaibuli 1961 bible

Ikisila 10

¹ “Katema EJAKAIT kapak kaŋin ebe, ‘Kikeu amor aarei nueputos kanusodit, kodok moru neajai eoŋ, kikeu da asaduku naka akito.’

²“Ewadikakini amor ŋun akiro nuajaas amor nusodit nuibu kobwaŋ, ibwaikini ijo kes asaduku.

³ Abu keswamau asaduku naka akito nuka ekasia kakeu da amor aarei nueputos kanusodit, kadoka moru, ketiŋite amor ŋun aarei kakanika.

⁴ Abu kiwadika amor kwape ajaatar aiwadikaeta nusodit, aicorakineta atomon, nuabu EJAKAIT kolimok yes komoru kokidiŋ kakim kapaaran naka atukokin: kainak EJAKAIT eoŋ kes.

⁵ Abu kebelokin, kejesun komoru, kebwaik da amor toma asaduku naabu kekeu; ejaas nepenen, kwape abu EJAKAIT kecorakinia eoŋ.

⁶ “(Konyout idwe luka Isirael koBeerot Beneyaakan koloto Mosera: kotwana Aaron kanen, kidaikinai da nen; kijaanak Eleasar okokuke kotoma osasedotene aiboisike.

⁷Konyout kanen kolototo Gudugoda; konyout koGudugoda kiton Yotobata, akwap naka aguurun nuka akipi.

⁸ Kogita EJAKAIT ateker naka Lebi kapak kaŋin, adakenen asaduku naka aitutuket naka EJAKAIT, abwoenen kakonyen nuka EJAKAIT aijaanakin ŋes, aisirereŋ kokirorike, kiton lolo.

⁹ Kanuka ŋun emamei Lebi akorakinet karaida airumet koinacanake; EJAKAIT ŋes airumeteke, kwape abalar EJAKAIT Ekonideke ŋes.)

¹⁰ “Abu kasalak moru kwape kapak kaya nasodit, apaarasia akaisaoŋon ka akuaresia akaisaoŋon; kapupok EJAKAIT eoŋ kapak kaŋin da; mam EJAKAIT abu komudia jo.

¹¹Katema EJAKAIT eoŋ atiar, ‘Konyou, kiŋarenik ituŋa alosit; elomarete airum akwap naabu keyapoik lukapapaakec ainakin kes.’

¹² “Aso do, Isirael, inyo bo kiburai jo EJAKAIT Ekonideke, nabarai ayoŋit EJAKAIT Ekonideke, alosenen korotinike kere, ka amina ŋes, ka aijaanakin EJAKAIT Ekonideke kekonitau kere ka akoniijar kere.

¹³Airic aicorakineta nuka EJAKAIT, ka ikisilake, lukecorak yes lolo, tetere idumuni ajokis?

¹⁴ Koany, akuj, ka akuj naka akuj, akwap, ka luejaas toma kere eraas luka EJAKAIT Ekonideke.

¹⁵Konye itojokit EJAKAIT amina lukapapaakon, abu koseu akeceur naatupakini, ŋes yesi, kotoma otuŋa kere, kwape ejaar lolo.

¹⁶ Kokepata do amunyin nuka itauonokus, siri bobo kitininikata imurisiŋakus.

¹⁷ Naarai EJAKAIT Ekusideke, erai Edeke loka idekesio, EJAKAIT da loka ijaka, Edeke lokos, lokapedor, loketasuro, lomam etiakit ituŋa, karaida acamun agwelio.

¹⁸ Etubokini ikokiok ka apuserun, emina imoit, ainakin ŋes inyamat ka anapito.

¹⁹Kominasi do yesi da imoit, naarai iraas kolo yesi da imo kakwap nako Misiri.

²⁰ Koyoŋitenenei EJAKAIT Ekonideke, kijaanakinenei ŋes, kimorikikinos kaŋes, kiyapoenenei kokirorike.

²¹ Erai ŋesi aituritikon, ŋesi da Edekekon, lokiswamak jo akiro ŋun nuepolok nuketasuro, nuaanyutu akonikonye.

²² Apotu lukapapaakon koloto Misiri ituŋa akaisakanykaarei; konye kwana kitupuu EJAKAIT jo kwape aacer nuka akuj kanuka aipues.