Read Ebaibuli 1961 Ikisila 11 Bible Online

Ikisila 11 - Ebaibuli 1961 bible

Ikisila 11

¹ “Kanuka ŋun kominenena EJAKAIT Ekonideke, koricite akekirot, ka ikisilake, ka itubesiake, ka aicorakinetake apaarasia kere.

²Kojenutu do yesi lolo: naarai mam enera kidwekus lumam ejenunito, lumam eanyunito da alecor naka EJAKAIT Ekusideke, akepolou, akanike nakagogoŋ, ka akekan naerioro.

³ Aanyunetake, ka aswamisioke, nuabu kiswamak Parao ekabaka loko Misiri, ka akwapuke kere, koMisiri;

⁴ Nuabu kiswamak ajore naka Misiri, ibalasinikec ka agalinikec: kwape abu korapiaria kes kakip nuka Aŋolol Nakareŋan nakidapitotor yes, kwape amudiaria EJAKAIT kes, kiton lolo;

⁵Nuabu kiswamak yes kamodiŋ, kiton naidolunioto aibois na;

⁶ Nuabu kiswamak Datan ka Abiram, odwe luka Eliab, okoku loka Reuben; kwape abu akwap kooŋaria akeituk, kiliko kes, ka ikaliakec, ka iwemanakec, ka ŋinibore kere yenejari yenatuparit kes, koIsirael kere:

⁷Konye aanyut akusikonye aswam kere naepol naeswama EJAKAIT.

⁸ “Kanuka ŋun koricito aicorakinet kere nakecorak yes lolo, tetere igogoŋioros, kolomasi airum akwap, naidokarete airum;

⁹ Tetere iyatakinos akusipaarasia kakwap naabu EJAKAIT kiyapoik lukapapaakus ainakin kes ka akeceur, akwap naeleleete akile ka esik.

¹⁰ Naarai akwap nailosi ijo airum, mam eputos kakwap nako Misiri, nailomuniata yesi, naibu koyeik ikinyomokon, naibu kobukonok akipi kakejekon, kwape amana naka idiasio;

¹¹ Konye akwap naidokarete yesi airum, erai akwap naka iukon ka aditon, emasi da akipi nuka akiru naka akuj:

¹² Akwap naidari EJAKAIT Ekonideke; esesenete ŋes akonye nuka EJAKAIT Ekonideke, amear kageunet naka ekaru kiton osaŋe loka ekaru.

¹³ “Kosodi kanen arai kipupoto yesi kojokan aicorakinetaka nukecorak yes lolo, aminenena EJAKAIT Ekusideke, aijaanakin ŋes kekusitau kere ka aijarakus kere.

¹⁴ Ainakini do akwapukus akiru kotoma apakike, akiru naka aiporo, ka akiru naka akamu, tetere ituki akimakon, ka ebinokon, ka akinyetekon.

¹⁵ Ainakini da imanikoriakon inya kanuka ibarenekon, ido inyami kimonikin.

¹⁶ Kocoito, kinyeis ikusitauon amodio, kosodete apaar, aijaanakin icedekesio aima kes;

¹⁷ Kosodi anyunyura naka EJAKAIT ainepun aluikin yes, agolokin akuj tetere emameun akiru, tetere mam akusikwap ebwaŋuni akeraito; kosodete yesi atwakare atipet kakwap naejok nakiinakini EJAKAIT yes.

¹⁸ “Kanuka ŋun ibwaikinete akiroka nu otauonokus ka aijarakus; koenanakisi kes akaninikus araun aanyunet, kotorokinito da kokidiŋ oreetakus.

¹⁹ Kisisianakis kes ikusidwe, kinerenena da kes, iboienenei kotogokon, ilosenenei korot, iperenenei, inyoununei da.

²⁰ Kiwadikaenenei da ategerio nukotogokon, koruteikon da:

²¹ Tetere akusipaarasia ka apaarasia nuka idwekus iyatakinos kakwap naabu EJAKAIT kiyapoik lukapapaakus ainakin, kwape apaarasia nuka akuj kokuju kakwap.

²² Naarai arai kidunyakis yesi aricit aicorakinet na kere nakecorak yes aiswamaenen; aminenena EJAKAIT Ekusideke, alosenen korotinike kere, aimorikikin kaŋes;

²³ Ŋes do ireŋearia EJAKAIT atekerin ŋun kere kakonyenekus, irumete do yesi atekerin nuepolok nuegogoŋ da adepar yes.

²⁴ Ŋiniibois naicakete akusikeje eraun nakus: anyoun kamodiŋ, ka Lebanon, anyoun kocor, ecor Eupurat, kiton aŋolol nakoto, ŋes eraun eikorukus.

²⁵ Emameun etuŋanan loepedori abwoikin yes: ibwaikini EJAKAIT Ekusideke etasurokus ka ailiilikus akwap kere naicakete yesi, kwape kilimokinia.

²⁶ “Koany, ebwaikini mamakus lolo arereŋ ka ekenit;

²⁷ Arereŋ, arai kipupoto aicorakineta nuka EJAKAIT Ekusideke nukecorak yes lolo:

²⁸ Ekenit da, arai kiŋeroto apupun aicorakineta nuka EJAKAIT Ekusideke, kosodete apaar korot lokecorak yes lolo, atupar icedekesio, lumam yes ijenunito.

²⁹ “Kosodi nakitolomaria jo EJAKAIT Ekonideke akwap nailosi airum, ibwaikini arereŋ moru Gerisim, ka ekenit da moru Ebal.

³⁰Mere ejaas kesi okekwa loka Yorodan, kiŋaren kerot kama elomari akoloŋ, kakwap naka Ikanaanin luiboiete koAraba, naitei Giligal, eiduny kiluan luka More?

³¹Naarai idokete yesi Yorodan alomar airum akwap nakiinakinit EJAKAIT Ekusideke, irumete ŋes, iboikinos da nen.

³²Kidarenenete aitodol ikisila kere ka itubesia luebwaik akonyenekus lolo.